3
Zu hae te Vawpaw hae
1 Tuhawte, zu hae nanning, nae vawpaw hae kalan pyakuh oh. Ou tuhte vawpaw lukhakheit nynh Pachia bya kha a ngae khyh zemah, bya hopya liate thua leite zu hae ozia liate thuasah,Ref 3.1: Efe 5.22; Kol 3.18
2 nae kya-e sawtuanaw te athyaapaw nae ozia kha a muihnaw hae liate thuasah minmin kha bua mue nawlan nynh thua.
3 Na ccaankunaw oh paw tuh atolang e ccaankunaw, sangkhekunaw, sui lawkunaw te boeining hoypaw lawkunaw kyalya thua leite,Ref 3.3: 1 Tim 2.9
4 nevyalyapaw te daebabipaw muisaw kya-e arohthya leipaw puithyanaw khate nae thinlung alungkhu e ccungccapaw kha la ccaan oh, tuh-e tuh Pachia malang myarya aphutepaw nynh thua.
5 Pawccecize langmawlya e Pachia a doliakuh hae paw, athyaapaw nopi hae nynh mah tuhcite ccaankuh hae zah mih vawpaw hae kaw kha a ngae hae.
6 Sarah nynh Abraham kaw kha ngae zah bawipaw cite a ko hawte, minmin mah kaw a ngae hae; nanning nynh hurawnaw kha ri leite ahoypaw kha na cyi oh ze, Sarah ccanung hae nynh na thua oh.Ref 3.6: Gen 18.12
7 Tuhawte vawpaw hae nanning, zu hae tuh a thawzya huapaw nopi nynh athua hae cipaw kha nyh oh; hiinnaw te asekuhpaw thawccinaw rho a ccoubua hae paw athua hae hawte sawtuanaw pya oh lah, thaekuthyanaw te umkheih oh; tuh-e tuh nae sawsangnaw akhawpaw a um khyh nawlan nynh thua.Ref 3.7: Efe 5.25; Kol 3.19
Ahmepaw hanlan Teingnaw
8 Nyathyakou ka ho rypaw tuh: nanning balyn nynh alokuhpaw tuanaw hoi oh, thawccikunaw, uteno hawte sungsakunaw, ngaethyaumsakunaw te lungnenaw hoi oh.
9 Hoyleinaw kha hoyleinaw te liaru nan oh, saryanaw kha saryanaw te liaru nan oh lah, hythuanaw khate liaru oh. Pawccecize nanning tuh hythuanaw rho kha ccou khylan kopaw nynh na thua oh.
10 Pawccecize
“Hiinnaw kha ry zah ccyh ahoypaw
a rypaw ccungccaw nynh
a munglae kha hoyleinaw kyate
sungkuh sah lah, a mung kyate
hynbya ho nan sah;Ref 3.10-12: Sam 34.12-16 (LXX)
11 hoyleinaw kha sibia sah lah
ahoypaw kha cyih sah;
daenaw kha ccung sah lah,
daenaw mue lan zuakuh sah.
12 Pawccecize Bawipaw mit nynh
miding hae kha do zah,
a nakaring nynh
mih sawsangnaw kha a thae.
Thuasalama Bawipaw mitmae nynh
hoyleinaw a raetu hae kha a dou.”
13 Nanning tuh hoynaw a rae rypaw na thua oh ze, hum nynh mou vawsaw ae pya cih oh?
14 Thuasalama dingnaw keiccu na teing oh ze, hythua ccoupaw nynh na thua oh. Minmin hurawnaw kha rih nan oh, nae lungvaw mah saw nan sah.Ref 3.14-15: Mat 5.10; Isa 8.12-13
15 Thuasalama nae thinlung kya Khri kha Bawipaw lante sawtua oh. Nae kya umpaw ngaehoinaw konglang ae khia oh paw ccungccaw miakaw kha nebaleih lante, sawtuate hopya lan zungzae paccynkuh oh;
16 ahoypaw mawtemaw nykunaw thinlung kha hoi oh; tuhteze nynh Khri kya ahoypaw nae ozia kha ae ccae oh zah thethya ae ho oh paw ccungccaw hae tuh mih maethah cih.
17 Pawccecize Pachia rynaw athua ze, hoyleinaw raenaw hanlan teing laeze hoynaw raenaw hanlan teing tuh ahoyhua.
18 Pawccecize Khri mah seinaw keiccu vaekheit te phe azaw lan a teing, aening kha Pachia kalan thuakhae khylan adingpaw tuh ading lei hae paw hanlan pynsaw kya chia athua zemah muisaw liate hiinsah athua.
19 Tuh-e muisaw liate Khri nynh mah cceih zah thonginn kya umpaw muisaw hae kha phung a hopya hae.
20 Tuh-e muisaw hae tuh langmawlya Noah she lya sanphalung sak athua lyaze Pachia nynh lungsaete a ngaw lya hae kawngae lei hae paw nynh athua hae, tuh-e sanphalung kya zyataripaw ccungccaw lu tarya kha tui kyate khum athua hae.Ref 3.20: Gen 6.1—7.24
21 Tuh-e tuh atu aening yn khumpaw baptisma muihsahnaw nynh thua. Tuh-e baptisma tuh pynsaw kyate athupaw singpaw kha thua khyh, Jesu Khri thoothuinaw liate ahoypaw mawtemaw nykunaw thinlung kyate Pachia kalan byakinkupaw kha nynh thua.
22 Tuh-e Khri tuh vaawlang kae zah, vaaw hae, kawhoinaw hae te thungnaw hae kha a kuihkaw kya nung zah Pachia ranglang khe a um vae.