SAM 86
Bawmnaw Ngianaw
David Sawsangnaw
1 Pou Bawipaw , na nakaring tuakute
yn ngaepah lah, yn leihtua,
kae tuh ka ryachi zah ka ho ka bou.
2 Kae tuh namaw kya ka lungzi keiccuze
ka hiinnaw hynh yn thungkhawtua;
nang ae doliakuhpaw
na seepaw hynh yn khumtua.
Nang tuh ka Pachia nynh na thua;
3 Pou Bawipaw , na kalan anin ninlang
ka sia keiccuze thaw beih yn ccitua.
4 Pou Bawipaw , na kalan
saw ka sang keiccuze
na seepaw hynh ka lung yn tuasah tua.
5 Pou Bawipaw , nang tuh na hoy,
seingaethyanaw na hoi zah,
na kalan saw a sang hae paw tungvaw
atynpaw sungsahnaw te phe na beih.
6 Pou Bawipaw , ka sawsangnaw hynh
yn ngaepya tua; siaruate
kae ngianaw hynh yn ngaepya tua.
7 Nae leih cih keiccuze
ka vawsaw ccyh lya nang kha kae ko.
8 Pou Bawipaw , pachia hae laku kya
nang ae lopaw um khyh,
na cyipaw rya te alokuhpaw ccangpaw
rya ccangkheit san um khyh.
9 Pou Bawipaw , na raepaw
minphuin balyn nynh
oun cceih cih hae zah,
na malang bakhungte na min kha
ae thehoysah cih hae.Ref 86.9: Bya 15.4
10 Pawccecize nang tuh na lesae zah,
ngaeangthua lan umpaw
uccaw hae kha na rae;
nang rou nynh Pachia na thua.
11 Pou Bawipaw , na byaccing kya
ka ccia ccaw,
na laanpi kha yn ccangpya tua;
na min kha sawtua khylan
aphei leipaw thinlung yn pyatua.
12 Pou Bawipaw ka Pachia,
ka thinlung balyn te nang kha
kae thehoysah zah,
na min kha zungzae phu kae esah cih.
13 Pawccecize ka hanlan atynpaw
na sungsahnaw tuh myarya ale;
akhunaw michi khua kyate
ka muisaw kha nae luesah vae.
14 Pou Bawipaw ,
a lysakuh hae paw nynh
rawsete yn thonuaku hae;
mih rysawthah hae paw phu nynh
nang kha pawlangria leite
kae kha chia lan a zuaku hae.
15 Pou Bawipaw , nang tuh
thawccih thyapaw te
ngaethyaumsah thyapaw,
a lungsaepaw, atynpaw sungsahnaw te
phe abeihpaw[1] te a lungzipaw
Pachia nynh na thua.
16 Ka kalan yn maeleihkuh lah,
thaw yn ccitua; na seepaw hynh
na thawzung yn pyabua;
na seenung ccaaw hynh yn khumtua.
17 Na kya-e ahoypaw muihsahnaw kha
yn langsapyaku tua,
tuhteze nynh kae yn hua hae paw nynh
tuh-e tuh a muih cih hae zah,
mih maethah cih,
pawccecize Bawipaw nynh
yn bawm vae zah,
ka ngae yn ngansah vae.
ae thehoysah cih hae.