4
Zudy Ccangvaepaw nynh A Hothung
1 Ka sungsahnung,
paw na puithya baban,
myaryamaw na puithya!
Na mae na bongkupaw boei kaw
a umpaw na mit tuh
vahu mit te nynh aloku.
Na sang tuh Gilead mua
hary apannaw kya
a cceihbung hae paw
miaa phu te nynh aloku.
2 Na haw tuh a ming ngo koute,
tuisingkunaw kyate
oun cceihthung hae paw
tuuphu te nynh aloku,
tuh-e tuu hae tuh abuabuate
ataw than hae zah,
sa kheit sanmah zo khyh hae.
3 Na mung tuh sebabipaw laaw te
lokuh zah, na khalang tuh
sungsah lan a um.
Mae bongkupaw boei kaw
a umpaw na byaki tuh
apaekuapaw ccalee thae te nynh aloku.
4 Na nging tuh zunghe ccakhungnawpaw
David a rhawviainn te nynh aloku;
tuin kyakhe abalyn mawte
rhawkaw hae kya-e
zunghe thong kheit a um.
5 Na matei ccangning tuh
lili paw hae laku
a ae cciamang hae paw sazuh taw
a phei hae paw te nynh aloku.
6 Mohnaw zo zah
khua adae mawkhe
mura mua te frankinsen
sangpyng hae kalan khe
ka rangsakuh cih.
7 Ka sungsahnung,
na pyn balyn mawte na puithya;
na kya hosianaw um khyh.
8 Ka liaccanung taraw,
Lebanon kyate kamaw ryte cceihbua;
Lebanon kyate kamaw ryte cceihbua.
Amana mua dung kyate thuasah,
Senir mua dung te
Hermon mua dung kyate thuasah,
chindeih karung kyate thuasah,
kaesing umnaw
mua hae kyate thuasah pou ccavae.
9 Ka ccianung, ka liaccanung taraw,
ka thinlung phe nae cciakhae vae,
aphutepaw si oikute,
na mit te vaekheit phalah
nae dopaw khate
ka thinlung phe nae cciakhae vae.
10 Ka ccianung, ka liaccanung taraw,
na sungsahnaw tuh
pawcih baban mou a e!
Na sungsahnaw tuh misutui laeze
pawcih baban mou thuahua zah,
na chitui mynkhuhpaw tuh
ccangpaw mynkhuhpaw laeze
pawcih baban mou amynkhuhhua!
11 Ka liaccanung taraw, na mung tuh
haetapaw tui hawte accaw;
na lae kaw kya khoilutui te
mateitui a um;
na boeining nynh amynkhuhpaw tuh
Lebanon mynkhuhpaw te nynh aloku.
12 Ka ccianung, ka liaccanung taraw tuh
ccavyng khawpaw khokhu,
ccavyng khawpaw tuidy,
phang koihkhawpaw tuisung nynh thua.
13 Thingthae khokhu kya
um hae paw na thingku taraw hae tuh
ahoypaw thae athaepaw ccalee ku,
nard te pykuhpaw henna,
14 nard te saffron, kalamus te sinamon,
amynkhuhpaw thingku
miakaw nynh thua hae, mura te aloes,
mynkhuhhua hae paw miakaw a um hae.
15 khokhu khe tuidy, aluapaw tui,
Lebanon kyate yn luapaw
16 Pou thahlang khisan, thoku tua,
Pou deilang khisan, yn zawtua!
Ka khokhu luki yn zaw lah,
amynkhuhpaw kha
asawnaw lang na mung cih.
Ka sungsahpaw tuh
a khokhu kalan yn thua sah lah,
khokhu kya-e thingthae
ahoy huaccepaw kha ae sah.