SAM 89
Ref 89 Abyalu: 1Si 4.31David kya Pachia Byakinnawnote89 Abyalu: Ezrah phinpaw Ethan hlaw.
(1Sia 4.31)
1 Pou Bawipaw , atynpaw
na sungsahnaw kha hlaw te
zungzae ka sah cih;
na lungzinaw kha ka mung te
she takyh ka siakhae cih.
2 atynpaw na sungsahnaw tuh
zungzae atyn cite ka ho;
na lungzinaw tuh vaawlui hawte atyn.
3 Namaw nynh, “Ka popaw
ccungccaw kyakhe
byakinnaw kha ka rae vae,
ka seepaw David kha
bya ka kinpakuh zah:
4 ‘Na ciihan tuh zungzae
ka tynsah cih zah,
na bawitungkhung tuh
she takyh kya ka tynsah cih,’
ka cipya,” cite na ho.Ref 89.4: 2Sa 7.12-16; 1Sh 17.11-14; Sam 132.11; Loc 2.30
5 Pou Bawipaw , vaawlui hae nynh
na raepaw ngaeangnaw hae kha thuasah,
athyaapaw ccungccaw hae pumkunaw kyaze
na lungzinaw kha thuasah
ae thehoysah hae sah.
6 Pawccecize vaawlui kya nang te
touse lanpaw hummou a um?
Vaawlui kya a um hae paw lakuze
Bawipaw te alokuhpaw
hummou a um?
7 Pachia tuh athyaapaw zapi hae laku kya
ri lan umpaw nynh thua,
a pepan um hae paw balyn laeze
alesaepaw te ri lan umpaw nynh thua.
8 Pou vaaw Bawipaw Pachia,
nang hawte athawsaepaw hummou a um,
pou Bawipaw?
Na lungzinaw nynh namaw kha
phang ae koihlu.
9 Rili tuihu kha na uk zah,
rili tuileih he atho ze, na daesah.
10 Rahab kha sachihpaw hawte na ro;
na rhaw hae kha athawsaepaw
na kuih te phiariphiarae na nung hae.
11 Vaawlui hae tuh na uccaw thua zah,
laephi mah namaw uccaw nynh thua;
laephipi te a lungkhu
umpaw balyn kha na rae.
12 Palung lang te alia lang kha na rae;
Tabor mua te Hermon mua nynh
na min kha lungtuate
the ae hoysah hae.
13 Nang tuh athungpaw kuih na hoi;
na kuih tuh a thawsae zah,
na ranglang kuih tuh ahang.
14 Dingnaw te byading tuh
na bawitungkhung aleihpaw nynh thua;
atynpaw sungsahnaw te lungzinaw tuh
na malang a cceih hae.
15 Lungtuanaw roi a nyhpaw
ccungccaw hae tuh
lungtuapaw nynh thua hae:
Pou Bawipaw , na mitmae awnaw
lungkhu a cceih hae paw tuh
lungtuapaw nynh thua hae;
16 minmin tuh na min kyakhe
anin ninlang mih lungtua zah,
na dingnaw liate hangthung athua hae.
17 Pawccecize nang tuh mih thawzung
phu-enaw nynh na thua;
na thawccinaw liate kae thungnaw ki tuh
hangthung athua.
18 Pawccecize kae khawriaphua tuh
Bawipaw kya-e thua zah,
Israel kya-e Athyaapaw Pachia tuh
kae siapharan tuh nynh thua.
19 Te langmaw lyaze a lungzipaw
na ccungccapaw kyakhe vizin te
na hopah zah,
“A thawsaepaw lukheitpaw kha
bawilukhung ka khungsah vae,
ccungccaw hae laku kyate
po athuapaw lukheitpaw kha
ka hangthung vae.
20 Ka seepaw David kha ka muih vae;
ka chitui athyaapaw te amaw kha
ka thuh vae;Ref 89.20: 1Sa 13.14; Loc 13.22; 1Sa 16.12
21 ka kuih tuh amaw kya
a um zungzae cih;
ka kuih nynh mah amaw kha
thawzung a pya cih.
22 Rhaw nynh amaw kha
tae lan khyh zah,
ccungccaw hoyleipaw nynh
amaw kha tae lan khyh.
23 A rhaw hae kha amaw malang khe
ka roh cih hae zah,
amaw a huatu hae paw kha
ka theih cih hae.
