7
1 Kawbya a nyh hae paw uno hae, nae kalan kae hopya oh. Kawbya nynh ccungccaw lu kheit kha a hiin lungkhu kyalya nynh a uk cipaw na nyh khyh oh tou?
2 Pawccecize tungtuh vae paw nopinung tuh a vawpaw a hiin lungkhu balyn kawbya liate a vawpaw kya heede athua; thuasalama a vawpaw tuh a chi lanze a vawpaw te asekuhpaw kawbya kyate aning tuh a lue.
3 Tukeiccuze a vawpaw phang a hiin lyakhe ccangpaw pise te a umkheih hae ze, aning tuh vawpaw tungvaw a ohhuakuhnung cite ko athua cih; thuasalama a vawpaw tuh a chi ze, aning tuh tuh-e kawbya kyate a lue, tukeiccuze pise ccangpaw te a umkheih hae zemah vawpaw tungvaw ohhuakuhnung thua vae khyh.
4 Tuhawte ka uno hae, nanning mah Khri pyn liate Kawbya kya na chih vae oh; tuh-e tuh chinaw kyate a thoothuipaw, mingccangpaw Khri te a sekuh hae paw na thua oh zah Pachia hanlan athae ah thae nawlan oh nynh thua.
5 Pawccecize pynsaw kya ah hiin lya oh tuh, Kawbya keiccu yn langkuhpaw sei rynaw thinlung nynh chinaw hanlan athae poukhae khylan aening ah pyn kya-e hae kyakhe rya a law.
6 Thuasalama atu tuh aening oun khiipaw Kawbya kya ah chih vae oh zah tuh-e Kawbya kyate ah lue vae oh; tukeiccuze azeikuhpaw Kawbya rynpaw kya thua leite, Muisaw kya-e hiinnaw thawpaw kya rya ah lah cih oh.
Kawbya te Seinaw
7 Tuhteze pawte ah ho cih oh? Kawbya tuh a sei tou? Tuhte thua khyh! Kawbya a la um khyh ze, seinaw hynh ka nyh lan khyh. Pawccecize Kawbya nynh, “Na duaa lan khyh,” cite a la ho khyh ze, kae tuh duaanaw kong hynh ka la nyh lan khyh.Ref 7.7: Exo 20.17; Deu 5.21
8 Thuasalama seinaw nynh kawbya liate ccyhhoy mue zah ka lungkhu kya duaanaw aphuinphuin balyn kha a poukhae; pawccecize Kawbya a um khyh ze seinaw tuh a chih.
9 Langmawlya tuh Kawbya leite nynh ka la hiin, thuasalama kawbya he yn thua te, seinaw tuh yn hiin zah kae tuh ka chih.
10 Hiinnaw pya lan bya yn kinpakuhpaw Kawbya nynh ka hanlan chinaw yn thuakhaepaw kha ka muih.
11 Pawccecize seinaw tuh Kawbya liate ccyhhoy mue zah kae kha yn ling, te tuh-e Kawbya liate kae kha yn chia.Ref 7.11: Gen 3.13
12 Tukeiccuze Kawbya tuh athyaa, phungbya mah athyaa, ding zah ahoy.
13 Tuhteze ahoypaw nynh kae kha chinaw tou yn thuakhaepya? Tuhte thua khyh! Ka kalan chinaw yn thuakhaepaw tuh seinaw thua zah, seinaw nynh seinaw athuanaw zia kha langsaku khylan ahoypaw uccaw kha a mang; tuhcite seinaw tuh Kawbya liate myaryamaw seinaw alungpaw lang a tang.
Thinlung kya Lungriathaenaw
14 Pawccecize Kawbya tuh muisaw lante asekuhpaw nynh thua cipaw ah ny oh; thuasalama kae tuh pynsaw ccungccaw ka thua zah, seinaw see lang zuapaw nynh ka thua.
15 Ka cyipaw kha ka thaethya khyh. Ka cyi rypaw kha ka cyih khyh, ka huapaw kha nynh ka cyi.Ref 7.15: Gal 5.17
16 Tuhte ka ry leipaw kha ka cyi ze, Kawbya tuh ahoy cite ka nawccawkhae.
17 Tuhteze atu tuh-e a cyihpaw tuh kamaw ka thua vae khyh, ka lungkhu kya umpaw seinaw nynh a cyih.
18 Pawccecize ka lungkhu, ka chiisaw kya ahoypaw kharouh um khyh cipaw ka ny; pawccecize ahmepaw cyi rynaw thinlung tuh ka lungkhu kya um salamah tuh-e tuh ka cyih kho khyh.
19 Pawccecize ka cyi rypaw ahoypaw kha ka cyih khyh, ka cyi ry leipaw ahoy leipaw kha nynh ka cyi.
20 Ka cyi ry leipaw kha atu ka cyi lan athua ze, tuh-e a cyihpaw tuh kamaw ka thua vae khyh, ka lungkhu umpaw seinaw nynh a cyih.
21 Tuhte ahoypaw ka cyi ry lyakhe ahoy leipaw tuh ka pe kya a um cite kawbya ccangkheit ka muih.
22 Kae tuh ka thinlung kya Pachia Kawbya kyakhe ka lungrythua.
23 Thuasalama ka pyn kya-e hae kya ccangpaw kawbya kha ka muih, tuh-e kawbya nynh ka thinlung kya-e kawbya kha rawse zah, ka pyn kya-e hae kya umpaw seinaw kawbya kalan khe yn kyng zah yn cciakhae.
24 Kae hynh pawcih ngaethya lan umpaw ccungccaw mou ka thua! Hynh-e chinaw pyn kyate hum nynh mou yn luesah cih?
25 Ah Bawipaw Jesu Khri liate yn luesahtupaw Pachia kya thehoynaw um sah!
Tukeiccuze ka thinlung tetuh Pachia Kawbya kha ka zui, thuasalama ka pynsaw lante tuh seinaw kawbya kha nynh ka zui.