20
Moab hae te Ammon hae Taenaw
1 E koute Moab hae te Ammon hae nynh Meunim hae abang ryte Jehoshafat kha tuk lan a ccianua hae.
2 Locceihtu hae nynh oun thua hae zah Jehoshafat kha, “Edom ram kyate, rili khuraw langte ccungccaw zapi patae tuh nang kha tuk khylan oun cceih hae zah Hazazontamar kya nynh a um hae,” cite a hopya hae (tuh-e tuh En-gedi nynh thua).
3 Jehoshafat tuh rih zah Bawipaw kha ccung khylan paccynkuh zah Judah ram pynpi kya looh-ae sung lan a thaesah hae.
4 Judah hae balyn tuh Bawipaw bawmnaw kha mue khylan a pumkuh hae; Judah ram e khua hae balyn kyate Bawipaw kha ccung khylan a thua hae.
Jehoshafat Sawsangnaw te Taenaw
5 Jehoshafat tuh Bawipaw inn, voidu thawpaw malang, Judah hae te Jerusalem khuaccaaw hae a pumkuh hae paw kyakhe thadyn zah,
6 “Pou Bawipaw , kae minpaaw hae Pachia, nang tuh vaawlang umpaw Pachia na thua khyh tou? Minphuin hae kya-e ram hae balyn tuh nang nynh na uk khyh tou? Humhung nynh mah ae khee ngan khyh nawlan, na kuih kya huhan te thungnaw a um.
7 Pou kae Pachia, nang nynh e ram kya um hae paw kha na ccungccaw Israel hae malang te na dee hae zah na banpaw Abraham ciihan hae kha zungzae na pya khyh hae tou?Ref 20.7: Isa 41.8; Jas 2.23
8 Minmin tuh e ram kya um hae zah na min hanlan beikinnthyaa kha sak hae zah,
9 ‘Hoyleinaw, thaloi, byapianaw, shethya te ccakannaw nynh kae tungvaw oun thuanua ze, e inn malang te namaw malang kae thadyn cih, pawccecize na min tuh e inn kya um zah kaening nynh kae riathaenaw kyate namaw kalan kae sia cih, te nang nynh nae thaepah cih zah nae bawm cih,’ a ci hae.
10 Atu dotua, Israel hae nynh Izip ram kyate a ccia lya hae ze, tuknaw kaw na pya khyh hae zah Israel hae nynh sibiate a ro lei hae paw Ammon hae, Moab hae te Seir Mua e ccungccaw hae nynhRef 20.10: Deu 2.4-19
11 rho lang nae pyapaw ram kyate kaening hynh dee lan oun ccianua hae zah liaru lan oun paccynnuaku hae.
12 Pou kae Pachia, minmin tungvaw bya na pia lan khyh hae tou? Pawccecize kaening dou khylan oun ccianuatu hae hynh-e ccungccaw zapi patae rawse nawlan thawzung kae hoi khyh. Pawte cyi lan kae nyh khyh, namaw rou nynh kae do vae,” a ci.
13 Tuh lyatuin Judah hae balyn tuh imua hae, mih zu mih ccaaw hae ryte Bawipaw malang khe a thadyn hae.
14 Tetuh Bawipaw muisaw tuh a pumkuh hae paw laku kya umpaw Jahaziel tungvaw kya a thua; aning tuh Zekhariah ccapaw, Zekhariah tuh Benaiah ccapaw, Benaiah tuh Jeiel ccapaw, Jeiel tuh Mattaniah ccapaw, Mattaniah tuh Levi phin, Asaf ccapaw hae ciihan nynh thua.
15 Jahaziel nynh, “Judah hae balyn, Jerusalem khuaccaaw hae te Siapharan Jehoshafat, ngaetua oh: Bawipaw nynh hynhte ae hopya oh: ‘E ccungccaw zapi patae hae hynh rih nan oh, nae bungzou nan sah; pawccecize rhawtuknaw tuh nanning kya-e thua khyh, Pachia kya-e nynh thua.Ref 20.15-17: Deu 20.1-4
16 Awkhualan minmin kha tuk khylan ccianua bung oh; minmin tuh Ziz kaethungnaw laanpi kyate oun cceihthung cih hae; Jeruel ramkaw athonaw, accya athangnaw khe na la muih cih oh.
17 Pou Judah hae te Jerusalem khuaccaaw hae, e rhawtuknaw tuh nanning nynh tuk lanpaw thua khyh; nae umnaw kya phang thadyn oh lah, naemaw ccelang Bawipaw nynh ae taepya oh paw kha do oh,’ a ci. Rih nan oh lah, nae bungzou nan sah; awkhualan minmin kha ccianua oh lah, Bawipaw tuh nae kya a um cih,” a cipya hae.Ref 20.17: Exo 14.13-14
18 Te Jehoshafat tuh laekhu kya bakhung zah Judah hae te Jerusalem khuaccaaw hae balyn tuh Bawipaw malang bakhung hae zah Bawipaw kha a beik hae.
