6
1 Nopi hae lakuze
a puithya huacce nung,
na sungsahpaw tuh
teilangmou phe a ccia vae?
Amaw kha aening nynh
ah ccung oh ccaw, na sungsahpaw tuh
tei laanpi lang mou phe a ccia vae?
2 Ka sungsahpaw tuh khokhu kya
a sahiin phu kha paeesaku khylan te
lili paw hae kha suelua khylan
amynkhuhpaw khokhu lang nynh
phe a cciabung vae.
3 Kae tuh ka sungsahpaw kya-e
ka thua zah, ka sungsahpaw tuh
ka kya-e nynh thua; a sahiin hae kha
lili paw hae laku khe a rin hae.
Liaccanung Puithyanaw
4 Ka sungsahnung, nang tuh
Tirzah khuapi hawte na puithya,
Jerusalem hawte na puithya,
rhawtukkunaw kya hawte ri lan na um.
5 Ka kyate ccanglang hawitua,
pawccecize na mit nynh phang yn kyng!
Na sang tuh Gilead mua hary apannaw kya
a cceihbung hae paw
miaa phu te nynh aloku.
6 Na haw tuh tuisingkunaw kyate
oun cceihthung hae paw
tuuphu te nynh aloku;
tuh-e tuu hae tuh abuabuate
ataw than hae zah,
sa kheit sanmah zo khyh hae.
7 Na byaki tuh mae kya
bongkupaw boei kaw a umpaw
ccalee thae apaekuapaw te nynh
aloku hae.
8 Siapharan zupi sung taruh,
lovae sung tarya te
riatae leipaw liaccaw hae a um.
9 Ka vahu, phe a ccingnung
ka kya-e tuh amaw rou nynh thua,
a nung nynh myarya a sungsahnung,
amaw tuh a saahtunung hanlan
phe a ccingnung nynh thua.
Liaccaw hae nynh amaw kha
muih hae zah, lungtuanung cite
a ko hae; siapharan zu hae te
lovae hae nynh mah a thehoysah hae.
10 “Khuadaetakaw hawte yn langkuh,
sawpaw hawte a puithya,
khuanin hawte aw zah
rhawtukkunaw kya hawte ri lan umpaw
hynh-e nopinung hynh hummou?”
11 Accya e thingku hae do khylan,
misu ku atoih tou toih khyh tou
cipaw do khylan te
ccalee ku apaw paw tou
paw khyh tou cipaw ny khylan
khokhu lang ka cceihbung.
12 Bua ka nyku mawkhe,
lungkaw ka tuakunaw nynh
ka siapharannung pe umpaw
marangle lungkhu khe yn nung.
13 Pou Shulam nung, yn ki lou,
yn ki lou!
Nang kha kae muih kho ccaw
Rhawkaw phu ning malang
a law hae paw kha do hawte,
Shulam nung kha pawccemou na do cih?