21
David te Athyaapaw Sanlou
1 David tuh Nob khua e ranpibawi Ahimelek kalan a thua. Ahimelek tuh David te tungku lan thyngkute cceih zah, “Pawccemou lu kheit san umbua leite, na makhaete nae thua?” a cipya.Ref 21.1-6: Mat 12.3-4; Mar 2.25-26; Luk 6.3
2 David nynh ranpibawi Ahimelek kha, “Siapharan nynh ryalaw ccangkheit yn naw zah, ‘Kae nawpaw rya konglang hynh humhung nynh mah nyh nan sah,’ yn cipya. Tuin kya, khe kya tungku lan cite ccangvae hae kha ka hopya vae hae.
3 Tukeiccuze atu na kuih kya pawmou na hoi? Sanlou phe pangaw yn pyatua, tuhkhyhze hein kya a umpaw pawpaw zemah,” a cipya.
4 Ranpibawi nynh David kha, “Sanlou huataw tuh ka kuih kya ka hoi khyh, ccangvae hae nynh nopi hae kya a la sungku hae zetuh, athyaapaw sanlou tuh a um,” a cipya.
5 David nynh ranpibawi kha, “Rya ccangkhakheit hanlan ka ccia lya hawte nopi hae kha kae sungku ccaccing; khuaccong huatawnaw kya heize ccangvae hae uccaw tuh athyaa; mih uccaw tuh atunin thathy tuh hohcihmou houh athyaa vae cih?” a cipya.
6 Tukeiccuze ranpibawi nynh athyaapaw sanlou kha a pya; pawccecize tuin kyakhe Nungpyapaw sanlou laelan ccangpaw sanlou um khyh, tuh-e sanlou tuh sanlou thawpaw te rulae khylan law athua nin khe Bawipaw malang kyate nue athua vae paw nynh thua.Ref 21.6: Lev 24.5-9
7 Tuin nin khe Bawipaw malang khee athuapaw, Saul a ryalahtu hae kya-e lu kheitpaw tuh tuin kya a um; a min tuh Doeg acikuh, Edom minphuinpaw thua zah Saul a tuurin hae kya-e lupi nynh thua.
8 David nynh Ahimelek kha, “Na kya ccoi khyhze thaloi um khyh tou? Siapharan rya kha arangte law aho keiccuze ka thaloi thuasah, ka zunghe hae thuasah ka ccyngkuh khyh,” a cipya.
9 Ranpibawi nynh, “Elah accya kya na chiapaw Filistin paw Goliath thaloi tuh boei te lungdekuh zah ranpibawi angki nulang khe a um; na law ry ze lawkuh, khah-e laelan ccangpaw um khyh,” a cipya. David nynh, “Khah-e thaloi te alokuhpaw um khyh, yn pyatua,” a cipya.Ref 21.9: 1Sa 17.51
David Gath lang A Ccue
10 David tuh thokuh zah tuin nin khe Saul kyate ccue zah, Gath siapharan Akhish kalan a cceih.
11 Akhish a ryalahtu hae nynh amaw kha, “E paw hynh mih ram kya-e siapharan David kha thua khyh tou? Minmin nynh lawbia hae zah,
‘Saul nynh athong thong te,
David nynh athong-asan te
a chia hae,’ cite liakute
hlawsah khyh hae tou?” a ci hae.Ref 21.11: 1Sa 18.7, 29.5
12 David nynh hynh-e bya hynh pekite tua zah Gath siapharan Akhish kha myarya a rih.Ref 21.12: Sam 56 (Abyalu)
13 Tukeiccuze mih malang khe a umtu ziazae kha rulae zah, a muihnaw hae kyakhe a ngaeepaw hawte a umsaku. Aning nynh thuakaw hae kha varivarae hya zah, a tuing kha a khawming kyate a luisah.Ref 21.13: Sam 34 (Abyalu)
14 Akhish nynh a ryalahtu hae kha, “Dotua oh, e paw tuh a ngaeepaw nynh thua; pawccemou ka kalan nae thuakhae oh?
15 A ngaeepaw ka hoi khyh keiccu tou hynh-e paw hynh ka malang a ngaeenaw langsaku lan nae thuakhae oh? E paw hynh ka inn lungkhu lang a tee cih tou?” a cipya hae.