19 Levi phin Kohath hae te Korah hae tuh Bawipaw , Israel Pachia kha thehoysah khylan myarya ccae lan roisaw hae zah a thadyn hae.
20 Awkhua takaw te tho hae zah Tekoa ramkaw lang a cceih hae; a ccia lya hae khe Jehoshafat nynh thadyn zah, “Pou Juda hae te Jerusalem khuaccaaw hae balyn, ka bya hynh ngaetua oh! Bawipaw nae Pachia kha zyn oh lah, tynkaring lan na thadyn kho cih oh; a profeh hae kha zyn oh lah, nae laan nae sui a ua cih,” a cipya hae.
21 Ccungccaw hae kha tuanaw a ngia kou hae te, rhawkaw hae malang a ccia lya hae khe,
“Bawipaw kalan
lungtuabya hotua oh,
pawccecize atynpaw
a sungsahnaw tuh zungzae atyn,”
cite Bawipaw kalan hlaw a sah cih hae paw te athyaapaw ccaankunaw te the a hoysah cih hae paw kha a nung hae.
22 Minmin nynh hlawsahnaw te thehoysahnaw kha he a tho hae tuh, Judah hae tuk khylan oun ccianua hae paw Ammon hae, Moab hae te Seir Mua e ccungccaw hae kha rawsete Bawipaw nynh buhkhawtu hae a nungnua hae keiccuze minmin tuh rhaw a shung hae.
23 Pawccecize Ammon hae te Moab hae nynh Seir Mua e ccungccaw hae kha tuk hae zah marya a ro hae; Seir kya um hae paw kha he a thangsah hae te, mimaw te mimaw tukkuh hae zah pong a chih hae.
24 Judah hae tuh ramkaw e rhawvianaw innhangpaw kya a thua hae te, ccungccaw zapi hae kha a do hae; tuh-e hae tuh lu kheit san lue leite, laekhu kya ahuekuhpaw michi rhua lang a tang hae.
25 Jehoshafat te a ccungccaw hae nynh rhaw hae kya-e luadepaw uccaw kha lawku lan he a cceih hae tuh, sahiin patae, uccaw hae, boeining hae te aphutepaw uccaw hae kha muih hae zah a phu kho lei lan hae ciate a lawku hae. Luadepaw uccaw tuh myarya alung keiccuze a lawnaw hae nin thum cia a rokhaekuh hae.
26 Nin palinaw nin khe Berakah Accya kya pumkuh hae zah Bawipaw kha the a hoysah hae; tukeiccuze tuh-e hmin tuh atunin cia Berakah Accya a ci hae.
27 Tetuh Judah hae te Jerusalem khuaccaaw hae balyn tuh Jehoshafat nynh malang cciapah hae zah lungpawte Jerusalem lang a ki hae, pawccecize Bawipaw nynh mih rhaw hae kha taepah hae zah mih lungpawsah hae.
28 Tintang, tang-oi khuakute mungkae tu hae zah Jerusalem lang, Bawipaw inn lang a cceih hae.
29 Bawipaw nynh Israel rhaw hae a tuk hae cipaw kha ram takyh e peenaw hae balyn nynh a thae hae tuh, Pachia raw kha a rih hae.
30 A Pachia nynh teitei langte balyn daenaw a pya keiccuze Jehoshafat peenaw tuh adae.
(1Si 22.41-50)
31 Tuhcite Jehoshafat nynh Judah ram kha a uk. Jehoshafat tuh sung thum kum pangaw he acih te, ram kha uk takaw zah, Jerusalem khua kya kum kuin lae pangaw a uk. A nung min tuh Azubah cikuh zah Shilhi ccanung nynh thua.
32 Aning nynh a paaw Asa laanpi kha zui zah tuh-e laanpi kyate cciasei leite, Bawipaw muihnaw kya ahmepaw kha a rae.
33 Tuhzemah ahangpaw hmin hae kha roh khyh hae; ccungccaw hae nynh mih minpaaw hae Pachia tungvaw kya mih thinlung kha nung loh khyh hae.
34 Tuhlaepaw Jehoshafat nynh rya a lawpaw kha atakaw te athangnaw cia a cyipaw balyn tuh Hanani ccapaw Jehu nynh a zeipaw Phungpaw ccauh kya zei hae zah, tuh-e tuh Israel Siapharan hae Ccauh kya a ccakhung hae.
35 E koute Judah siapharan Jehoshafat tuh hoyleinaw a raetupaw Israel siapharan Ahaziah ryte ccawkunaw a rae hae.
36 Tarshish khua lang a cceih cih paw sanphalung hae kha a raekheih hae; Eziongeber kya sanphalung hae kha a rae hae.
37 Te Mareshah khua umpaw Dodavahu ccapaw Eliezer nynh Jehoshafat kha rawsete profehbya ho zah, “Ahaziah ryte na mungku oh keiccuze na rae vae hae paw kha Bawipaw nynh a roh cih,” a ci. Te sanphalung hae tuh roh hae zah Tarshish khua lang cceih kho vae khyh hae.