14
Jerusalem kya David A Um
(2Sa 5.11-16)
1 Tair siapharan Hiram nynh David hanlan inn sakpya khylan locceihtu hae kha sidar thing hae, pazan thya hae paw te lehccama hae ryte a saw hae.
2 Bawipaw nynh David kha Israel siapharan lang a khangpaw te a ccungccaw Israel hae hanlan a peenaw a hangthungpaw kha David nynh a ny.
3 David nynh Jerusalem khua kya zu hae hoichih zah David tuh ccapaw hae te ccanung hae patae paaw lang a tang.
4 David nynh Jerusalem khua kya a saah hae paw a ccaaw hae min tuh: Shammua, Shobab te Nathan; Solomon,
5 Ibhar, Elishua te Elpelet;
6 Nogah, Nefeg te Jafia;
7 Elishama, Beeliada te Elifelet.
Filistin hae kha Taenaw
(2Sa 5.17-25)
8 David tuh Israel siapharan lang chitui a thuh vae hae cipaw kha Filistin hae nynh he a thae hae te, Filistin hae balyn nynh David kha ccung khylan a cceih hae; tuh-e konglang tuh David nynh thae zah minmin kha tuk khylan a ccianua hae.
9 Filistin hae nynh oun cceih hae zah Refaim accya um hae paw kha a thiing hae.
10 David nynh Pachia kha khia zah, “Filistin hae kha tuk lan ka ccianua cih hae tou? Minmin kha ka kuih kalan nae pya cih hae tou?” a cipya. Bawipaw nynh David kha, “Ccianua hae; pawccecize Filistin hae kha na kuih kalan kae pya ccaccing cih,” a cipya.
11 Tukeiccuze David tuh Baal-perazim lang cceih zah, tuin kyakhe minmin kha a tae hae. David nynh, “Pachia nynh ka rhaw hae kha avuakuhpaw tuileih hawte ka kuih te a vuasaku vae hae,” a ci. Tukeiccuze tuh-e hmin tuh Baal-perazim cite a ko hae.
12 Mih zohtuh hae kha tuin kya a vuasya hae, te David nynh kawpya hae zah maee te a soi hae.
13 Filistin hae tuh bua oun cceih hae zah, accya kya um hae paw kha a thiing hae.
14 David nynh Pachia kha bua he a khia tuh Pachia nynh, “Na deehui lan khyh hae; koihlu hae lah, balsam thing hae te arawsekunaw kyakhate na naangbia cih hae.
15 Balsam thing dung hae kyakhe mih siho kha he na thae te, rhawtuk khylan na pou cih; pawccecize Filistin rhawkaw hae kha chia khylan Pachia tuh na malang a cceih lalo vae,” a cipya.
16 Pachia nynh kaw a pya thyhte David nynh cyih zah, Filistin rhawkaw hae kha Geba kyate Gezer kyacia po a chia hae.
17 David a minthaannaw tuh ram miakaw kya zeihkuh zah, Bawipaw nynh minphuin hae balyn kha David raw a risah hae.