15
Saul nynh Amalek hae Taenaw
1 Samuel nynh Saul kha, “A ccungccaw Israel hae uktu siapharan lang tang khylan nang kha chitui thuh lan Bawipaw nynh kae hynh yn saw; tukeiccuze atu Bawipaw bya hynh ngaetua.Ref 15.1: 1Sa 10.1
2 Vaaw Bawipaw nynh hynhte a ho, ‘Israel hae nynh Izip ram kyate a pou lya hae ze, minmin kha rawsete a doutu Amalek kha de ka tah cih.Ref 15.2: Exo 17.8-14; Deu 25.17-19
3 Atu la cceih lah, Amalek kha la tuk, mih hoipaw balyn kha khaleih la roh; minmin kha haang nan hae, nopi te pise, imua te nosi, tangnuapaw te tuu, kalauh te lann kha theih hae,’ a ci,” cite a hopya.
4 Tukeiccuze Saul nynh ccungccaw hae kha pum hae zah Telaim khua khe milu a ria hae, ccu rhawkaw cciing ning, Judah rhawkaw hae thong haw acih hae.
5 Saul tuh Amalek hae khua kya thua zah accya khe a buh hae.
6 Saul nynh Ken ccungccaw hae kha, “Cceih oh! Pou oh! Amalek hae kyate la cceih oh, minmin ryte kae rohbia sei cih oh; pawccecize Israel hae nynh Izip ram kyate a pou lya hae ze, minmin kha ngaethya na umsah oh,” a cipya hae. Tukeiccuze Ken ccungccaw hae tuh Amalek hae kyate a pou hae.
7 Saul nynh Amalek hae kha Havilah khua kyate Izip nithua lang umpaw Shur khua kyacia a tae hae.
8 Amalek siapharan Agag kha a hiin te a kyng, thuasalama ccungccaw balyn kha tuh thaloi te khaleih a ro hae.
9 Saul te ccungccaw hae nynh Agag te ahoy huaccepaw tuu, vaetua, athopaw tuutaw te ahoypaw uccaw balyn kha khaleih ro leite a haang hae; anyaapaw te ccungkia leipaw balyn kha tuh khaleih a ro hae.
Saul kha Siapharan kyate Vuanaw
10 Bawipaw bya tuh Samuel kalan yn thua zah:
11 “Saul kha siapharan lang ka la khangpaw tuh ka ngaesikuh, pawccecize kamaw zuinaw kyate maeleihkuh zah, kaw ka pya hae paw kha zui khyh,” a ci. Samuel tuh a thinria zah Bawipaw kalan azi zidae a sia.
12 Samuel tuh Saul te tungku khylan awkhua takaw te tho zah a cceih, te Samuel kyakhe, “Saul tuh Karmel khua lang cceih zah, ning leinawpaw lungbing kha a bingku, te po sulue zah Gilgal khua lang a cceih,” cite a hopya hae.
13 Samuel nynh Saul kalan he a thua te, Saul nynh amaw kha, “Bawipaw nynh hythua ae pya vae sah; Bawipaw nynh kaw yn pya thyhte ka cyi vae,” a cipya.
14 Thuasalama Samuel nynh, “Athua lanze, ka naw te ka thaepaw tuu a siapaw roi te vaetua a siapaw roi tuh pawmou athua?” a cipya.
15 Saul nynh, “Amalek hae kyate oun thuakhae hae paw nynh thua; pawccecize ccungccaw hae nynh ahoy huaccepaw tuu te vaetua kha Bawipaw na Pachia kalan silaw nawlan a haang hae; tuhlaepaw kha tuh khaleih kae ro,” a cipya.
16 Te Samuel nynh Saul kha, “Zya dae! Atazi Bawipaw nynh yn hopyapaw kha kae hopah cih,” a cipya. Aning nynh, “Hotua,” a cipya.
17 Samuel nynh, “Namaw na tuanaw kya adihpaw na thua zemah, nang tuh Israel minphuin hae lu na thua khyh tou? Bawipaw nynh Israel siapharan lang chitui ae thuh.
18 Bawipaw nynh rya ccangkheit law lan ae saw zah, ‘La cceih lah, misei hae, Amalek hae kha marya la roh hae, maemih athua mawlaezung hae la tuk hae,’ a ci.
