NEHEMIAH
Nehemiah
Nehemiah ccauh hynh phuin pali lang phia kho athua:
(1) Persia siapharan nynh Judah ram uk lan a sawpaw Nehemiah nynh Jerusalem lang kinaw;
(2) Jerusalem khualungrua raethuinaw;
(3) Ezra nynh Pachia Kawbya kha riapah hae zah zapi hae nynh mih seinaw a phyku hae;
(4) Judah ram mangki Nehemiah nynh ccangpaw a lawpaw rya hae.
Nehemiah tuh Pachia kha myarya a doliakuhpaw thua zah Pachia kalan saw a sang zungzaepaw nynh thua.
1
Nehemiah Sawsangnaw
1 Hakaliah ccapaw Nehemiah bya. Kum kuinnaw kum, Khislev sawpaw lya Susa khuapi kya ka um lyakhe,
2 ka unopaw Hanani tuh Judah ram e ccungccaw abang ryte oun thua hae; te kae nynh seetangnaw kyate a lue hae paw a hiin ung hae paw Judah hae kong te Jerusalem kong kha ka khia hae.
3 Minmin nynh, “Seetangnaw kyate lue hae zah tuin ram kya a hiin ung hae paw tuh myarya ccihpaw vawsawnaw te maethyanaw kha a teing hae; Jerusalem khualungrua tuh ting zah a koikua hae tuh maee nynh marya a ro,” cite a hopya hae.
4 E bya hae he ka thae te, ka haung zah rawkhuite nin patae ka um zah looh-aesungte vaawlang Pachia kalan saw ka sang.
5 “Pou Bawipaw , vaawlang Pachia, nang ae sungsah hae paw te na kawbya a zui hae paw tungvaw kya byakinnaw te atynpaw na sungsahnaw kha na tynsahtupaw, lesae zah ri lan umpaw Pachia,
6 Israel ccungccaw hae nynh na tungvaw kae seinaw kha phykute, na ryalahtu Israel ccungccaw hae hanlan na ryalahtupaw kae nynh khuazi khuadae namaw malang saw ka sangpaw hynh thaepya khylan beih yn ngaepah lah, beih yn dotua. Kae te ka puizia hae tuh kae sei vae.
7 Na tungvaw myaryamaw kae sei zah, na ryalahtu Moses kya kaw na pyapaw kawbya hae, kawbya hae te phungzae hae kha kae zui khyh.
8 Na ryalahtu Moses kha kaw na pya zah, ‘Nae lungzi khyh zetuh, minphuin hae laku kya kae phiasakuh cih oh;Ref 1.8: Lev 26.33
9 thuasalama ka kalan nae ki oh zah ka kawbya hae kha na zui oh zah na rae oh zetuh, a theihrya hae paw nae ccungccaw hae kha vaawlui zakaw asaw huaccenaw lang dee athua hae zemah, tuin kyate ka pum cih hae zah ka min tynsah nawlan ka popaw hmin kalan ka cciakhae cih hae,’ na cipyapaw bya kha liathuitua.Ref 1.9: Deu 30.1-5
10 Minmin tuh alesaepaw na huhan te athawsaepaw na kuih te na shawkhaw hae paw na ryalahtu hae te na ccungccaw hae nynh thua.
11 Pou Bawipaw, na ryalahtupaw sawsangnaw hynh beih thaetua, te na min sawtuanaw kya a lungrythuapaw na ryalahtupaw sawsangnaw hynh beih thaetua. Atunin na ryalahtupaw hynh laansui-uanaw yn pya lah, e ccungccapaw muihnaw kya thawccinaw beih yn pyatua!” cite saw ka sang.
Tuh lya tuh kae tuh siapharan banang kyngtu nynh ka thua.