ROM HAE
KALAN PAUL CCAKY
Romans
Rom hae kalan Paul Ccaky tuh Paul nynh Rom Khriccaawbuu kalan khuaccong a ry keiccuze laanpi a sahku typaw nynh thua. A paccynkunaw tuh tuin kya-e Khriccaaw hae kya sosoh ryalawsya koute mimaw bawmnaw liate Spain ram lang sulue lanpaw kha nynh athua. Khriccaaw zynnaw te tuh-e zynnaw kha Khriccaaw hae hiinnaw kya asuilan a um lanpaw te mang lan cipaw kha amaw a nynaw thyhte ccaesahpya nawlan a zeipaw nynh thua. Hynh-e ccauh lungkhu kya Paul nynh phunghopaw atungpi balyn accing lante a um.
Rom khua e khriccaawbuu kha a beihlang kou hae te mih hanlan saw a sangpyanaw hae a hopyanaw hae paw te Paul ccaky nynh a paccynpaw tuh: “Pachia nynh pawcitemou amaw te a ccungccaw hae laku kya ccawkunaw a rae cipaw kha thehoypaw nynh a langsaku. Tuh-e tuh athonaw te athangnaw cia zynnaw liate nynh thua,” cipaw kha a ho (1.17).
Tuinte Paul nynh a paccynkunaw kha accing lante a langsaku. Juda hae thuasah, Zenta hae thuasah, ccungccaw miakaw Pachia te ccawku myarya aho, pawccecize ah balynte seinaw zakaw nynh marya ah um oh. Ccungccaw hae tuh Jesu Khri zynnaw liate nynh Pachia te ccawsaku athua. Pachia ryte kyngkunaw liate hiinnaw thawpaw kyate yn poupaw Khri ryte kyngkunawpaw hiinnaw thawpaw kong kha bua a ho. Zyntu tuh Pachia ryte daenaw hoi hae zah Pachia Muisaw liate chinaw te seinaw zakaw kyate a luesah vae. Byaria 5-8 lungkhu kya Paul nynh zyntu hiinnaw kya Pachia Kawbya te Pachia Muisaw huhan paccynnaw kong kha a ho. Tukoute Pachia nynh ccungccaw hanlan a paccyn typaw lungkhu lang pawcitemou Juda hae te Zenta hae a teethya cih hae cipaw byakhianaw a tung. Juda hae nynh Jesu a vua hae paw hynh zemah ccungccaw balyn Pachia thawccinaw Jesu Khri kya thuasahnaw lanpaw Pachia paccynnaw ccangkheit thuabua zah Juda hae nynh Jesu tuh zungzae vua khyh hae cite a zynnawpaw kha mah a ho. Athangnaw kya Paul nynh pawcitemou Khriccaaw hae hiin lan cipaw kong, alae lante ming hae ryte ccuepekunawpaw sungsakunaw kong kha a zei. Hynh-e hae balyn tuh Pachia ryalawpaw nynh thua cite tho zah Khriccaaw hae nynh accozah te lu kheit te lu kheit tungvaw kya rya hoi zia te thyahoy laesahnaw te kyngkuh zah byakhianaw cia a langsaku. Pachia thehoysahnaw bya hae te lu raveih phunghonaw hae ryte a ccaky a thangsah.
1
1 Jesu Khri seepaw, Pachia thehoypaw hanlan thoh phia thua zah locceihtu lang ko athuapaw kae, Paul nynh ccaw kae ky oh.
2 Tuh-e thehoypaw tuh a profeh hae liate athyaapaw Ccathyaa hae kyakhe langmawpi te bya phe la kinty vae paw nynh thua.
3 Tuh-e thehoypaw tuh Pachia Ccapaw, ah Bawipaw Jesu Khri konglang thua zah pynsaw lante David ciihan kyate yn puipaw nynh thua.
4 Thyaanaw kya-e muisaw lante ho lanze, chinaw kyate a thoothuinaw liate Pachia Ccapaw athuanaw kha athungpaw huhan te phy athua vae.
5 Zenta hae balyn kya amaw min hanlan zynnaw te asekuhpaw kawngaenaw a um nawlan thawccinaw te locceihtu thuanaw kha amaw liate kae mue vae.
6 Tuh-e hae laku kya nanning mah Jesu Khri kya-e thua khylan kopaw nynh na thuabua oh.
7 Pachia nynh sungsah hae zah mithyaa hae lang ko na thua oh paw, Rom khuaccaaw hae nae balyn tungvaw kyakhe ah Paaw Pachia te Bawipaw Jesu Khri kyate oun thuapaw thawccinaw te daenaw tuh la um vae sah.
Lungtua Sawsangnaw
8 Nae zynnaw tuh laephi pynpi kya siakhae athua keiccuze nae balyn hanlan Jesu Khri liate ka Pachia kha masaty ka luung.
9 A Ccapaw kya-e thehoypaw kha hote ka thinlung balyn te rya ka lawpyapaw Pachia tuh ka sawsangnaw kya nanning kha zungzae kae lia oh cipaw a nyhtu ka ccaekia nynh thua.
