28
Beikinn A Sak cih paw Solomon
1 David nynh Israel bawi hae balyn, mih phin raveih kya-e bawi hae, siapharan rya a lahpaw aphu hae kya-e bawi hae, ccungccaw athong uktu rhawbawi hae, aza uktu rhawbawi hae, siapharan te a ccapaw hae uccaw te sahiin hae balyn a do-oihtu hae, siapharan inn bawi hae, athungpaw rhawkaw hae te mih rawthung hae paw balyn kha pynkheihlan a pum hae.
2 Te David siapharan nynh thadyn zah: “Ka uno hae te ka ccungccaw hae, ngaetua oh. Bawipaw byakin thingkua hanlan te ah Pachia ccu a synaw hanlan haeungnaw inn kha sak lan ka paccyn vae; tuh-e inn saknaw hanlan ka paccyn kou vae.Ref 28.2-7: 2Sa 7.1-16; 1Sh 17.1-14
3 Thuasalama Pachia nynh kae kha, ‘Nang nynh ka min hanlan inn na sak lan khyh, pawccecize nang tuh rhawkaw na thua zah chiise na luasah,’ yn cipya.
4 Bawipaw , Israel Pachia nynh kae hynh ka paaw puizia hae balyn kyate Israel a uktu siapharan lang zungzae tang khylan yn po; pawccecize Judah kha cciakhaetu lang a po, te Judah innbyn hae kyaze ka paaw innbyn hae kha po zah ka paaw ciihan hae kyaze kae hynh a lungrythua zah Israel hae balyn a uktu siapharan lang yn rae.
5 Bawipaw nynh ccapaw patae yn pya zah, ka ccapaw hae balyn kyaze ka ccapaw Solomon tuh Israel kha ukte, Bawipaw peenaw bawitungkhung vawlan haung lan a po vae.
6 Bawipaw nynh kae kha, ‘Ka inn te ka voidu a saktu tuh na ccapaw Solomon nynh athua cih, pawccecize amaw kha ka ccapaw lang ka po vae zah kae tuh a paaw ka thua cih.
7 Aning nynh ka kawbya hae te ka phungzae hae kha atunin a zui hawte tynkaring lan po a zui zetuh a peenaw kha zungzae ka tynsah cih,’ a ci.
8 Tukeiccuze nanning nynh e ram hoypaw hynh na ccou oh zah naemaw koute nae ccaaw hae elang rho lang zungzae na nungpya sya nawlan oh, Israel hae balyn, Bawipaw ccungccaw zapi balyn muihnaw te ah Pachia a thaenaw kyahin, Bawipaw nae Pachia kawbya balyn kha ccung oh lah zui oh.
9 “Te nang, ka ccapaw Solomon, na paaw Pachia kha nyh lah, tuanaw ccangkheit te thinlung ccaccing te amaw rya kha lawtua; pawccecize Bawipaw nynh tuh tuanaw miakaw kha akaw-aleih muih zah, paccynpaw te tuanaw miakaw kha phe a ny. Amaw kha na ccung zetuh na muih cih; thuasalama amaw kha na vua zetuh nang kha zungzae ae vua cih.
10 Raeringkuh, pawccecize Bawipaw nynh nang kha beikinnthyaa lanpaw inn kha sak lan ae po vae; na thawsaesakuh lah, ryalawtua,” a cipya.
11 Tetuh David nynh a ccapaw Solomon kha beikinn tee takawnaw akhaan, a inn hae, sisuakhaan hae, palung khaan hae, alungkhu lang e akhaan hae te byakin thingkua ahu nungnaw lanpaw akhaan pungsan asoikuhpaw kha a pya;
12 Bawipaw inn voidu hae, po voilu lan umpaw akhaan hae, Pachia inn e sisuakhaan hae te pyapaw lasung hae nungnawpaw sisuakhaan hae, a thinlung kya a umpaw miakaw thyhte pungsan kha a pya;
13 ranpibawi hae te Levi phin hae nynh aphuphute a um nawlan hae te Bawipaw inn kya law lanpaw rya miakaw, Bawipaw inn kya ryalawnawpaw angphe miakaw hanlan te
14 rya miakaw lawnaw lanpaw sui angphe hae balyn hanlan sui kha aho zeihte, rya miakaw lawnaw lanpaw ngun angphe hae hanlan ngun kha aho zeihte,
15 sui maeekhuatung hae te maeeinn hae hanlan sui aho zeihte, maeekhuatung te a maeeinn raveih hae hanlan sui aho zeihte, a maeekhuatung te a maeeinn raveih hanlan ngun aho zeihte ryalawnaw raveih kya mang aho thyhte,
16 nungpyapaw sanlou nungnawpaw sui ccaboi raveih hanlan sui aho zeihte, te ngun ccaboi elang ahopaw ngun kha aho zeihte tou zah a pya;
17 phedung, pakepi te banang hanlan sui ccipaw kha thuasah, sui pakekhupaw hae te ngun pakekhupaw hae ccangkheit cci hanlan ahopaw sui te ngun kha thuasah tou zah a pya;
18 mynkhuhpaw maee-unawpaw silawhang elang sui ccipaw kha tou zah a pya, te mih sake daw hae zah Bawipaw byakin thingkua a bongpaw cherubim kya-e sui marangle hanlan amaw kya-e pungsan kha mah a pya.
19 David nynh, “E hae balyn hynh Bawipaw nynh a hopaw kha zei athua thyhte, law lanpaw rya paccynnaw miakaw kha thaethyanawpaw hawnaw yn pya vae,” a ci.
20 David nynh a ccapaw Solomon kha, “Na thawsaesakuh lah, rawthungte ryalawtua. Rih nan, na bungzou nan sah; pawccecize Bawipaw Pachia, ka Pachia tuh na kya a um. Bawipaw inn kya ryalawnaw hanlan rya miakaw na lyn mawlaezung aning nynh nang kha ae vua lan khyh zah shungnaw ae pya lan khyh.
21 Pachia inn e rya miakaw law khylan, hein kya ranpibawi hae te Levi phin hae tuh aphuphute a um hae; ryalaw miakaw kya ryalaw aphuinphuin a thya hae paw balyn tuh na kya a um hae; bawi hae te ccungccaw balyn mah na kuihkaw marya a um cih hae,” a cipya.