1 တစ်ဖန် ငါသို့ရောက်လာသောထာဝရဘုရား၏ဗျာဒိတ်တော်ကား၊ 2 သင်သည်၊ ဤဒေသအရပ်၌ အိမ်ထောင်မပြုလင့်။ သားသမီးမရှိရာ။ 3 အသို့ဆိုသော်၊ ဤပြည်၊ ဤဒေသတွင်၊ ဖွားသောသားသမီးမှစ၍မြင်သောမိဘတို့ကိုရည်လျက်၊ ငါထာဝရဘုရားမိန့်ဆိုသည့်အတိုင်း၊ 4 မြည်တမ်းမှု၊ မြှုပ်နှံမှုကင်းလျက်၊ ကာလရောဂါဖြင့်လည်း‌ေကာင်း၊ ဓားဘေး၊ အစာခေါင်းပါးဘေးဖြင့်လည်း‌ေကာင်း၊ သေဆုံးကုန်ခန်းရသော ထိုသူတို့အလောင်းများသည် မြေအပြင်တွင် မြေဩဇာနှင့်၊ လေသတ္တဝါ၊ မြေသတ္တဝါတို့အစာဖြစ်ရကြလိမ့်မည်။ 5 ငါထာဝရဘုရားမိန့်ဆိုသည့်အတိုင်း၊ ငြိမ်သက်ချမ်းသာတည်းဟူသော မေတ္တာကျေးဇူးနှင့် ကရုဏာတော်ကို၊ ဤလူမျိုးမှငါရုတ်သိမ်းပြီဖြစ်သောကြောင့်၊ အသုဘအိမ်သို့မဝင်ရ။ စာနာ၍မြည်တမ်းခြင်းကိုလည်း၊ သင်မပြုရမည့်အကြောင်း၊ ငါထာဝရဘုရားမိန့်ဆို၏။ 6 ဤပြည်တွင်လူကြီးလူငယ်တို့ပါ၊ မြှုပ်နှံမှုကင်းလျက် သေရကြမည့်အလျောက်၊ မြည်တမ်းခြင်း၊ ကိုယ်ကိုထိရှခြင်း၊ ဦးဆံပယ်ခြင်းများကိုလည်း‌ေကာင်း၊ 7 အသုဘပွဲလုပ်၍ အလွမ်းဆွတ်ပြေစေရန် မုန့်ကျွေးခြင်း၊ မိဘကွယ်လွန်သော်လည်း နှစ်သိမ့်စေသော အရည်တိုက်ခြင်းများကိုလည်း‌ေကာင်း၊ သူသေတို့အတွက်မပြုရကြ။ 8 ပွဲသဘင်အိမ်၌လည်း၊ ဝင်ရောက်စားသောက်ထိုင်နေရမည်မဟုတ်။ 9 ဣသရေလလူမျိုး၏ဘုရားသခင်၊ ဗိုလ်ခြေတို့အရှင်ငါထာဝရဘုရားမိန့်ဆိုသည့်အတိုင်း၊ သင်တို့လက်ထက်၊ သင်တို့မျက်မှောက်တွင်ပင်၊ အားရရွှင်လန်းသံ၊ မင်္ဂလာဆောင်သတို့သား၊ သတို့သမီးတို့ကြွေးကြော်သံများကို၊ ဤအရပ်ဒေသ၌ ငါပြတ်စဲစေမည်။

10 ထိုဗျာဒိတ်တော်ချက်ဟူသမျှကို သင့်ထံကြားနာရသောဤလူမျိုးက၊ ထိုမျှလောက်ဆိုးသောဘေးအလုံးစုံကို၊ ထာဝရဘုရားသည် အဘယ့်ကြောင့် ပြဋ္ဌာန်းတော်မူသနည်း။ ငါတို့ဘုရားသခင်ထာဝရဘုရားအား၊ ပြစ်မှားမိသောဒုစရိုက်ပြစ်မှုကား၊ အဘယ်နည်းဟုမေးကြသည့်ကာလ၊ 11 ငါ၏ပညတ်တရားကိုမစောင့်ရှောက်ဘဲ၊ ငါ့ကိုစွန့်ပစ်ပယ်ထားကြသည့်ပြင်၊ အခြားဘုရားများနောက်လိုက်လျှောက်ဝတ်ပြုရှိခိုးလျက်၊ 12 ဗျာဒိတ်တော်ကိုမနာခံသည့်တိုင်အောင်၊ ခက်မာသောကိုယ့်သဘောအတိုင်း၊ အသီးအသီးတို့လိုက်လျှောက်ကြသည်မှာ၊ ဘိုးဘေးတို့ထက်ဆိုးသွမ်းသောကြောင့်တည်း။ 13 သို့ဖြစ်၍ ငါသည်ကရုဏာကင်းလျက် ဘိုးဘေးများမှစ၍၊ သင်တို့ကိုယ်တိုင်မရောက်ဘူးသောပြည်သို့၊ အခြားဘုရားများရှေ့၊ နေ့ညဉ့်မဟူဝတ်ပြုကြစေခြင်းငှာ၊ ဤပြည်မှသင်တို့ကို၊ ငါထုတ်ပစ်မည်ဟု ထာဝရဘုရားမိန့်တော်မူကြောင်း၊ သင်ပြန်ဆိုရမည်။

