SAM 22
Lue khylan Ngianaw
David Hlaw
1 Ka Pachia, ka Pachia,
pawcce phe nae vua?
Kae kha bawm lanpaw kyate thuasah,
ka siaruanaw roi kyate thuasah
pawccemou asawnaw lang nae umtaw?Ref 22.1: Mat 27.46; Mar 15.34
2 Pou ka Pachia, khuadae ka sia zemah
nae thaepah khyh;
khuazi ka sia zemah lungdaenaw
ka mue khyh.
3 Tuhzemah nang tuh Israel hae nynh
ae thehoysahnaw hae kya
na haung zah,
athyaapaw nynh na thua.
4 Kae minpaaw hae nynh nang kha
ae doliaku hae;
nang kha ae doliakuh hae zah,
na khum hae.
5 Na kalan sia hae zah,
khumnaw a mue hae;
nang kha ae doliakuh hae zah,
maethyanaw mue khyh hae.
6 Thuasalama kae tuh ccungccaw thua leite
tangkaria nynh ka thua;
ming hae nynh a theihrya hae paw
ka thua zah, ccungccaw hae nynh
a dothatheih hae paw nynh ka thua.
7 Yn muihpaw balyn nynh yn sarya hae;
mih mung yn sunua hae zah,
mih lu yn henua hae;Ref 22.7: Mat 27.39; Mar 15.29; Luk 23.35
8 “Aning tuh Bawipaw kha
a doliaku;
Bawipaw nynh khum vae sah,
Bawipaw nynh a lungrythuapaw
ccungccaw kha khum sah!” a ciku hae.Ref 22.8: Mat 27.43
9 Tuhzemah ka nung vue kyate
yn puisahpaw tuh nang nynh na thua;
nosi ka thua lya khyndadyh lan
nae do-oih.
10 Ka pui takaw te nang kha
kae doliaku;
ka pui takaw te nang tuh
ka Pachia nynh na thua.
11 Kae te beih sawkuh nan,
vawsawnaw nynh yn naenuakuh zah,
yn bawm lanpaw hum sanmah
um khyh.
12 Tangnuapaw hae patae nynh
yn koihlu hae,
Bashan ram e athungpaw
tangnuapaw hae nynh yn koihlu hae;
13 A vue myarya law zah
a siapaw chindeih hawte,
mih khalang kha haehae yn awnua hae.
14 Kae kha tui hawte yn lae hae zah,
ka ru balyn tuh pong suhliakuh;
ka thinlung tuh khoilung hawte nynh thua;
ka by lungkhu kya palae atui;
15 Ka thawzung tuh lae-ang akoinahpaw hawte
karae rou zah,
ka lae tuh ka dang kya phang bekuh;
kae kha chinaw vuiping kya nae nung.
16 Ui hae nynh yn koihlu hae;
Ccungccaw hoylei hae paw phu nynh
kae kha yn koihlu hae.
Ka kuih te ka ccu kha yn bou hae.
17 Ka ru balyn kha phe ka ria kho,
Yn do hae zah mih lungrythuakhaekuh;
18 ka boeining kha neekuh hae zah,
ka boeining kha ccungthykhyate a dung hae.Ref 22.18: Mat 27.35; Mar 15.24; Luk 23.34; Joh 19.24
19 Thuasalama, pou Bawipaw ,
kae te beih sawkuh nan!
Pou yn bawmtu, kae kha bawm khylan
arangte beih yn cceih!
20 Ka hiinnaw hynh thaloi kyate thuasah,
e ui hae kyate thuasah yn khumtua!
21 Chindeih khalang kyate
yn khumtua!
Arepaw tangnuapaw ki kyate
nae khum vae.
22 Na min kha ka uno hae kya
ka hopah cih hae;
a pumkuh hae paw ngaelung kya
nang kha kae thehoysah cih:Ref 22.22: Heb 2.12
23 Bawipaw raw a rih hae paw,
amaw kha thehoysah oh!
Jakob ciihan hae balyn,
amaw kha phu-esah oh;
Israel ciihan hae balyn,
amaw raw kha rih oh!
24 Pawccecize vawsaw a tungpaw kya-e
vawsawnaw kha
pawlangria leite um khyh;
tuh-e paw kyate a mae kha
retawkuh khyh zah,
amaw kalan he a sia ze a thaepya.
25 A pumkuh hae paw zapi hae kyakhe
kae thehoysah cih;
namaw raw a rih hae paw malang khe
bya ka kinkupaw kha ka ccingsah cih.
26 Ryachi hae nynh a ae cih hae zah
a byn cih hae;
Bawipaw a ccung hae paw nynh
amaw kha a thehoysah cih hae.
Nae thinlung tuh
zungzae a lungtua vae sah!
27 Laephi adianaw kya
a um hae paw balyn nynh
a liathui cih hae zah,
Bawipaw kalan
a maeleihkuh cih hae;
minphuin balyn nynh
amaw kha a beik cih hae.
28 Pawccecize uknaw tuh
Bawipaw kya-e thua zah,
amaw nynh minphuin balyn kha
a uk hae.
29 Laephi vawlan a hoirum hae paw balyn tuh
a ae cih hae zah amaw kha
a beik cih hae,
laenoi kalang a cceihbung hae paw balyn tuh
amaw malang a bakhung cih hae.
Kae tuh amaw hanlan ka hiin cih.
30 Ccaawsenopaw hae nynh
amaw rya a la lah cih hae;
malang she e ccungccaw hae kha
Bawipaw kong hopya athua cih hae,
31 “Bawipaw nynh a ccungccaw hae kha
a khum vae hae,” cite a pui loh leipaw
ccungccaw hae kyakhe
hopya athua cih hae.