SAM 14
Ccungccaw Hoyleinawnote14 Abyalu: David hlaw
(Sam 53)
1 Mingaee hae nynh mih thinlung kya,
“Pachia um khyh,” a ci hae.
Minmin tuh a roh hae,
anungsikuhpaw rya kha a law hae;
ahoypaw a cyihpaw
lu kheit sanmah um khyh hae.Ref 14.1-3: Rom 3.10-12
2 Ccungccaw hae kya a hawpaw te
Pachia a ccungpaw lu kheit san
a um tou, um khyh tou cipaw muih khylan
Bawipaw nynh vaawlang te
ccungccaw kha a dobung.
3 Ccungccaw balyn tuh a cceihsei vae hae,
mih balyn mawte phe lokuh lante
accouseikuh hae;
ahoypaw a cyihpaw hum san um khyh,
lu kheit san um khyh.
4 Sanlou ae hawte ka ccungccaw hae kha
karyh ae hae zah,
Bawipaw kalan saw a sang lei hae paw,
hoyleinaw a cyih hae paw balyn nynh
nythyanaw hoi khyh hae tou?
5 Te minmin tuh myaryamaw a rih cih hae,
pawccecize Pachia tuh ading hae paw
phu kya a um.
6 Nanning nynh ryachipaw a khuakhannaw kha
maethya na lah oh salamah,
Bawipaw tuh aning a khynnaw nynh thua.
7 Israel hae hanlan khumnaw tuh
Zion kyate yn thua vae sah!
Bawipaw nynh a ccungccaw hae kha
hoynaw he a pyathui hae te,
Jakob tuh a lungtua cih;
Israel tuh a lungpaw cih.