ဧဇရအတ္ထုပ္ပတ္တိကျမ်း
1
1 ယေရမိဆင့်ဆိုသော ထာဝရဘုရား၏ ဗျာဒိတ်တော်ပြည့်စုံစေခြင်းငှာ၊ ပေရသိဘုရင်ကုရုမင်းနန်းစံတစ်နှစ်တွင်၊ ထိုဘုရင့်စိတ်ကို ထာဝရဘုရားနှိုးဆော်တော်မူသဖြင့်၊ ပေရသိနိုင်ငံတစ်ေလျှာက်ဖတ်ရွတ်ကြော်ငြာစေသောအမိန့်တော်ကား၊
2 ပေရသိဘုရင်ကုရုမင်းမိန့်တော်မူသည်မှာ၊ မိုးကောင်းကင့်ရှင်ထာဝရဘုရားသည်၊ မြေကြီးနိုင်ငံရှိသမျှကိုငါ့အားပေးသနားတော်မူသည့်အလျောက်၊ ယုဒပြည်၊ ယေရုရှလင်မြို့တွင် ဗိမာန်တော်ကိုတည်ဆောက်ရန်တာဝန်ထားတော်မူလေပြီ။
3 ထို့ကြောင့်လူမျိုးတော်အနက် မည်သူမဆို၊ ယုဒပြည်ယေရုရှလင်မြို့သို့၊ ကိုယ့်ဘုရားသခင်တည်လျက်ပြန်သွား၍၊ ဣသရေလလူမျိုးဘုရားသခင်ထာဝရဘုရား၏ ဗိမာန်တော်ကို၊ ထိုမြို့၌ တည်ဆောက်ကြစေ။ ကိုယ်တော်ကား၊ မှန်သောဘုရားပေတည်း။
4 ထိုလူမျိုးအကြွင်းအကျန်တို့တည်းခိုရာ၌ နေသောတိုင်းရင်းသားတို့သည်၊ ယေရုရှလင်မြို့ဘုရားသခင့် ဗိမာန်တော်အဖို့ အလှူဒါနများပြင်၊ ရွှေ၊ ငွေ၊ ဥစ္စာ၊ တိရစ္ဆာန် များဖြင့် ထောက်မလိုက်ကြစေဟု ထုတ်ဆင့်၏။
5 ထိုအခါ ယေရုရှလင်မြို့သို့ပြန်သွား၍ ဗိမာန်တော်တည်ဆောက်ရန် ဘုရားသခင်နှိုးဆော်တော်မူခြင်းကိုခံရသောယုဒ၊ ဗင်္ယာမိန့်အိမ်ထောင်အအုပ်အချုပ်၊ပရောဟိတ်၊ လေဝိဂိုဏ်းသားအပေါင်းတို့သွားကြမည့်ပြုရာ၊
6 အိမ်နီးဝန်းကျင်တို့သည်၊ အလှူဒါနများပြင်၊ ရွှေထည်၊ ငွေထည်၊ ဥစ္စာ၊ တိရစ္ဆာန်၊ အဘိုးထိုက်တန်ဆာများဖြင့် ထောက်မလိုက်ကြ၏။
7 ပေရသိဘုရင်ကုရုမင်းလည်း၊ ယေရုရှလင်မြို့မှ နေဗုဒ်ခနေဇာမင်းသိမ်းယူ၍၊ ကိုယ့်ဘုရားတို့ဗိမာန်၌ သွင်းထားခဲ့သော၊ ဗိမာန်တော်အသုံးအဆောင်များကိုထုတ်ယူ၍၊
8 အခွန်တော်ဝန်မိသရေဒတ်လက်ဖြင့်၊ ယုဒမင်းမျိုးအကြီးအကဲ ရှေရှဗာဇာ့ထံရေတွက်အပ်ပေးစေ၏။
9 အရေအတွက်ကား၊ ရွှေအင်တုံသုံးဆယ်၊ ငွေအင်တုံတစ်ထောင်၊ ဓားနှစ်ဆယ့်ကိုးစင်း၊
10 ရွှေဖလားသုံးဆယ်၊ ဒုတိယတန်းငွေဖလားလေးရာ့တစ်ဆယ်၊ အခြားအသုံးအဆောင်တစ်ထောင်မှစသော၊
11 ရွှေငွေအသုံးအဆောင်အပေါင်း၊ ငါးထောင့်လေးရာများကို၊ ဗာဗုလုန်မြို့မှယေရုရှလင်မြို့သို့သုံ့ဘမ်းခံရသူတို့ပြန်သွားသောအခါ ရှေရှဗာဇာဆောင်ယူလေ၏။