10 Pachia nynh a ry zetuh ccyhkhakheit kya pawpawte thua zemah nae kalan khuaccong lan saw ka sangkuh.
11 Pawccecize nae thawzung tynsahnaw lanpaw muisaw lasung abang kha neethung khylan myarya kae muih ry oh.
12 Tuh-e tuh nanning te kae nynh zynnaw raveih khate thawzung ah pyaku kalang ccaw oh cipaw nynh thua.
13 Uteno hae, ccangpaw Zenta hae laku kya athae abang ka mue hawte nanning laku kya mah athae abang mue khylan nae kalan ccia lan palei ka noukuh cipaw nysah kae ry oh, thuasalama atu cia yn khawpaw palei a um.Ref 1.13: Loc 19.21
14 Kae tuh Grik hae te apuathopaw ccungccaw hae kya thuasah, a hawpaw te a ngaeepaw kya thuasah parouh mawte laebah umtu nynh ka thua.
15 Tukeiccuze Rom khua kya na um oh paw kalan mah thehoypaw phy lan lungthote ka um.
Thehoypaw A Thungnaw
16 Pawccecize kae tuh thehoypaw hanlan ka maethah khyh; pawccecize thehoypaw tuh a zynpaw ccungccaw miakaw hanlan khumnaw mue nawlan Pachia thungnaw nynh thua, masaty lan Judah hae hanlan thua zah tukoute Grik hae hanlan mah athuabua.Ref 1.16: Mar 8.38
17 Pawccecize, “Adingpaw ccungccaw tuh zynnaw liate nynh a hiin cih,” cite azeiku hawte, tuh-e zynnaw kya nynh Pachia kya-e dingnaw tuh zynnaw kyate zynnaw kalan langsahpya athua vae.Ref 1.17: Hab 2.4
Ccungccaw hae Seimenaw
18 Pachia thinrianaw tuh vaawlang te yn langkuh zah, byading a khawtu hae paw kya-e dingleinaw te Pachia pawlangria leinaw balyn kha a rawse.
19 Pawccecize Pachia konglang ny khonaw kha Pachia nynh minmin kya a langsah vae keiccuze tuh-e tuh minmin kya phe a langkuh vae.
20 Laephi raenaw kyate tho zah Pachia kya-e muih kho leipaw zungzae atynpaw thungnaw te Pachia thuanaw kha a raepaw uccaw hae liate thaethya thua vae zah muih kho athua vae, tukeiccuze minmin tuh ngaethya kho thua lan khyh hae;
21 pawccecize minmin nynh Pachia phang nyh hae pite, Pachia kha sawtua lan accan thyhte sawtua khyh hae, luung mah luung khyh hae, mih tuakunaw tuh accakaepaw lang tang zah tuanaw hoi leipaw mih thinlung tuh mohnaw te phe abeih.Ref 1.21: Efe 4.17-18
22 Minmin nynh kae haw cikuh hae zah mingaee lang nynh a tang hae;
23 arohthya leipaw Pachia phu-enaw kha arohthyapaw ccungccaw, pavaw, ccupali saepaw loramsaw te avawpaw loramsaw muinsan lang raepaw zohtuh hae te a rulae hae.Ref 1.23: Deu 4.16-18
24 Tukeiccuze Pachia nynh mah minmin kha mimaw te mimaw laku kya mih pyn kha thethyasah khylan mih thinlung kya-e duaanaw thyhte anungsikuhpaw kalan a ap hae.
25 Minmin nynh Pachia byaccing kha hynbya lang a paleih hae, Raetu Pachia laeze raepaw uccaw kha beik hae zah rya a lawpya hae. Tuh-e Raetu Bawipaw tuh zungzae thehoysah athua! Amen.
26 Hynh-e keiccuze Pachia nynh minmin kha maethya lan umpaw chiisaw rynaw kalan a ap hae, pawccecize mih nopi hae nynh aphung thyhte ikheihnaw kha vua hae zah aphung thua leipaw ikheihnaw kha a mang hae;
27 tuhawte pise hae nynh mah nopi te aphung thyhte ikheihnaw kha vua hae zah, pise te pise mih chiisaw rynaw tuh maee lang arua. Pise te pise nynh maethya lan umpaw kha a cyi hae keiccuze mih cyiseinaw thyhte detahnaw kha a mue hae.
28 Minmin nynh Pachia kha a ny ry khyh hae keiccuze Pachia nynh athahpaw thinlung kalan ap hae zah minmin nynh angaekuh leipaw uccaw hae kha a cyi hae.
29 Minmin tuh hoyleinaw aphuinphuin, athahpaw, karankunaw, othyanaw, eiungnaw, ccungccaw chianaw, pekumaekunaw, lingkunaw, thyaruhnaw, thanhonaw te phe abeih hae,
30 thethya hotu hae, Pachia a huatu hae, a bunglepaw, a tansakuh hae paw, a pookuh hae paw, ahoy leipaw uccaw raetu hae, nungpaaw kawngae lei hae paw,
31 a ngaee hae paw, lungzi lei hae paw, thawccinaw hoi lei hae paw, rysawthah hae paw nynh thua hae.
32 Hynhcihawpaw uccaw hae a cyih hae paw tuh chi lan accan hae cipaw Pachia byapianaw kha phang a nyh hae pite hynh-e uccaw hae hynh a cyi hae apiaze hynhcihawpaw a cyih hae paw kha thaw a pya hae.