TITU
KALAN PAUL CCAKY
Titus
Titus hynh Zentapaw thua zah Khriccaaw lang a tang te, Paul ryalawnaw kya a bawmtu te ryalahkheihtu lang yn tangpaw nynh thua. Titus kalan Paul Ccaky hynh Krete tuikoih kya Titus a um lyaze a kypaw thua zah tuin kya Khriccaaw cciakhaetu lang bawmtu mino lang a nungsyapaw nynh thua. Hynh-e ccaky nynh uccaw ccangthum a langsah:
(1) Khriccaaw piccan hae nynh hoi lanpaw hiinzia kha Titus kya a ho. Nysah thui ahonawpaw tuh Krete ccungccaw hae hynh hoyleinaw lante minthaan hae paw athua hae keiccu nynh thua.
(2) Khriccaaw lungkhu paawpihua hae, nungpihua hae (hynh-e nungpihua hae tuh mino nungpi hae a ccangpah pathy lan hae paw nynh thua hae), mino pise hae te see hae kha pawtepei ccangpya lan hae cipaw kha mah tuanaw a pya.
(3) Athangnaw kya ccangpahtu nynh Titus kha Khriccaaw hiinzia a ccangpya. Byapi lante tuh ming hae ryte daebabi lante vaeccawku aho zia, huakunaw, eikunaw te khriccaawbuu phianaw balyn sibia lan tuanaw a pya.
1
Beihlangnaw
1 Pachia rya a lahtu te Jesu Khri locceihtu athuapaw Paul nynh ccaw kae ky oh. Pachia nynh a popaw a ccungccaw hae zynnaw kha tynsah khylan te ah beiknaw nynh oun ccangpyapaw byaccing kalan cciakhae khylan popaw te sawpaw nynh ka thua,
2 tuh-e ah beiknaw tuh zungzae hiinnaw ngaehoinaw kya a bingkuhpaw nynh thua; a hyn boi leipaw Pachia nynh hynh-e hiinnaw tuh laephi thotakaw mawte bya oun kinpyakupaw thua zah,
3 accyh azaw te phunghonaw liate a bya kha a langsaku vae, tuh-e tuh aening oun Khumtu Pachia kya-e kawbya thyhte kamaw kya pya athua.
4 Phe lokuh lante ah hoipaw zynnaw kya ka ccaaw ccaccing athuapaw Titu:
Paaw Pachia te aening oun Khumtu Khri Jesu kyate thawccinaw te daenaw tuh na kya la um vae sah.Ref 1.4: 2Ko 8.23; Gal 2.3; 2 Tim 4.10
Krete kya Titu Ryalawnaw
5 Nang kha kaw kae pya vae thyhte, ahobou ungpaw ryalaw kha kou hoy lan law khylan te khua takyh kya pastor hae kha khang khylan Krete tuikoih kya nang kha kae cciataw;
6 Khriccaaw piccan tuh ccaenaw um leipaw athua cih, zu lu kheit kyalya a hoipaw athua cih, a ccaaw hae tuh zyntu athua cih hae zah, a ccouseikuh hae paw te kawngae lei hae paw cite a ccae lei hae paw athua cih.Ref 1.6-9: 1 Tim 3.2-7
7 Pastor tuh Pachia kya-e synriatu athua hawte ccaenaw um leipaw athua cih; amaw rynaw te um leipaw, a thindyn leipaw, misutui a ran leipaw, peku a mang leipaw, phua elang a karankuh leipaw athua cih,
8 tukoute mikhia do-oihthyapaw, ahoypaw a rypaw, a tuathyapaw, hmerarihpaw, beiknaw lang a zuakuhpaw te a sungkuh khopaw athua cih,
9 ahmepaw ccangpyanaw khate ming hae kha a hyy kho nawlan hae te tuh-e ccangpyanaw a rawse hae paw kha mih seinaw a muihsahku kho nawlan hae, aning tuh ccangpya athua vae thyhawte zyn lan umpaw bya kha varyng a kyngkuhpaw athua hahe cih.
10 Pawccecize kawngae lei hae paw, accakaepaw bya a hotu hae te lingtu hae patae a um hae. Abyapi lante vingdungawkuh hae paw nynh thua hae.
11 Tuh-e hae mih khalang tuh phang hu athua hahe cih, minmin nynh ahme leipaw muenaw a ry hae keiccuze ccangpya lan accan leipaw kha ccangpah hae zah innbyn mawte phe a buleih hae.
12 Mimaw kyaze minphuin kheit athuapaw, mih profeh lu kheit nynh,
“Krete ccungccaw hae tuh
palei a hyn hae paw,
arepaw sarangpaw hae,
mih thawnawpaw
aemoh hae nynh thua hae,” a ci.
13 Hynh-e bya tuh ahmepaw nynh thua. Tukeiccuze minmin tuh zynnaw kya atyn nawlan hae thawte la pe hae.
14 Byaccing a vuapaw ccungccaw hae kya-e kawbya hae te Judah hae phungpaw huataw hae kha pawlang a ria khyh nawlan hae nynh thua.
15 Athyaapaw ccungccaw hae hanlan tuh pawpaw balyn marya athyaa, thuasalama anungsikuhpaw te a zyn lei hae paw hanlan tuh pawsang mah thyaa khyh. Thuasalama mih thinlung te mimaw nykunawpaw thinlung mah anungsikuh.
16 Minmin nynh Pachia kae nyh cite ho hae salamah mih cyisahnaw te Pachia kha a vua hae; pawccecize minmin tuh luathua-ae-ui lan um hae paw, kawngae lei hae paw te ahoypaw ryalaw miakaw kya ccungkia lei hae paw nynh thua.