19 Athua lanze, pawccemou Bawipaw bya kha na ngae khyh? Pawccemou rhaw hae kya-e luadepaw uccaw kha na lah kangmaw zah, Bawipaw muihnaw kya hoyleinaw kha na rae?” a cipya.
20 Saul nynh Samuel kha, “Bawipaw bya kha ka ngae, Bawipaw nynh yn sawnuathepaw ryalaw kha ka ccianua, Amalek siapharan Agag kha ka thuakhae zah, Amalek hae kha marya ka ro hae.
21 Thuasalama luadepaw uccaw kya-e tuu te vaetua, ro lanpaw uccaw hae kya-e ahoy huaccepaw kha Gigal khua kya Bawipaw na Pachia kalan silaw nawlan cite ccungccaw hae nynh a law hae,” a cipya.
22 Te Samuel nynh,
“Bawipaw bya zuinaw kyakhe
myarya a lungrythua hawte,
maee-ute silawnaw te
ccangpaw silawnaw hae kyakhe
Bawipaw tuh myarya
a lungrythua cih tou?
Thanccingte, kawngaenaw tuh
silawnaw laeze ahoyhua,
bya zuinaw tuh tuutepaw
atho laeze ahoyhua.
23 Pawccecize kaw-einaw tuh
pawepaw hawte seinaw le zah,
lungkhungnaw tuh
hoyleinaw te zohtuh
beiknaw hawte seinaw ale.
Bawipaw bya kha
na vua vae keiccuze
nang kha siapharan thuanaw kyate
ae vua vae,” a cipya.
24 Saul nynh Samuel kha, “Ka sei vae; ccungccaw hae kha ka rih hae zah mih bya ka ngae keiccuze Bawipaw kawbya te na bya kha ka eisei vae.
25 Tukeiccuze atu, ka seinaw yn ngaethya lah, Bawipaw kha ka beik ccaw, kamaw te kikheih sih, cite kae ngiaku,” a cipya.
26 Samuel nynh Saul kha, “Nang te kikheih lei lan; pawccecize Bawipaw bya kha na vua zah, Bawipaw nynh nang kha Israel siapharan thuanaw kyate ae vua vae,” a cipya.
27 Samuel nynh ccia lan vae cite a maeleihku lyakhe, Saul nynh a boei dung apaki kha kyng zah thoh seiikuh.Ref 15.27-28: 1Sa 28.17; 1Si 11.30-31
28 Te Samuel nynh Saul kha, “Bawipaw nynh Israel peenaw kha na kyate atunin ccaccei hin thoh seii vae zah, nang laeze ahoy huapaw na innpaw kalan a pya vae.
29 Tuhpiaze, Israel Phu-enaw Pachia nynh tuh hynbya ho lan khyh zah a tuanaw mah paleihkuh lan khyh, aning tuh ccungccaw thua khyh zah a tuanaw mah paleihkuh lan khyh,” a cipya.
30 Te Saul nynh, “Ka sei vae; tuhzemah ka ccungccaw hae kya-e piccan hae malang te Israel hae malang kya sawtuanaw yn pya lah, Bawipaw na Pachia kha ka beik ccaw, kamaw te kikheih sih,” a cipya.
31 Tukeiccuze Samuel tuh Saul nulang a zuikuh; te Saul nynh Bawipaw kha a beik.
32 Tetuh Samuel nynh, “Amalek hae siapharan Agag kha hynhlang ka kalan yn cciakhae oh,” a ci. Te Agag tuh rarymamaw lante Samuel kalan a cceih. Agag nynh, “Thanccingte, e hynh myarya ccihpaw chinaw nynh thua,” a ci.
33 Thuasalama Samuel nynh,
“Na thaloi nynh nopi hae kha
ccaaw leite a nung hae hawte,
na nung tuh nopi hae kyaze
ccaaw leite a um cih,”
a cipya. Te Samuel nynh Agag kha Gilgal khua Bawipaw malang khe zoihtatyh lan a bae.
34 Te Samuel tuh Ramah khua lang a cceih; Saul tuh Gibeah khua kya umpaw amaw inn lang a cceih.
35 Samuel nynh Saul kha a chi makhia muih vae khyh, thuasalama Samuel tuh Saul elang a ngaethah. Bawipaw nynh Saul kha Israel siapharan lang a la khang keiccuze a ngaesikuh.