SAM 33
Pachia Lesaenaw te Hoynaw
1 Pou miding hae nanning,
Bawipaw kya nae lungtua sah,
Thehoysahnaw tuh miding hae te
angaekuhpaw nynh thua.
2 Bawipaw kha tintang te
thehoysah oh;
arui ruihaw asuikuhpaw tintang te
thehoysahnaw hlawsah oh.
3 Amaw kalan hlaw thawpaw kha sah oh;
kou hoy lan tintang khuakuh oh lah,
kou ccae lan hlawsah oh.
4 Pawccecize Bawipaw bya tuh ading,
rya a lawpaw balyn tuh zyn lan a um.
5 Bawipaw nynh dingnaw te
byading kha a ry;
laephi tuh atynpaw Bawipaw
sungsahnaw te phe abeih.
6 Vaawlui tuh Bawipaw bya liate
rae thua zah,
vaawlui kya umpaw balyn tuh
a khalang kya-e hy liate rae athua.
7 Rili tui hae kha paling lungkhu e
tui hawte san kheit kya a ccakhung hae;
akhupaw rilipi hae kha
ccakhungnaw inn kyakhe a ccakhung.
8 Laephi pynpi nynh Bawipaw kha rih sah;
laephipi kya-e ccungccaw hae balyn nynh
amaw kha sawtua hae sah.
9 Pawccecize Bawipaw nynh
ho zah, laephi tuh yn um;
kaw a pya thyhte tynkaring lan
a thadyn.
10 Minphuin hae nynh a paccynku hae paw kha
Bawipaw nynh accakaepaw lang
a tangsahpya hae;
ccungccaw hae tuakunaw kha a ropya hae.
11 Bawipaw paccynnaw tuh
zungzae atyn,
a thinlung kya-e a tuanaw hae tuh
she takyh hanlan atyn.
12 Bawipaw kha mih Pachia lang
a hoi hae paw minphuin tuh
lungtuapaw minphuin nynh thua,
Bawipaw nynh amaw a rho lang
a poku hae paw ccungccaw hae tuh
lungtuapaw nynh thua hae.
13 Bawipaw nynh vaawram te
dobung zah,
ccungccaw miakaw kha a muih.
14 A umnaw kyate laephi vaw e
ahiinpaw balyn kha do zah,
mih cyisahnaw balyn kha marya a muih,
15 mih thinlung balyn kha rae zah,
mih cyisahnaw balyn kha marya a muih.
16 Siapharan tuh myarya lungpaw
a rhawkaw phupi liate khum thua khyh;
rhawkaw tuh a thawzung myarya
a um liate luesah thua khyh.
17 Rhawtuknawpaw marang tuh
rhaw taenaw hanlan
accakaepaw ngaehoinaw nynh thua,
myarya lepaw a thungnaw nynh
khum kho khyh.
18 Bawipaw raw a rih hae paw te
atynpaw a sungsahnaw
a ngaehoikuh hae paw kha
19 chinaw kyate luesah khylan te
ccakan a cci lya mih hiinnaw kha
khynsah khylan Bawipaw nynh
tyty a do hae.
20 Aening muisaw nynh Bawipaw kha
a ngaehoiku;
aning tuh aening oun bawmtu te
ah khawriaphua nynh thua.
21 A min thyaapaw kha
ah doliaku oh keiccuze
aening thinlung tuh amaw kya a lungtua.
22 Pou Bawipaw , nang kha
kae ngaehoiku thyhawte
atynpaw na sungsahnaw tuh
kae tungvaw um sah.Ref 34 Abyalu: 1Sa 21.13-15