23
David nynh Keilah Khua A Khum
1 “Filistin hae nynh Keilah khua kha tuk hae zah, huimin hae kha a luade hae,” cite David kya a hopya hae.
2 David nynh Bawipaw kha khia zah, “E Filistin hae hynh ccianuate ka tuk cih hae tou?” a cipya. Bawipaw nynh David kha, “Cceih lah, Filistin hae kha tuk hae lah, Keilah khua kha khumtua,” a cipya.
3 Thuasalama David kha a ccungccaw hae nynh, “Dotua, Judah ram kya heize ah rih oh; Keilah khua lang cciate Filistin rhawkaw hae kha tuk lanpaw tuh hohcihmou ri lan houh um vae?” a cipya hae.
4 Te David nynh Bawipaw kha bua khia zah, Bawipaw nynh, “Thokuh lah, Keilah khua lang cceihbung; pawccecize Filistin hae kha na kuih kalan kae pya cih,” a cipya.
5 Tukeiccuze David te a ccungccaw hae tuh Keilah khua lang cceih hae zah Filistin hae kha a tuk hae, mih sahiin hae kha lawpah hae zah minmin kha patae a chia hae. Tuhcite David nynh Keilah khuaccaaw hae kha a luesah hae.
6 Ahimelek ccapaw Abiathar nynh Keilah khua umpaw David kalan he a ccue tuh, ranpibawi angki zung kheit kha a ccyngbia.
7 Keilah khua kya David a thua cipaw kha Saul kya a hopya hae. Te Saul nynh, “Pachia nynh amaw kha ka kuih kya yn pya vae; pawccecize koikua te khawnawpaw thingccaw hae a hoipaw khua lungkhu lang teete amaw te amaw a khawsungkuh vae,” a ci.
8 Saul nynh ccungccaw balyn kha Keilah khua lang cciabungte David te a ccungccaw hae kha koihlu khylan te tuk khylan a ko hae.
9 Saul nynh a tungvaw hoyleinaw rae lan a paccyn vae cipaw kha David nynh he a nyh tuh, ranpibawi Abiathar kyakhe, “Ranpibawi angki kha hynhlang yn cciakhae,” a cipya.
10 David nynh, “Pou Bawipaw , Israel Pachia, na ryalahtupaw kae ka keiccuze Saul nynh Keilah khua lang cciate khua kha ro lan a paccyn cite ka thae.
11 Keilah khuaccaaw hae nynh kae hynh amaw kuih kalan yn ap cih hae tou? Na ryalahtupaw nynh ka thae hawte Saul tuh yn cceih cih tou? Pou Bawipaw , Israel Pachia, na ryalahtupaw hynh nae hopya nawlan kae ngiaku,” a cipya. Bawipaw nynh, “Saul tuh yn cceih cih,” a cipya.
12 Te David nynh, “Keilah khuaccaaw hae nynh kae te ka ccungccaw hae hynh Saul kuih kalan oun ap cih hae tou?” cite khia zah, Bawipaw nynh, “Nang kha ae ap cih hae,” a cipya.
13 Tetuh David te za taruh loukaw acih hae paw a ccungccaw hae tuh thokuh hae zah Keilah khua kyate a pou hae; a ccia khonaw hae miakaw langkhe a cceih hae. David tuh Keilah khua kyate a ccue vae cipaw kha Saul kya he a hopah hae tuh, ccia lanpaw kha a umtaw vae.
14 David tuh Zif Ramkaw e muaram kya, ramkaw e akhynnaw hmin kya a um. Saul nynh nin takyh a ccung zemah, Bawipaw nynh David kha a kuih kya pya khyh.
David nynh Saul A Sibia
15 David tuh Zif Ramkaw, Horesh kya a um lyakhe, Saul nynh a hiinnaw chia khylan a ccung cipaw kha a ny.
16 Saul ccapaw Jonathan tuh thokuh zah Horesh kya umpaw David kalan a cceih; tuin kyakhe aning nynh Bawipaw liate khynnaw a mue nawlan thawzung a pya.
17 Aning nynh David kha, “Rih nan; pawccecize ka paaw Saul a kuih nynh nang kha ae muih lan khyh; nang tuh Israel siapharan lang na tang cih zah, kae tuh nang ae zuipaw lu ningnaw ka thua cih; tuhte acyiku lanpaw tuh ka paaw Saul nynh mah a ny,” a cipya.
18 Te mih lu ning mawte Bawipaw malang khe byakinnaw kha a rae hae; David tuh Horesh kya um zah Jonathan tuh inn lang a ki.Ref 23.18: 1Sa 18.3
19 Te Zif khuaccaaw hae abang tuh Gibeah khua umpaw Saul kalan cceihthung hae zah, “David tuh kae ram lungkhu, Jeshimon khua alia lang umpaw Hakhilah mua vawlan, Horesh e akhynnaw hmin kya nynh a reku.Ref 23.19: Sam 54 (Abyalu)
20 Pou siapharan, na ccia ry ccyh kya yn cceihbung vae ii, aning kha siapharan kuih kalan pya lanpaw tuh kaening ryalaw nynh thua,” a cipya hae.
21 Saul nynh, “Ka tungvaw ngaethya nae umsah oh keiccuze Bawipaw nynh hythua ae pya vae oh sah!
22 Cceih oh lah, phe ria lan oun cyitua oh; a umnaw hmin te tuin kya hum nynh mou a muih cipaw kha phe ria lan oun dotua oh; pawccecize aning tuh myarya a thyaruh cite yn hopya hae.
23 A rekunaw hmin balyn kha akaw-aleih la do oh lah, phe ariapaw bya khate ka kalan nae ki cih oh. Te kamaw ryte ccia lan oh; ram lungkhu a um zetuh, Judah ccungccaw athong-asan hae laku kya aning kha ka ccung cih,” a ci.
24 Tukeiccuze minmin tuh thokuh hae zah Saul a ccia mawkhe Zif lang a cceih hae. David te a ccungccaw hae tuh Jeshimon alia lang, Arabah ram lungkhu, Maon ramkaw khe a um hae.
25 Saul te a ccungccaw hae tuh David ccung lan a cceih hae. David kha he a hopah hae tuh, aning tuh Maon ramkaw kya umpaw lungpi kalan cceihbung zah tuin kya a um. Tuh-e tuh Saul nynh a thae tuh, Maon ramkaw langkhe David kha a deehui.
26 Saul tuh mua voikheit langte cceih zah, David te a ccungccaw hae tuh mua voikheit langte a cceih hae. Saul te a ccungccaw hae nynh David te a ccungccaw hae kha kyng khylan a naeku lya hae khe, David tuh Saul kyate lue khylan a rangsakuh.
27 Te locceihtu lu kheit tuh Saul kalan yn thua zah, “Arangte yn cceih; pawccecize Filistin hae nynh ram kha a tuk vae hae,” a cipya.
28 Tukeiccuze Saul nynh David kha deehui leite umtaw zah, Filistin hae kha tuk khylan a ccianua hae; tukeiccuze tuh-e hmin tuh Luenaw Lungpi a ci hae.
29 David tuh tuin kyate cceih zah, En-gedi pee kya umpaw akhynnaw hmin kya a um.