SAM 48
Zion Phu-enawnote48 Abyalu: Korah phin hae hlaw.
1 Bawipaw tuh alesaepaw thua zah,
ah Pachia khuapi kya,
athyaapaw a mua vawlan khe
alesae lante thehoysah lanpaw nynh thua.
2 Hang zah apuithyapaw Zion Mua tuh,
laephi pynpi lungtuanaw
a pyapaw nynh thua,
alesaepaw Siapharan khuapi tuh
asawnaw thahlang nynh a um.Ref 48.2: Mat 5.35
3 Tuh-e khuapi rhawlungrua
a lungkhu kya tuh
khynnaw a um cipaw kha
Pachia nynh a langsaku vae.
4 Tetuh siapharan hae tuh pumkuh hae zah,
pynkheihlan oun cceih hae.
5 Zion Mua kha he a muih hae tuh
myarya a rih hae;
siikuh hae zah a ccue hae;
6 minmin tuh tuin kya thyngkuh hae zah,
neitangia a ccihpaw
nopi hawte mih vawsaw,
7 nithua lang e khisan nynh
Tarshish sanphalung kha
a ro lya hawte nynh athua hae.
8 Aening nynh ah thae vae oh hawte,
vaaw Bawipaw khuapi kya,
ah Pachia khuapi kya ah muih vae oh.
Pachia nynh tuh-e khuapi tuh
zungzae a tynsah cih.
9 Pou Pachia, atynpaw na sungsahnaw kha
na beikinn lungkhu khe kae tua.
10 Pou Pachia, laephi adianaw cia
ae thehoysah hae hawte,
na min tuh athaan.
Na ranglang kuih tuh taenaw te phe abeih.
11 Bya na pianaw liate,
Zion Mua tuh a lungtua sah lah,
Judah ram e khua hae tuh
mih lungtua sah.
12 Zion khua kha voilute cceih oh lah,
a rhawviainn hae kha riatua oh,
13 rhawhohung hae kha
hoyte dotua oh lah,
rhawlungrua hae kha phe do mamia oh;
tetuh she thawpaw kya-e
ccungccaw hae kyakhe,
14 “E Pachia tuh zungzae te zungzae cia
ah Pachia nynh thua.
Zungzae oun cciakhaepaw athua cih,”
cite na hopah kho cih oh.