22
Zudy Poi Tousenaw
(Luk 14.15-24)
1 Jesu nynh ccungccaw hae kha tousenaw phungpaw hae te bua a hopya hae. A hopaw tuh:
2 “Vaawlang peenaw tuh a ccapaw hanlan zudy poi a tuapaw siapharanpaw te nynh aloku.
3 Zudy poi kalan thuabua lan a ko hae paw kha kosah lan hae a see hae kha a saw hae; thuasalama minmin tuh oun thua ry khyh hae.
4 Ccangpaw a see hae kha bua saw hae zah, ‘Kopaw ccungccaw hae kha hynhte la hopah oh: Dotua oh, ka loohdangkunaw tuh ka paccyn kou vae, ka tangnuapaw hae te athopaw sahiin hae kha phe ka chia vae, pawpaw balyn tuh paccyn athua vae, zudy poi loohdangkunaw kalan rang ccavae oh,’ cite a hosahpya hae.
5 Thuasalama minmin nynh tuh-e tuh pawlangria leite mih rynaw lang a cceih hae, lukheitpaw nynh a loo lang cceih zah ccangpaw lu kheit nynh a kungkunaw lang a ccia.
6 Te tuhlae hae nynh tuh-e see hae kha kyng hae zah sarisarya zuenah hae zah a chia hae.
7 Thuasalama siapharan tuh myarya a thinria zah a rhawkaw hae kha saw hae zah tuh-e ccungccatheih hae kha a chiasah hae, te mih khuapi kha maee te a soipya hae.
8 Tukoute a see hae kha, ‘Zudy poi tuh paccyn phe athua vae, thuasalama ko hae paw tuh ngaekuh vae khyh hae.
9 Tukeiccuze nanning nynh laanluepi hae kalan la cceih oh lah na muih oh paw ccungccaw miakaw kha zudy poi kalan oun ko oh,’ cite a hopya hae.
10 Tukeiccuze tuh-e see hae tuh laanluepi hae kalan cceih hae zah, a muih hae paw ccungccaw miakaw kha athah ahoy ci leite pum hae zah zudy poi tuh mikhia hae ryte phe abeih vae.
11 “Siapharanpaw nynh mikhia hae do lan he yn tee tuh zudy poi boeining a lawkuh leipaw ccungccaw lu kheit kha he a muih tuh,
12 ‘Ka ban, pawccemou zudy poi boeining lawku leite hynhlang nae tee?’ a cipya. Tuh-e paw nynh yccae khyh.
13 Tetuh siapharanpaw nynh a see hae kyakhe, ‘A kuih te a ccu kha he oh lah, rawkhuinaw te hawzynaw a umnaw atolang mohnaw kalan khe vua oh,’ a cipya hae.
14 Pawccecize kopaw tuh alung, thuasalama popaw tuh azya,” a ci.Ref 22.13: Mat 8.12, 25.30; Luk 13.28
Pachia Uccaw te Sizar Uccaw
(Mar 12.13-17; Luk 20.20-26)
15 Farasi hae nynh cceih hae zah Jesu nynh a hopaw kya pawtemou kaangsyakhaw lan cipaw khua a khanku hae.
16 Minmin nynh Herod pati hae ryte mimaw zuitu hae kha Jesu kalan saw hae zah, “Sazae, nang tuh ahmepaw nynh na thua, Pachia laanpi kha hmerarih lan na ccangpah hae zah mirymihua na tua khyh; pawccecize nang tuh ccungccaw hae mae na do khyh cipaw kae ny.
17 Tukeiccuze na tuanaw kha oun hopya tua. Sizar kalan ngunto pya lan accan tou, ccan khyh tou?” cite a khiasah hae.
18 Jesu nynh a thyaruhnaw hae kha phe nyh zah, “Thyaruh hae, pawccemou kae hynh nae syntawtua oh?
19 Ngunto lang pya lanpaw phua tuh yn dosah tua oh,” a ci. Te minmin nynh denari kia kheit kha oun ccyngpya hae.
20 Jesu nynh minmin kha, “E hynh hum muinsan te hum min mou?” cite a khia hae.
21 Minmin nynh, “Sizar muinsan te min,” a ci hae. Te Jesu nynh, “Tukeiccuze Sizar uccaw kha Sizar kalan pya oh lah, Pachia uccaw kha Pachia kalan pya oh,” cite a khung hae.