14-15 သို့ဖြစ်၍၊ ဘိုးဘေးတို့အားငါပေးခဲ့သောပြည်ရင်းသို့၊ ဤလူမျိုးကိုပြန်ခေါ်မည်ဖြစ်သောကြောင့်၊ အိဂျစ်ပြည်မှဣသရေလအမျိုးသားတို့ကို၊ ဆောင်ခဲ့သောထာဝရဘုရားအသက်တော်ဟူ၍ ဆက်လက်ဆိုလေ့မရှိဘဲ၊ နှင်ထုတ်တော်မူခဲ့ရာ မြောက်ပိုင်းပြည်နှင့် ပြည်တကာမှဆောင်ခဲ့သော ထာဝရဘုရားအသက်တော်ဟူ ၍ ဆိုရလတ္တံ့သောနေ့ရက်ကာလရောက်တော့မည်ဟု၊ ငါထာဝရဘုရားမိန့်ဆို၏။

16-17 ငါမျက်မှောက်ပြုရာ၊ ချင်းတို့အလေ့အလာများသည်၊ မျက်နှာတော်မှမပုန်း၊ ဒုစရိုက်လည်း၊ စက္ခုတော်မှမကွယ်သည့်အလျောက်၊ ငါသည်ချင်းတို့ကိုမျှားရန်တံငါအမြောက်အမြားစေလွှတ်ပြီးနောက်၊ တောင်၊ ကုန်း၊ ကျောက်ကြားဟူသမျှမှ၊ ချောက်ထုတ်ရန် မုဆိုးအများကိုလည်းစေလွှတ်သည့်ပြင်၊ 18 စက်ဆုပ်ဖွယ်ရုပ်တုအသေကောင်များဖြင့်၊ ပြည်တော်ကိုညစ်ညူးစေလျက်၊ ရွံရှာဖွယ်ရာဘုရားများဖြင့်လည်း၊ ပိုင်တော်မူရာကိုပြည့်စေကြသော ဒုစရိုက်ပြစ်မှုအတွက်၊ နှစ်ဆတင်ရင်ဆပ်ပေးမည်ဟု၊ ငါထာဝရဘုရားမိန့်ဆိုသည်ဟူ၍တည်း။

19 အကျွန်ုပ်၏စွမ်းအား၊ အကျွန်ုပ်၏ရဲတိုက်၊ ဒုက္ခတွေ့သည့်ကာလ၊ အကျွန်ုပ်၏ခိုလှုံရာဖြစ်သော အိုထာဝရဘုရား၊ မြေကြီးအစွန်းအဖျားများမှ၊ လူမျိုးခြားတို့သည်၊ ကိုယ်တော့်ထံတိုးဝင်၍၊ မိရိုးဖလာဘုရားများသည် မုသာ၊ ​အနတ္တဖြစ်လျက်၊ ကျေးဇူးမပြုနိုင်သောဘုရားများသာဖြစ်လှပါသည်ဟု ဝန်ခံကြပါလိမ့်မည်။ 20 လူသည်အတုမျှသာဖြစ်သောဘုရားများကို၊ ကိုးကွယ်ရန်လုပ်အပ်ပါသလော။

21 သို့ဖြစ်၍၊ ငါ့လက်ရုံးတော်၊ ငါ့ခွန်အားတော်ကို၊ ဤတစ်ကြိမ်တည်းငါဖော်ပြသည့်အလျောက်၊ နာမတော်ကား၊ ယေဟောဝါတည်းဟု၊ ချင်းတို့သိရကြလိမ့်မည်။