SAM 18
David kya-e Taenaw Hlawnote18 Abyalu: Bawipaw ryalahtu David tuh Saul te ccangpaw a rhaw hae balyn kyate Bawipaw nynh a khum nin khe David nynh Bawipaw kalan a sahpaw hlaw.
(2Sa 22.1-51)
1 Pou Bawipaw , ka thawzung
na thuapaw nang kha kae sungsah.
2 Bawipaw tuh ka lungpi,
ka rhawlungrua, yn luesahtu,
ka Pachia, ka khynnaw lungpi,
ka khawriaphua,
yn khumpaw saki te
ka rekunaw nynh thua.
3 Thehoysah lan angaekuhpaw
Bawipaw kha ka ko,
tukeiccuze ka rhaw hae kyate
khum ka thua cih.
4 Chinaw arui nynh phang yn voi;
ronaw tuithaw nynh yn luathin.
5 Chinaw arui nynh phang yn khethinku;
chinaw kaang nynh phang yn kaesah.
6 Ka vawsaw lyakhe Bawipaw kha ka ko;
ka Pachia kalan khe bawmnaw
mue khylan ka sia.
A beikinn kyate ka roi kha yn thaepah zah,
amaw kalan ka sianaw tuh
a nakaring kya phe a thua.
7 Pachia a thinria keiccuze
laephi tuh hy zah a thyngkuh;
mua leihpaw hae mah
ahy hae.
8 A naduh kyate maeekhuh
pouthung zah,
a khalang kyate aruapaw maeesoi te
zaezae epaw maeehue a pou.
9 Vaawlui kha hung zah yn rungbung;
marae zipingpaw mohnaw tuh
a ccu kaw kya a um.
10 Cherubim kha ccikuh zah a zou;
khivae a sake vawlan khe arangte a zou.
11 Amaw toulou kha mohnaw te a bongku,
tui te marae mohkhaekuhpaw
maeking nynh phang a bong.
12 A malang e phaephae akpaw kyate
phang zipingpaw maeking kya-e
hya te maee-e a ccah hae.
13 Bawipaw mah vaawlui khe
kholung lang thyh zah,
Ahang Huaccepaw Pachia nynh
a roi a saw.
14 Te a the kha kaw zah,
rhaw hae kha a phiasaku hae;
ria he a kawsah tuh,
phiariphiarae a ccue vae hae.
15 Pou Bawipaw , thinriate
na pe hae zah,
na naduh kyate hy he na saw tuh,
rilipi kaw phe lang zah,
laephi aleihpaw mah phe a lang.
16 Bawipaw nynh ahangnaw kyate
yn dyngnuakuh zah yn hoeilang;
myarya khupaw tui lungkhu kyate
po yn sue.
17 Athungpaw ka rhaw hae kyate thuasah,
kae yn hua hae paw kyate thuasah
yn luesah;
pawccecize minmin tuh ka hanlan
myaryamaw a thung hae.
18 Minmin nynh ka vawsaw ccyh lyakhe
yn dou hae;
thuasalama Bawipaw nynh
yn bawm.
19 Akopaw hmin lang yn cciakhae;
Ka tungvaw a lungrythua keiccuze
yn luesah.
20 Bawipaw nynh ka dingnaw thyhte
lasung yn pya;
ka kuih a thyaa thyhte yn pyaru.
21 Pawccecize Bawipaw laanpi kha
ka zui zah, ka Pachia kyate
seinaw raete ka phiakuh khyh.
22 Pawccecize a phungzae hae balyn kha
ka zui zah,
a phungbya hae kha ka vua khyh.
23 A malang ccaenaw um leipaw
ka thua zah,
hoyleinaw kha ka sibia.
24 Tukeiccuze Bawipaw nynh
ka dingnaw thyhte thuasah,
a muihnaw kya ka kuih athyaa thyhte
thuasah yn pyaru vae.
25 A lungzipaw tungvaw kya
lungzinaw kha na langsaku,
ccaenaw a um leipaw kya
ccae lan um leinaw kha na langsaku.
