SAM 94
Miding hanlan Liarutu Pachia
1 Pou Bawipaw , nang tuh
liarutu Pachia nynh na thua,
liarutu Pachia, na awnaw kha
awsah tua!
2 Pou laephi byapiatu, thoku tua;
a lyasakuh hae paw kha
accan thyhte detahtua hae!
3 Pou Bawipaw , ccungccaw
hoylei hae paw tuh
hohseciamou mih lungtua cih?
4 Minmin nynh lysakunaw bya kha a ho hae;
hoyleinaw a raepaw balyn tuh
a pookuh hae.
5 Pou Bawipaw , minmin nynh
na ccungccaw hae kha roh hae zah,
na rho athuapaw na ccungccaw hae kha
a tuaa a sah hae.
6 Minmin nynh nomae te
mikhia hae kha thuasah,
ngawraw hae kha thuasah
theih hae zah,
7 “Bawipaw nynh muih lan khyh;
Jakob Pachia nynh nyh lan khyh,” a ci hae.
8 Pou tuanaw hoi leipaw ccungccaw hae,
thaethyatua oh; mingaee hae,
hohtuhmou na haw ung cih oh?
9 Nakaring a raetupaw Pachia nynh
thae lan khyh tou?
Mit a raetupaw Pachia nynh
muih lan khyh tou?
10 Minphuin hae a thuiheitupaw nynh
detah leite a um cih tou?
ccungccaw kha nynaw
a ccangpatupaw nynh
nyh lan khyh tou?
11 Ccungccaw tuanaw tuh
alakawpaw nynh thua cipaw
Bawipaw nynh phe a ny.Ref 94.11: 1Ko 3.20
12 Pou Bawipaw , na thuihei hae paw te
na phunglang na ccangpya hae paw tuh
lungtua hae paw nynh thua.
13 Ccungccaw hoylei hae paw hanlan
hunghua thae athua makhia,
minmin kha vawsawnaw kyate
haeungnaw na pya hae.
14 Bawipaw nynh a ccungccaw hae kha
vua lan khyh hae;
a rho athuapaw a ccungccaw hae kha
vua lan khyh hae;
15 pawccecize byading tuh
miding hae kalan a kithui cih zah,
mih thinlung adingpaw balyn nynh
tuh-e byading kha a zui cih hae.
16 Ccungccaw hoylei hae paw kha
rawsete hummou ka kalan te
a thokuh bua cih?
Hoyleinaw a rae hae paw kha
rawsete hummou yn thadynkhae cih?
17 Bawipaw tuh yn bawmtu
a la thua khyh lanze,
ka muisaw tuh adaenaw ram kya
aro maw a um vae cih.
18 “Ka ccu a thei,” he ka ci tuh,
Pou Bawipaw , atynpaw
na sungsahnaw nynh phang yn kyng.
19 Ka tuakunaw he aru vae ze,
na kya-e ngaengansahnaw nynh
ka lung yn pawsah.
20 Uktu hoylei hae paw tuh nang te
na ccawkuh kho oh zawtou?
Minmin tuh upadi rawsete thyaruhnaw
a paccynkuh hae paw nynh thua.
21 Minmin nynh miding hae hiinnaw kha
rawsete pynkheihlan mungkuh hae zah,
seinaw a hoi lei hae paw kha
chia lan bya a pia hae.
22 Thuasalama Bawipaw tuh
yn thungkhawtu thua vae zah,
ka khynnaw lungpi,
ka Pachia nynh thua.
23 Pachia nynh mih hoyleinaw hanlan
a liaru cih hae zah,
mih hoyleinaw hanlan
minmin kha a maemih cih hae;
Bawipaw ah Pachia nynh
minmin kha a maemih cih hae.