TIMOTE
KALAN PAUL CCAKY KYKHEITNAW
Timothy
A paaw tuh Grikpaw thua zah a nung tuh Judahnung athuapaw Timote tuh Asia Minor ram kya umpaw Khriccaaw mino nynh thua. Paul nynh Pachia rya a lawnaw kya a bawmtu te a ruiban nynh athua. Timote kalan Paul Ccaky Kykheitnaw kya uccaw alepaw ccangthum a um.
(1) Khriccaawbuu lungkhu ccangpyaseinaw kong raeringkunaw a zei. A ccangpyakunaw hae tuh Juda hae tuanaw te Zenta hae tuanaw apykuhpaw zynnaw kyate yn poupaw thua zah, ah laephi pynpi hynh ahoy leipaw nynh thua; ccungccaw hynh humhung zemah ny leipaw byaphi ny khonaw te tungtuh leite, dyku leite abang nynh looh-ae sungnaw te rou nynh khumnaw tuh ah ccou kho oh, a ci hae. (2) A ccaky lungkhu kya khriccaawbuu cciakhaenaw te beiknaw zia konglang ccangpyakunaw, Khriccaaw piccan hae te bawmtu hae nynh pawcihawpaw ziazae mou ccyngku lan cipaw cia a um. (3) Khri ryalahtu hoypaw lang tangnawpaw Timote kya tuanaw pyanawpaw te zyntu hae aphu patae kya a rya konglang a hopya hae.
1
Beihlangnaw
1 Aening oun Khumtu Pachia te aening ngaehoinaw athuapaw Khri Jesu kawpyanaw liate Khri Jesu locceihtu athuapaw kae, Paul nynh,
2 Zynnaw kya ka ccaaw ccaccing na thuapaw Timote nang kha ccaw kae ky. Paaw Pachia te ah Bawipaw Khri Jesu kyate thawccinaw, ngaethyaumsahnaw te daenaw tuh na tungvaw la um sah.Ref 1.2: Loc 16.1
Ccangpyaseinaw Raeringnaw Pyanaw
3 Mesidonia ram lang ka ccia lyaze kae hopya sya hawte, nang tuh Efesa khua kya na la umhy cih zah ccungccaw abang nynh ahme leipaw ccangpyanaw kha a ccangpya khyh nawlan hae thuasah,
4 phungpaw huataw hae te athangthya leipaw thokeinaw phungpaw hae kha a ngae ry khyh nawlan hae thuasah la hopah hae; tuh-e uccaw hae nynh zynnaw liate ny athuapaw Pachia paccynnaw laeze eikunaw kha a thuakhae.
5 Hynhte bya kae tawsyanawpaw eenaw tuh, athyaapaw thinlung, ahoypaw mawtemaw nykunaw te thyaruhnaw um leipaw zynnaw kyate yn thuapaw sungsakunaw nynh thua.
6 Ccungccaw abang nynh tuh-e ccangpyanaw hae tuh cciataw hae zah accakaepaw byahokupaw kalan a paleihkuh hae.
7 Minmin tuh mimaw toulou nynh a ho hae paw te tynkaring lan a kyngku hae paw kong sanmah a thaethya lei hae pite kawbya sazae lang tang a ry hae.
8 Lukhakheit nynh kawbya kha hmerarih lan a mang ze, kawbya tuh ahoy cipaw ah ny oh.
9 Kawbya tuh adingpaw ccungccaw hanlan raepaw thua khyh, thuasalama kawbya pawlangria lei hae paw te kawngae lei hae paw hanlan, Pachia pawlangria lei hae paw te misei hae hanlan, a thyaa lei hae paw te beiknaw pawlangria lei hae paw hanlan, paaw hae te nung hae a theihtu hae hanlan, ccungccaw theihtu hae hanlan,
10 a ohhuakuh hae paw hanlan, pise te pise, nopi te nopi a sei hae paw hanlan, ccungccaw ruh hae paw hanlan, mihyn hae hanlan, ahme leipaw ccaekia lang tang hae paw hanlan te ahmepaw ccangpyakunaw te arawsekuhpaw miakaw hanlan nynh kawbya tuh rae athua cipaw ah ny oh.
11 Tuh-e ahmepaw ccangpyakunaw tuh thehoy ccoupaw Pachia kya-e aphu-epaw thehoypaw te accawkuh; tuh-e thehoypaw tuh phy lan kae kha yn pya.
Ngaethyaumsahnaw hanlan Lungtuanaw
12 Thawzung yn pyatu ah Bawipaw Khri Jesu kha ka thehoysah, pawccecize kae hynh a ryalaw lan yn khang zah a lungzipaw lang yn riabua.
13 Kae tuh langmawlya Pachia saryanaw bya a hopaw, a tuaa a sahtupaw te a puathopaw nynh ka thua. Thuasalama zynnaw hoi leite nythya leite ka la cyipaw athua keiccuze ngaethyaumsahnaw kha ka mue.Ref 1.13: Loc 8.3, 9.4-5
14 Ah Bawipaw kya-e thawccinaw tuh Khri Jesu kya umpaw zynnaw te sungsakunaw ryte ka hanlan myaryamaw alung.
15 Khri Jesu tuh misei hae khum khylan nynh laephi kalan yn thua cipaw tuh ahmepaw bya thua zah khaleih lawku lan accanpaw nynh thua. Tuh-e misei hae kyaze kae tuh a sei huaccepaw nynh ka thua.
16 Thuasalama zungzae hiinnaw hanlan amaw a zyn vae cih paw ccungccaw hae nynh dosuinkupaw thua khylan, Jesu Khri nynh a sei huaccepaw kae ka tungvaw kya accingpaw ngaesangnaw kha langsaku khylan, kae tuh ngaethyaumsahnaw kha ka mue.
17 Zungzae atynpaw Siapharan, a chih kho leipaw, muih kho um leipaw, amaw kyalya Pachia athuapaw tungvaw kya sawtuanaw te phu-enaw tuh zungzae te zungzae cia um sah. Amen.
18 Ka ccapaw Timote, nang na konglang langmawlya a la ho hae paw profehbya thyhte nang nynh ahoypaw rhaw kha na dou nawlan, hynh-e kawbya hynh kae pya.
19 Zynnaw te ahoypaw mawtemaw nykunaw kha varyng la kyngkuh. Ccungccaw abang nynh tuh-e nykunaw tuh a vua hae keiccuze zynnaw kya arohpaw sanphalung hawte nynh thua hae.
20 Tuh-e hae laku kya Himenias te Alexanda a umbua hae, minmin nynh Pachia saryanaw bya a ho khyh nawlan hae, ccangku khylan Satan kalan ka ap vae hae.