24 Ka lungzinaw te atynpaw
ka sungsahnaw tuh a tungvaw
a um cih zah,
ka min liate a thungnaw ki tuh
hangthung athua cih.
25 A kuih tuh rili vawlan
ka khang cih zah,
a ranglang kuih tuh vawpi hae vawlan
ka khang cih.
26 Aning nynh kamaw kalan khe,
‘Nang tuh ka Paaw, ka Pachia te
yn khumtu Lungpi nynh na thua!’
cite a sia cih.
27 Aning kha ccatawccaw,
laephi siapharan hae kyaze
ahang huaccepaw lan ka rae cih.Ref 89.27: Bya 1.5
28 Atynpaw ka sungsahnaw kha
a tungvaw ka tynsah zungzae cih zah,
ka byakinnaw tuh amaw kya
tynkaring lan a um cih.
29 A ciihan kha zungzae
ka tynsah cih zah,
a bawitungkhung kha vaawlui
atyn lungkhu balyn po atyn cih.
30 A ccaaw hae nynh ka phung kha
vua hae zah,
ka phungzae thyhte
a zui khyh hae ze thuasah,
31 ka phunglang kha
pawlangria khyh hae zah,
ka kawbya kha
a zui khyh hae ze thuasah,
32 mih cyiseinaw keiccuze
tungbang te thuasah,
mih hoyleinaw keiccuze ccinaw
alepaw te thuasah de ka tah cih hae;
33 thuasalama atynpaw ka sungsahnaw kha
amaw kyate ka nue lan khyh,
ka lungzinaw kha mah
ka roh lan khyh.
34 Ka byakinnaw kha ka roh lan khyh,
ka mung kyate a poupaw bya kha
ka paleih lan khyh.
35 David kha ka hynpah lan khyh cite
athyaapaw ka thuanaw liate vaekheit te
zungzae hanlan bya ka kinku.
36 A ciihan tuh zungzae po atyn cih,
a bawitungkhung tuh khuanin hawte
ka malang atyn cih.
37 Tuh-e tuh sawpaw hawte thuasah,
vaawlui kyaze a lungzipaw
ccaekia hawte thuasah
zungzae atyn cih,” na ci.
38 Thuasalama atu tuh amaw kha
na vua zah na cciataw vae;
chitui na thuhpaw tungvaw
myarya na thinria vae.
39 Na seepaw kya na raepaw
byakinnaw kha phe na ro vae;
a bawilukhung kha vuiping kya
na thusah vae.
40 A khualungrua balyn kha
marya na tingsahpya vae;
a rhawlungrua kha na ropya vae.
41 A cceih bungthung hae paw balyn nynh
amaw kha a luade hae;
aning tuh a innpaw hae nynh
a sarya hae paw lang a tang.
42 A rhaw hae mih ranglang kuih kha
na hangthung vae hae;
a rhaw hae balyn kha mih lung
na tuasah vae hae.
43 Tuhpiaze, a thaloi haw kha
na paleihpah zah,
rhawtuknaw kya amaw kha
na pankhae vae khyh.
44 A kuih kyate ccoi kha na lawpah zah,
a bawitungkhung kha laekhu lang
na vuapya vae.
45 A ngawphue ccyh kha na dynsahpah zah,
maethya na bong vae.
46 Pou Bawipaw , hohseciamou,
zungzae tetou na rekuh cih?
Hohseciamou na thin-unaw tuh
maee hawte arua cih?
47 Ka ccyh tuh hohcihmou
adyn cipaw ning nan lah,
ccungccaw hae balyn hynh a chihthya lante
na raepaw nynh thua cipaw liathuitua!
48 Chi leite a hiin khopaw
hummou a um?
Michi khua huhan kyate
hummou a lue kho?
49 Pou Bawipaw , na lungzinaw te
David kya bya na kinpyakupaw
langmawlya e atynpaw
na sungsahnaw kha
teimou a um vae?
50 Pou Bawipaw , na seepaw nynh
hohcihmou saryanaw
ka teing cipaw liathuitua;
ccungccaw hae nynh
saryakunaw kha ka by kya
hohcihmou ka poi cipaw kha
mah liathuitua.
51 Pou Bawipaw , na rhaw hae nynh
chitui na thuhpaw kha a sarya hae,
a ccianaw miakaw kya a sarya hae.
52 Bawipaw tuh zungzae te
thehoysah thua sah.
Amen, Amen.