11
Laesia Ram kya Byalungnaw
1 Ccungccaw hae nynh mih vawsawnaw kong kha Bawipaw a thaenaw khe he a ccohkuh hae tuh, Bawipaw nynh thae zah a thinrianaw tuh maee lang arua vae. Oute Bawipaw maee nynh minmin kha u hae zah ryahmin akin-akae um hae paw ryanaw bu abang kha a u hae.
2 Te ccungccaw hae nynh Moses kalan a sia hae; Moses nynh Bawipaw kalan sawsang zah maee tuh adae.
3 Bawipaw maee nynh minmin kha a u keiccu hae ze, tuh-e hmin tuh Taberah a ci hae.
4 Israel hae kya a cceihbua hae paw ramccang hae tuh myarya saw rangthua hae; Israel hae nynh mah bua rah hae zah, “Ae lanpaw saw kha, myng ah hoi oh sah lah ii!
5 Izip ram kya ngasaw kha alakawte leih ah ae oh, zinae, phazecci, suin naw, suinse te suinraw kha myarya ngae lang um;
6 thuasalama atu tuh ah thawzung athang vae, hynh-e manna sanlou ho leite tuh pawpaw mah do lanpaw um vae khyh,” a ci hae.
7 Manna tuh koriander amung te lokuh zah azong tuh angro te nynh aloku.Ref 11.7-8: Exo 16.31
8 Ccungccaw hae nynh ccia bungthungte manna kha sueluakuh hae zah, mianawpaw te a miaa hae, tuhkhyhze sung kya a phung hae, oute ang kya thung hae zah sanlou aphepaw lang a rae hae; tuh-e nynh athuapaw tuh chitui te athoukuhpaw sanlou aphepaw nynh athuapaw te nynh aloku.
9 Ryahmin vawlan khuazi khe vuiraw a ccaw vae ze, manna tuh vuiraw ryte leih accahbua.Ref 11.9: Exo 16.13-15
10 Ccungccaw hae nynh mih innbyn raveihte mih bu thuakaw kyakhe mih balyn te a raw hae paw kha Moses nynh a thae. Oute Bawipaw tuh myarya a thinria, te Moses tuh a lunghoy khyh.
11 Tukeiccuze Moses nynh Bawipaw kha, “Pawcce na seepaw tungvaw kya myarya ahoy lei lante nae cyi? E ccungccaw balyn kya-e phupaw kha ka tungvaw nae khang zah pawcce na malang maehoynaw ka mue khyh?
12 E ccungccaw hae balyn hynh ccaaw lang ka poi hae paw zawtou? Mih minpaaw hae kya bya na kinpyaku hae paw ram langkhe, ‘Ccaaw do-oihtu nynh matei a zupaw ccaaw kha a hang hawte, minmin kha na by kya pom hae lah cciakhae hae,’ cite nae hopyapaw tuh, minmin hynh ccaaw lang ka saah hae paw zawtou?
13 E ccungccaw balyn kalan pya lanpaw saw kha tei e mou ka lah cih? Pawccecize minmin nynh raw biate kamaw kalan oun cceih hae zah, ‘Ae lanpaw saw oun pya!’ a ci hae.
14 E ccungccaw balyn hynh ka makhaete ka phu kho lan khyh hae, pawccecize minmin tuh ka hanlan myaryamaw a ri hae.
15 Hynhcite ka tungvaw na cyi lan thua zetuh, kharouh yn theih kangmaw—na malang maehoynaw ka mue lanze, riathaenaw yn tungsah nan,” a ci.
Piccan Sung Sari
16 Tukeiccuze Bawipaw nynh Moses kha, “Ccungccaw hae lakuze piccan lang te minmin a uktu bawi lang na ny hae paw Israel piccan hae sung sari kha kamaw hanlan suelua hae; tungkunaw bu kalan cciakhae hae lah tuin kya namaw ryte thadynsah hae.
17 Kae rungbung cih zah tuin kya nang te byahoku lan; te na tungvaw umpaw muisaw abang kha ka lah cih zah mih tungvaw ka nung cih; phupaw balyn kha na makhaete na phu khyh nawlan, minmin nynh ccungccaw hae kya-e phupaw kha namaw ryte a phubua cih hae.
