2
Judah Siapharan lang David A Tang
1 Tukoute David nynh Bawipaw kha, “Judah ram e khua khuakhakheit kalan ka cceihthung cih tou?” cite a khia. Bawipaw nynh amaw kha, “Cceihthung” a cipya. David nynh, “Tei khua lang mou ka cceihthung cih?” a cipya. Aning nynh, “Hebron khua lang,” a cipya.
2 Tukeiccuze David tuh tuin khua langkhe a zu hae lu ning, Jezreel khuanung Ahinoam te Nabal nynh a chitawpaw nomaenung, Karmel khuanung Abigail ryte a cceihthung hae.Ref 2.2: 1Sa 25.42-43
3 David nynh a kya um hae paw kha mih innbyn raveih ryte cciakhae thung hae zah, Hebron khua pe umpaw khua hae kyakhe a um hae.
4 Te Judah ccungccaw hae tuh oun thua hae zah, tuin kyakhe David kha Judah siapharan lang chitui a thuh hae.
“Jabesh-gilead khuaccaaw hae nynh Saul rhua kha a uu hae,” cite David kha he a hopah hae te,Ref 2.4: 1Sa 31.11-13
5 David nynh Jabesh-gilead khuaccaaw hae kalan khe locceihtu hae kha saw hae zah, “Nanning nynh nae bawipaw Saul tungvaw kya lungzinaw na langsakuh oh zah a rhua kha na uu oh keiccuze Bawipaw nynh hythua ae pya vae oh sah!
6 Bawipaw nynh nae tungvaw kya atynpaw sungsahnaw te lungzinaw kha langsakuh vae sah! E rya hynh na law oh keiccuze kae nynh mah nae tungvaw hoynaw ka rae cih.
7 Tukeiccuze nae thawsae sah lah, nae rawthung sah; pawccecize nae bawipaw Saul tuh chih vae zah Judah hae nynh kae hynh siapharan lang chitui yn thuh vae hae,” cite bya a taw hae.
Ishbaal Israel Siapharan lang Tangnaw
8 Thuasalama Ner ccapaw Abner, Saul a rhawbawipaw nynh Saul ccapaw Ishbaal kha ko zah Mahanaim khua lang a cciakhae.
9 Abner nynh Ishbaal kha Gilead, Ashur, Jezreel, Efraim, Benjamin te Israel ram balyn kha a uktupaw siapharan lang a khang.
10 Saul ccapaw Ishbaal nynh Israel ram a uk takaw lya tuh kum sung pali acih vae, aning nynh kum ning a uk. Thuasalama Judah hae nynh tuh David kha a zui hae.
11 David tuh Hebron khua kya siapharan lang um zah Judah hae a uk ccyh tuh kum sari te sah taruh acih vae.
Gibeon Rhawtuknaw
12 Ner ccapaw Abner te Saul ccapaw Ishbaal a ryalahtu hae tuh Mahanaim khua kyate Gibeon khua lang a cceih hae.
13 Zeruiah ccapaw Joab te David a ryalahtu hae tuh cceih hae zah minmin ryte Gibeon tuili pe khe a tungkuh hae. Phu kheit tuh tuili voikheit lang raw kya haung hae zah ccangpaw phu kheit tuh tuili voikheih lang raw kya a haung hae.
14 Abner nynh Joab kha, “Ccangvae hae tuh malang pou hae sah lah, aening malang hin zuepaw taekuh hae sah,” a cipya. Joab nynh, “Ou, malang pou hae sah,” a ci.
15 Tukeiccuze malang pou hae zah a ccia lya hae khe a ria hae, Benjamin phin te Saul ccapaw Ishbaal hanlan lu haw lae ning pou hae zah, David a ryalahtu hae mah lu haw lae ning a pou hae.
16 Lu kheit cci nynh amaw a rhawpaw kha a lu te kyng zah a naw kha thaloi te a thuing; tukeiccuze pynkheihlan a khuliakuh hae. Tukeiccuze tuh-e hmin tuh Helkath-hazzumrim cite ko hae zah Gibeon kya a um.
17 Tuin nin kya thawte rhaw a tukkuh hae; David a ryalahtu hae nynh Abner te Israel hae kha a tae hae.
18 Zeruiah ccapaw hae lu thum, Joab, Abishai te Asahel tuh tuin kya a umbua hae. Asahel tuh ramkaw e sazuh hawte a liazaw.
19 Asahel nynh Abner kha voilang ranglang maeku leite a dee.
20 Tetuh Abner nynh nulang do zah, “Asahel tou na thua?” cite a khia. Aning nynh, “Ou, ka thua,” cite a khung.
21 Abner nynh amaw kha, “Na voilang khyhze na ranglang maekuh lah, ccangvae lukhakheit kha kyngte a uccaw kha luade tua,” a cipya. Thuasalama Asahel nynh ccanglang maeku leite amaw kha a deehui.
22 Abner nynh Asahel kha, “Nae deehuinaw kyate ccanglang maekuh; pawccemou nang kha laekhu kya kae khulia cih? Na upaw Joab malang khe pawtemou ka mae ka langsakuh ngan cih?” cite bua a hopya.
23 Thuasalama Asahel nynh ccanglang maekuh ry khyh. Tukeiccuze Abner nynh aning kha a ccoi dung te a vue kya thuing zah a ke lang po zua; tuin kya khuliakuh zah a chih. Asahel nynh khuliakuh zah a chinaw hmin kya a thuapaw balyn tuh a thadyn hae.
24 Thuasalama Joab te Abishai nynh Abner kha a deehui hae. Khuanin he a ccaw lyakhe Gibeon ramkaw lang ccianaw laanpi kya umpaw Giah khua a malang e Ammah mua kya a thua hae.
25 Benjamin phin hae tuh Abner kalan khe sueluakuh hae zah phu kheit lang umte mua dung khe thadynnaw hmin a tahkuh hae.
26 Tetuh Abner nynh Joab kha ko zah, “Aening hynh zungzae po douku lan tou? Athangnaw tuh myarya yn ccih cih cipaw na nyh khyh tou? Na ccungccaw hae tuh mih puizia hae deehuinaw kyate nulang a ki nawlan hae, hohseciamou kawpya lei hae te na um ung cih?” a cipya.
27 Joab nynh, “Pachia tuh a hiin thyhte, nang nynh tuhcite na ho khyh lanze, ka ccungccaw hae nynh mih puizia hae kha umtaw leite awkhualan awkhua cia po a deehui cih hae,” a cipya.
28 Joab nynh mungkae tu zah ccungccaw balyn nynh Israel hae deehuinaw kha umtaw hae zah rhaw mah tuk vae khyh hae.
29 Abner te a ccungccaw hae nynh azi zidae Arabah accya kha po zuate a cceih hae; Jordan vaw kha zuate awkhualan awkhua balyn tuh po cceih hae zah Mahanaim khua kya a thua hae.
30 Joab tuh Abner deehuinaw kyate a ki; te ccungccaw balyn kha he a pum hae tuh, David a ryalahtu hae kya-e Asahel holeite lu haw lae takua azo hae.
31 David a ryalahtu hae nynh Benjamin phin hae, Abner a ccungccaw hae za thum sung taruh kha a chia hae.
32 Asahel rhua kha lah hae zah Bethlehem khua umpaw a paaw shawku kya a uu hae. Joab te a ccungccaw hae tuh azi zidae cceih hae zah Hebron khua khe khua nynh a dae phaw hae.