26 Athyaapaw ccungccaw kya
thyaanaw kha na langsaku;
ccungccaw hoyleipaw kya
rawsenaw kha na langsah.
27 Zakaw a sangsakuhpaw
ccungccaw kha na khum,
thuasalama lysakunaw mitdae
a dae hae paw kha na biabung hae.
28 Pou Bawipaw , nang tuh
ka maeekhua yn awsahpahtu nynh
na thua;
Bawipaw , ka Pachia nynh
ka mohnaw kha a awsah.
29 Namaw liate ka rhaw hae kha
ka ro kho hae,
ka Pachia liate khualungrua kha
po ka zou kho.
30 E Pachia tuh, a laanpi phe accing;
Bawipaw byakinpyakunaw nynh
ahmepaw kha ccaekia a khan;
Aning tuh amaw kya
a rekuh hae paw balyn hanlan
khawriaphua nynh thua.
31 Bawipaw laelan
hummou Pachia athua?
aening Pachia laelan
hummou lungpi athua?
32 Aning tuh thawzung kha
ka tae kya yn khiidepahtu thua zah,
ka laanpi kha a khynsah.
33 Ka ccu kha sazuh ccu hawte
a liazawsah zah,
ahangnaw khe khyndadyh lan yn nung.Ref 18.33: Hab 3.19
34 Ka kuihbaw nynh sohin li kha
a sue kho nawlan,
ka kuih kha rhawtuk nawlan
yn ccangpya.
35 Na khumnaw khawriaphua kha
nae pya vae zah,
na ranglang kuih nynh yn bawm vae;
nae bawmnaw nynh yn lesaesah vae.
36 Ka ccusy hanlan laanpi akopaw kha
nae pya zah,
ka ccu tuh thei khyh.
37 Ka rhaw hae kha ka deehui hae zah
ka phya hae;
ka maemih makhia hae
ka kitaw khyh hae.
38 A thokuh kho lei lan hae,
ka bua hae zah,
ka ccu kaw kya a khuliakuh hae.
39 Pawccecize rhawtuknaw hanlan
thawzung kha ka tae kya
nae khiidepya;
ka rhaw hae kha ka zakaw khe
na bakhungsah hae.
40 Ka rhaw hae kha ka kyate
na maeleihsakuh hae zah,
kae yn hua hae paw kha ka ro hae.
41 Bawmnaw ngiakute a sia hae zemah,
minmin a khum lan hae paw
humhung mah um khyh;
Bawipaw kalan a sia hae zemah
leihru khyh hae.
42 Khivae kya-e vuiping hawte,
phe khui lan ka miade hae;
laanpi kya-e tuiccua hawte,
ka syde hae.
43 Ccungccaw hae ryte
rhawkunaw kyate nae luesah;
minphuin hae uktu lang nae rae;
ka ny boi leipaw ccungccaw hae nynh
rya yn lawpya hae.
44 Ka bya he a thae miakaw hae te,
ka kaw a ngae hae;
ramccang hae tuh bohkute
ka kalan oun cceih hae.
45 Ramccang hae tuh mih thawthah zah,
mih rhawlungrua lungkhu te
thyngkute oun pou hae.
46 Bawipaw tuh a hiin!
Ka lungpi tuh thehoyte um sah,
Yn khumtupaw Pachia tuh
hangthungte um sah.
47 Pachia tuh phulawrunaw
yn pyatu thua zah,
ccungccaw hae kha ka zakaw
a sangsahtu hae nynh thua;
48 ka rhaw hae kyate
yn luesahpaw nynh thua;
kae yn rawsetu hae luki lang
nae hangthung ccaccing;
a puathopaw ccungccaw hae kyate
nae luesah.
49 Tukeiccuze, pou Bawipaw ,
minphuin hae laku kya
kae thehoysah cih zah,
na min thehoysahnaw hlaw kha
ka sah cih.Ref 18.49: Rom 15.9
50 Pachia nynh a siapharan kha
taenaw alepaw a pya;
chitui a thuhpaw David te
a ciihan hae kya
atynpaw sungsahnaw kha
zungzae a langsahpya hae.