18 Te ccungccaw hae kha hynhte hopah hae: Awkhualan hanlan thyaasakuh oh lah saw na ae cih oh; pawccecize Bawipaw nynh phe a thae lante na rah oh zah, ‘Ae lanpaw saw kha myng ah hoi oh sah lah ii! Aening hanlan Izip ram maw nynh ahoyhua ccaccing,’ na ci oh. Tukeiccuze Bawipaw nynh saw ae pya cih oh zah na ae cih oh.
19 Nanning nynh saw kha nin kheit, nin ning, nin pangaw, nin haw, nin kuin kyalya thua leite,
20 sah kheit lungkhu—nae naduh kyate saw atolang phe pou lang te nae hanlan luathua-ae-ui phe um lan ciate na ae cih oh—pawccecize nae laku umpaw Bawipaw kha na vua oh zah amaw malang raw biate, ‘Pawcce Izip ram kyate kae la pou?’ na ci oh cite hopah hae,” a cipya.
21 Thuasalama Moses nynh, “Kamaw ka umbuanaw ccungccaw hae kyaze ccu te cceih hae paw hynh cciing taruh acih hae; te nang nynh, ‘Minmin nynh sawpaw sah kheit lungkhu a ae lan hae paw saw ka pya cih hae,’ na ci.
22 Minmin elang chia lanpaw tuuphu te miaa phu tuh phe zaw lan a um tou? Minmin elang kyng lanpaw ngasaw so rili kya phe zaw lan a um tou?” a cipya.
23 Bawipaw nynh Moses kha, “Bawipaw kuih tuh myaryamaw adyn tou? Ka bya hynh na hanlan accing cih tou, ccing lan khyh tou cipaw atu na muih cih,” a cipya.
24 Tukeiccuze Moses nynh atolang pou zah Bawipaw bya kha ccungccaw hae kalan a hopya hae; te ccungccaw piccan sung sari kha pum hae zah bu pepan po voilu lan a nung hae.
25 Oute Bawipaw tuh maeking khate yn rungbung zah Moses kha bya a beih, te Moses kya umpaw muisaw abang kha lah zah piccan sung sari kyakhe a nung; mih tungvaw kya muisaw he a um te, minmin nynh profehbya kha a ho hae. Thuasalama minmin nynh tuhcite bua cyih vae khyh hae.
26 Eldad cikuhpaw te Medad cikuhpaw pise lu ning tuh ryahmin kya um hae zah muisaw tuh mih tungvaw a um; minmin tuh min a riabua hae paw athua hae zemah bu kalan cceih khyh hae, tukeiccuze ryahmin kya profehbya kha a ho hae.
27 Te ccangvaepaw lu kheit nynh ccue zah Moses kha, “Eldad te Medad tuh ryahmin kya profehbya a ho cciamang hae,” a cipya.
28 Te Moses nynh a popaw pise hae lakuze lu kheit athuapaw, Moses a bawmtupaw, Nun ccapaw Joshua nynh, “Ka bawipaw Moses, minmin hynh daesah hae!” a cipya.
29 Thuasalama Moses nynh amaw kha, “Ka hanlan na eiung tou? Bawipaw ccungccaw balyn tuh profeh thua hae sah, Bawipaw nynh a muisaw kha minmin tungvaw nungsah!” a cipya.
30 Te Moses te Israel piccan hae tuh ryahmin lang a cceih hae.
Vamyng hae
31 Oute Bawipaw kyate khisan tuh azaw, te rili kyate vamyng hae kha tuh-e khisan nynh mung hae zah ryahmin pe khe, hynhlang te nin kheit laanccia, khuhlang te nin kheit laanccia, ryahmin balyn po voilu lan, laephi vawlan dong ning athaaw lante a ccawsah.
32 Te ccungccaw hae nynh tuh-e nin, tuh-e zi te awkhualan balyn khe vamyng hae kha a suelua hae; azyahua a sueluapaw nynh homer ccanghaw a suelua; te ryahmin pepan balyn khe rousah khylan a rei hae.
33 Thuasalama vamyng saw tuh mih haw laku a um lya, a ae kou maw hae khe, Bawipaw thinrianaw tuh ccungccaw hae tungvaw maee lang rua zah Bawipaw nynh ccungccaw hae kha myarya lepaw shethya te de a tah hae.
34 Tukeiccuze tuh-e hmin tuh Kibroth-hattaavah a ci hae, pawccecize tuh-e hmin kyakhe saw rangthuapaw ccungccaw hae kha laephi kya a u hae.
35 Ccungccaw hae tuh Kibroth-hattaavah kyate Hazeroth lang a cceih hae.