2
Lingthya Profeh hae te Detahnaw
1 Thuasalama Israel hae laku kya lingthya profeh hae mah a la um hae, tuhawte ahme leipaw ccangpahtu hae mah nae kya oun langkuh cih hae. Minmin nynh ccungccaw arosah thyapaw ahme leipaw ccangpyakunaw kha aphiruh lante yn teekhae cih hae; mimaw a shawkhawtu hae paw Bawipaw kha heize phe vuate, mimaw tungvaw arangte ronaw kha a thuakhaekuh cih hae.
2 Ccungccaw patae nynh anungsikuhpaw mih ziazae kha a zui cih hae zah minmin keiccuze byaccing laanpi tuh thethya a ho cih hae.
3 Karankunaw thinlung keiccuze nanning kha hynbya te amia ae ccungnahkuh cih oh. Langmawlya mawte minmin byapianaw tuh amaw um lan um huataw khyh, minmin kya-e ronaw mah ih khyh.
4 Pawccecize Pachia nynh seinaw a raepaw vaaw hae kha haang khyh hae; hell lungkhu lang sah hae zah byapia khylan nungdete mohnaw sivawrui te a khii hae.
5 Langmawlya laephi hynh mah la haang khyh, Pachia rawrih lei hae paw a umnaw hae laephi vawlan tuipayn a ynsaku lyaze dingnaw phung a hotu Noah te ccangpaw lu sari kha a khum hae.Ref 2.5: Gen 6.1—7.24
6 Sodom te Gomorrah khuapi hae kha detah hae zah buhhaw lang tangsahte a ro hae, Pachia rawri leite a hiin cih hae paw hanlan dosuinku lante a rae.Ref 2.6: Gen 19.24
7 Ccungccaw hoylei hae paw kya-e ohhuaku rynaw nynh a lungvaw a sawsahpaw midingpaw Lot kha a luesah,Ref 2.7: Gen 19.1-16
8 (pawccecize tuh-e midingpaw tuh minmin kya a um lyaze kawbya pawlangria lei hae paw mih cyisahnaw hae kha nin takyh a muih a thae keiccuze midingpaw tuh a lungvawsaw).
9 Pachia rawrih hae paw kha tuhounaw kyate pawcihtemou luesah lan cipaw te atazae lei hae paw kha detah khylan byapianaw nin hanlan pawcihtemou nungde lan cipaw kha Bawipaw nynh a ny.
10 Abyapi lante, anungsikuhpaw pynsaw rynaw te asekuhpaw chiisaw rynaw a zui hae paw te kawhoinaw pawlangria lei hae paw kha pawcihtemou detah lan cipaw kha Bawipaw nynh a ny. Minmin tuh apua-atho hae paw, mih ry thyhte a um hae paw, mih phu-epaw kha thethya ho lan a rih lei hae paw nynh thua hae.
11 Vaaw hae tuh minmin laeze thunghua hae zah mih thawsaehua zemah, Bawipaw muihnaw kya tuh minmin tungvaw saryate seibenaw kha rae khyh hae.
12 Thuasalama minmin tuh kyng khylan te chia khylan rae athuapaw, tuanaw hoi leipaw loramsaw hae hawte, mimaw nynh a ny lei hae paw uccaw hae kong kha thethya a ho hae; minmin tuh tuh-e loramsaw hae ryte ro athua cih hae.
13 Mih cyiseinaw hanlan detahnaw a mue cih hae. Khuadae ccyh kya hoysahpaw kha minmin nynh lungrythuanaw lang a ria hae. Nanning ryte poi na tuakheih lya oh khe, ccungccaw lingte a hoysah hae, minmin tuh akalouhkuhpaw te athupaw abekuhpaw nynh thua hae.
14 Mih mit tuh milae zu milae vawpaw kya sei rynaw te phe beih zah, sei leite um kho khyh hae, mih lungtyn leipaw ccungccaw hae kha soih hae zah, mih thinlung tuh karankunaw a hoi, minmin tuh thyalawpaw ccaaw hae nynh thua hae.
15 Minmin nynh ahmepaw laanpi kha vua hae zah a cceihsei vae hae. Beor ccapaw Balaam laanpi kha a zui hae. Balaam tuh hoyleinaw raenaw kyate muepaw amee kha a rypaw nynh thua.Ref 2.15-16: Nam 22.4-35
16 Thuasalama a cyiseinaw hanlan aning tuh thuihei athua; byaho leipaw lann nynh ccungccaw roi lante byaho zah tuh-e profehpaw a ngaeenaw kha a khee.
17 Hynh-e hae tuh tui a um leipaw tuisung hae, khisan nynh a mungpaw maeking hae nynh thua hae. Minmin hanlan marae zipaw mohnaw kha zungzae nungpya athua.
18 Pawccecize a cceihseipaw ccungccaw hae kyate oun lue takaw hae paw kha accakaepaw pookunaw bya te thuasah, pynsaw rynaw te thuasah, ohhuakunaw te thuasah minmin nynh a soih hae.
19 Ming hae kha luenaw kong byakinpakuh hae salamah, mimaw tuh ronaw see hae nynh thua hae; pawccecize ccungccaw tuh hankhakheit nynh a tae lanze, aning tuh tuh-e see nynh athua.
20 Pawccecize Bawipaw te Khumtu Jesu Khri nynaw liate laephi nungsikunaw kyate a lue kou hae te, tuh-e hae kya kaang bua kae hae zah tuh-e hae nynh a tae hae lanze, nyalang e minmin thuanaw tuh atakaw laeze houh a seihua vae.
21 Pawccecize adingpaw laanpi kha a nyh kou hae te, minmin kalan pya athuapaw athyaapaw kawbya kyate paleihtawku lae tuh tuh-e adingpaw laanpi kha a la ny khyh hae ze mih hanlan ahoyhua.
22 Thuasalama,
“Ui nynh amaw a lua kha bua a ae,”
te,
“Voh tuh sing koute tuiccua kya
bua a ohkuh,”
a ci hae paw ahmepaw phungtangbya thyhte minmin kya acyikuh.Ref 2.22: Ptb 26.11