18
David te Jonathan Byakinkunaw
1 David nynh Saul kha bya he a hopah kou tuh, Jonathan thinlung tuh David thinlung kyakhe lungde thua zah, Jonathan nynh David kha amaw toulou hawte a sungsah.
2 Tuin nin khe Saul nynh David kha lawkuh zah a paaw inn lang ki lan ua vae khyh.
3 Jonathan nynh David kha amaw toulou hawte a sungsah keiccuze David ryte byakinnaw a rae.
4 Jonathan nynh a kikupaw boeining kha khahkuh zah a rhawtuk-uccaw, a thaloi, a li te a taeccia ryte David kha a pya.
5 Saul nynh a sawnaw takyh kya David tuh a laan a sui a ua; tukeiccuze Saul nynh aning kha rhawkaw hae uktu lang a nung. Ccungccaw hae balyn nynh thuasah, Saul a ryalahtu hae nynh heize thuasah David kha mih naw accah.
6 Inn lang a ki lya hae khe, David tuh Filistin paw a chianaw kyate yn ki lyakhe nopi hae tuh Saul Siapharan kha cciadue khylan hlawsahte, law biate, tyng te lungtuanaw hlawsahte, khuakupaw aphuinphuin kha khuakute Israel khua hae balyn kyate oun pou hae.
7 Nopi hae nynh lungpawnaw a rae lya hae khe,
“Saul nynh athong thong te,
David nynh accong ccong te
a chia hae,”
cite liakute hlaw a sah hae.Ref 18.7: 1Sa 21.11, 29.5
8 Saul tuh a thin myarya ria, pawccecize tuh-e bya nynh a lunghoysah khyh. Aning nynh, “David tuh athong-asan te a theih cite tua hae zah, kae tuh athong thong a theih cite yn tua hae; aning nynh peenaw laelan pawmou a hoi kho ung?” a ci.
9 Tuin nin te vae tuh Saul nynh David kha lunghiinnaw mit te a do-ih vae.
David Chia lan Saul Zuakunaw
10 Awkhualan khe Pachia kyate yn thuapaw muisaw hoyleipaw nynh Saul kha thuanua zah, a inn lungkhu khe lungmuanaw bya kha a ho, tuh ccyh lya tuh David tuh nin takyhte tintang leih a khua hawte a khua cciamang. Saul nynh a ccoi kha a kuih kya a ccyngku;
11 Saul nynh, “David kha pang kya ka bing cih,” cite tua zah ccoi te khoih salamah David nynh vae ning a lingku.
12 Bawipaw nynh Saul kha poutaw zah David kya a um keiccuze Saul nynh David kha a ripya.
13 Tukeiccuze Saul nynh a kyate David kha nue zah thong kheit uktu rhawbawi lang a nung, te rhawkaw hae malang khe leih pou zah leih a tee.
14 Bawipaw tuh a kya a um keiccuze David tuh a ryalaw miakaw kya a laan a sui a ua.
15 David tuh a laan a sui myarya ua cipaw kha Saul nynh a muih tuh, Saul tuh houh a rih vae.
16 Thuasalama Israel hae te Judah hae balyn nynh David kha a sungsah hae; pawccecize David tuh mih malang khe a pou a tee bungthungpaw nynh thua.
David te Mikhal Zuvaw Tang hae
17 Te Saul nynh David kha, “Hein kya ka ccanung atawccaw huapaw Merab a um; aning kha na zu lang kae pya cih; ka hanlan na rawthung sah lah, Bawipaw rhawtuknaw kha tuktua,” a cipya. Pawccecize Saul nynh, “Kamaw nynh ka kuih ka hangnua lan khyh, Filistin hae nynh aning kha theih hae sah,” cite a tua.
18 David nynh Saul kha, “Kae tuh siapharan a paeepaw lang tang lan ciate hummou ka thua? Ka puizia hae te ka paaw innbyn tuh Israel ram kya hummou athua hae?” a cipya.
19 Thuasalama Saul ccanung Merab tuh David kalan pya lan accan ccyh lyakhe, Meholah khuapaw Adriel zu lang a pya.
20 Saul ccanung Mikhal nynh David kha a sungsah. Tuh-e tuh Saul kha hopah hae zah a lungrythua.
21 Saul nynh, “Mikhal tuh aning hanlan kaang athua nawlan te Filistin hae kuih nynh aning kha a rawse nawlan, aning kha ka pya sah,” cite a tuaku. Tukeiccuze Saul nynh David kha vae ningnaw hopah zah, “Ka paeepaw lang na tang cih,” a cipya.
22 Saul nynh a ryalahtu hae kyakhe, “David kyakhe aphiruh lante, ‘Dotua, siapharan tuh na tungvaw lungtuanaw a hoi, a ryalahtu hae balyn nynh mah ae sungsah hae; tukeiccuze siapharan paeepaw lang tang ccavae,’ cite la hopah oh,” a cipya hae.
23 Tukeiccuze Saul a ryalahtu hae nynh tuh-e bya tuh David kha zya a hopya hae. David nynh, “Kae tuh a ryachipaw te sawtuanaw a ccou leipaw ka thuapaw hynh do oh lah, siapharan paeepaw lang tang lanpaw tuh azoipaw lang tou na ria oh?” a cipya hae.
24 Saul a ryalahtu hae nynh, “David nynh hynhte nynh aho,” cite Saul kha a hopya hae.
25 Tetuh Saul nynh, “David kha hynhte la hopah oh, ‘Siapharan nynh a rhaw hae tungvaw phulawnaw lante, Filistin hae vingdung za kheit laelan, ccangpaw kha a ccanung mee lang ry khyh,’ la cipah oh,” a cipya hae. Saul nynh David tuh Filistin hae kuih te chisah lan a paccyn.
26 Saul a ryalahtu hae nynh tuh-e bya tuh David kya he a hopah hae tuh, David tuh siapharan paeepaw lang tang lan myarya a lungrythua. Accyh alawe mawkhe,
27 David tuh a ccungccaw hae ryte thokute cceih hae zah Filistin hae za kheit kha a chia hae; David nynh mih vingdung tuh cciakhae zah siapharan paeepaw lang tang khylan siapharan kalan phe ccing lan a pya. Saul nynh a ccanung Mikhal tuh David kalan zu lang a pya.
28 Bawipaw tuh David kya a um cipaw te a ccanung Mikhal nynh David a sungsah cipaw kha Saul nynh he a nyh tuh,
29 David kha houh a rih vae. Tukeiccuze tuin ccyh kyate vae tuh Saul tuh David rhaw lang a tang vae.
30 Filistin rhawbawi hae tuh rhawtuknaw kalan atu te atu oun pou hae; David tuh Saul a ryalahtu hae balyn laeze taenaw a muehua, tukeiccuze a minthaannaw tuh houhouh ale.