22 Minmin nynh tuh-e bya he a thae hae tuh mih ngaeangthua; te amaw kha po cciataw hae.
Thoothuinaw Kong Byakhianaw
(Mar 12.18-27; Luk 20.27-40)
23 Tuin nin khe thoothuinaw um khyh a cih hae paw Sadusi hae tuh Jesu kalan oun thua hae zah hynhte a khia hae:Ref 22.23: Loc 23.8
24 “Sazaepaw, ‘Ccungccapaw lu kheit nynh ccaawsaah leite a zu kha a chitaw ze, tuh-e paw a neitawpaw nynh tuh-e zu tuh a umkhae cih zah a upaw elang ccaaw a saahpah cih,’ cite Moses nynh a la ho.Ref 22.24: Deu 25.5
25 Atu kaening laku kya uno lu sari a umbua hae; atawccapaw tuh zu hoi zah ccaawsaah leite phe a chih, a zu kha a neitawpaw nynh zu lang a hoi.
26 Tuhawte lu ningnaw nynh zu lang bua a hoi, te lu thumnaw kyate lu sarinaw kyacia tuhcite a cyihkuh.
27 Nyathyakou tuh tuh-e nopinung mah a chihbua.
28 Tukeiccuze thoothuinaw kya tuh-e nung tuh lu sari hae kyaze hum zu lang mou a tang cih? Pawccecize tuh-e nung tuh mih balyn zu lang phe a tang vae,” a ci hae.
29 Jesu nynh minmin kha, “Nanning tuh na mesei oh; Ccathyaa thuasah, Pachia thungnaw thuasah na ny khyh oh keiccu nynh thua.
30 Pawccecize thoothuinaw kya tuh zuvaw tang ci um vae khyh, zu dypyaku ci mah um vae khyh, minmin tuh vaawlang e vaaw hae hawte nynh athua vae hae.
31 Thuasalama a chih hae paw thoothuinaw konglang te Pachia nynh ae hopya oh paw kha na ria boi khyh oh tou? A hopaw tuh:
32 ‘Kae tuh Abraham Pachia, Isak Pachia te Jakob Pachia nynh ka thua,’ a ci. Pachia tuh a chih hae paw Pachia thua khyh, a hiin hae paw Pachia nynh thua,” cite a hopya hae.Ref 22.32: Exo 3.6
33 Ccungccaw zapi nynh tuh-e bya he a thae hae tuh a ccangpyanaw kha mih ngaeangthua.
Abyapi huapaw Kawbya
(Mar 12.28-34; Luk 10.25-28)
34 Jesu nynh Sadusi hae kha zya a daesah hae cipaw kha Farasi hae nynh a thae hae tuh pynkheihlan a tungkuh hae.
35 Minmin kyaze kawbya sazae lu kheit nynh Jesu kha syntawtua khylan hynhte bya a khia:Ref 22.35-40: Luk 10.25-28
36 “Sazaepaw, kawbya kyaze paw kawbya mou alehua?” cite a khia.
37 Jesu nynh, “ ‘Bawipaw na Pachia kha na thinlung balyn te, na hiinnaw balyn te, na tuanaw balyn te na sungsah cih,’ acikuh.Ref 22.37: Deu 6.5
38 E hynh ale huapaw te abyapi huapaw kawbya nynh thua.
39 Ccangningnaw tuh tuh-e te alokuh. ‘Na innpaw kha namaw toulou hawte na sungsah cih,’ acikuh.Ref 22.39: Lev 19.18
40 Kawbya balyn te profeh ccauh hae balyn tuh hynh-e kawbya ccangning kyahin marya akyngkuh,” a cipya.
Messiah Kong Byakhianaw
(Mar 12.35-37; Luk 20.41-44)
41 Farasi hae tuh pynkheihlan a pumku lya hae khe Jesu nynh,
42 “Messiah hynh pawtemou na tua oh? Aning tuh hum ccaaw mou athua?” cite a khia hae. Minmin nynh, “David Ccapaw nynh thua,” a ci hae.
43 Jesu nynh, “Tuhteze pawccemou David nynh Muisaw liate amaw kha Bawipaw a ci. David nynh,
44 ‘Bawipaw nynh ka Bawipaw kha,
“Na rhaw hae kha na ccu kaw kya
ka nung mawlaezung tuh
ka ranglang khe
haung,” a cipya,’ a ci.Ref 22.44: Sam 110.1
45 David nynh Messiah kha Bawipaw cite a ko lanze, pawtemou Messiah tuh David Ccapaw athuathya cih?” cite a khia hae.
46 Te bya kaw kheit a khung khopaw hum sanmah um khyh; tuh-e nin kyate hum nynh sanmah byakhia ngan vae khyh hae.