20
Misu Khokhu Ryalahtu hae
1 “Pawccecize vaawlang peenaw tuh a misu khokhu elang ryalahtu hae hoh lan cite awkhua takaw te a cceihpaw khokhu hoitupaw te nynh aloku.
2 Aning nynh nin kheit ze denari kia kheit pya lante ryalahtu hae ryte nawccawnaw kha rae zah minmin kha a misu khokhu lang a saw hae.
3 Awkhua suimilan ccangtakua loukaw khe pou zah kungkunaw kya paw ryalaw leite a thadyn hae paw mingccang hae kha a muih.
4 Te minmin kha, ‘Nanning mah misu khokhu lang la cceihbua oh lah accan thyhte kae pya cih oh,’ a cipya hae. Te minmin mah a cceihbua hae.
5 Ninthuccynglyn loukaw te zete suimilan ccangthum loukaw khe bua cceih zah tuhcih maminte bua a cyi.
6 Te suimilan ccangpangaw loukaw khe bua cceih zah, paw ryalaw leite a thadyn hae paw mingccang hae kha muih zah, ‘Pawccemou hein kya ryalaw leite ninlang na thadyn oh?’ cite a khia hae.
7 Minmin nynh, ‘Hum nynh sanmah oun paw khyh hae keiccu,’ a ci hae. Aning nynh, ‘Nanning mah misu khokhu lang la cceih oh lah accan thyhte na mue cih oh,’ a cipya hae.
8 Zete he yn thua tuh misu khokhu hoitupaw nynh a ryaccinkhanpaw kyakhe, ‘Ryalahtu hae kha ko hae lah nyathyakou a teepaw kyate masaty a teepaw kyacia mih ryalaw mee kha pya hae,’ a cipya.Ref 20.8: Lev 19.13; Deu 24.15
9 Te suimilan ccangpangaw loukaw kya ryalaw a tee hae paw tuh oun thua hae zah denari kia kheit cci a mue hae.
10 Masaty ryalaw a tee hae paw he oun thua hae tuh mimaw tuh alunghua kae mue cih cite a tuaku hae; thuasalama minmin mah denari kia kheit cci nynh a mue hae.
11 Tuh-e tuh a lawkuh kou hae te minmin nynh khokhu hoitupaw kha ccoh hae zah,
12 ‘E hae nyathyakou oun tee hae paw tuh suimilan ccangkheit kyalya nynh ryalaw hae, khuaninso teingte ninlang rya kae lahpaw kaening te minmin kha phe na losaku bua hae,’ a cipya hae.
13 Thuasalama aning nynh minmin kyaze lukheitpaw kha, ‘Ka ban, na kya ka cyihsei khyh, denari kia kheit te ryalaw lan na nawccah khyh tou?
14 Na ccanpaw hynh lawkuh lah la cceih ccavae; hynh-e nyathyakou e paw hynh nang te phe lokuh lan ka pya ry.
15 Ka uccaw te ka cyi rypaw cyinaw kaw ka hoi khyh tou? Tuhkhyhze hysahnaw ka hoi keiccuze nang tuh na eiung tou?’ a cipya.
16 Tukeiccuze nyathyakou e hae tuh masaty athua cih hae zah masaty e hae tuh nyathyakou athua cih hae; ccungccaw patae tuh ko athua hae, thuasalama beihtaraw nynh po athua hae,” a ci.Ref 20.16: Mat 19.30; Mar 10.31; Luk 13.30
A Chi lanpaw Bua A Hoty
(Mar 10.32-34; Luk 18.31-34)
17 Jesu nynh Jerusalem lang a cciathung lyaze zuitu hae lu haw lae ning kha mih makhaete ccanglang cciakhae hae zah,
18 “Ngaetua oh, aening tuh Jerusalem lang ah cceihthung oh, te Ccungccaw Ccapaw tuh ranpibawi lepaw hae te kawbya sazae hae kalan oun ap cih hae zah chia lan sei oun be cih hae.
19 Amaw kha sarya khylan, bua khylan te khiade khylan Zenta hae kuih kalan oun pya cih hae; te nin thumnaw kya bua yn thoothui cih,” a cipya hae.
Johan Nung nynh Ngianaw
(Mar 10.35-45)
20 Te Zebedi ccaaw hae mih nung tuh a ccaaw hae ryte Jesu kalan oun thua hae, a malang khe bakhung zah thawccinaw a ngiaku.
21 Jesu nynh, “Pawmou na ry?” cite a khia. Nopinung nynh, “E ka ccaaw hae lu ning nynh na peenaw kya na ranglang lu kheit, na voilang lu kheit a haungbua nawlan hae bya beih yn kinpakuh,” a cipya.
22 Jesu nynh, “Paw nynh kae ngia cipaw na nyh khyh oh. Ka nia lanpaw banang hynh na neih kho cih oh zawtou? Kae nynh baptisma ka in lanpaw kha na inbua kho cih oh zawtou?” cite a khia hae. Minmin nynh, “Kae cyih kho cih,” a ci hae.
23 Jesu nynh minmin kha, “Nanning nynh ka banang kha na neih ccaccing cih oh zah baptisma ka in lanpaw kha na inbua cih oh; thuasalama ka ranglang te ka voilang haungnaw kaw kha kae nynh ka pya kho khyh, tuh-e dahungnaw tuh ka Paaw nynh a paccynpya hae paw hanlan nynh thua,” a cipya hae.
24 Zuitu lu haw nynh tuh-e tuh he a thae hae tuh uno lu ning tungvaw mih thinria.
25 Thuasalama Jesu nynh minmin kha ko hae zah, “Zenta hae a uktu hae nynh tuh uknaw kaw khate a uk hae, te a lesae hae paw nynh kawhoinaw kha a mang hae cipaw na ny oh.Ref 20.25-26: Luk 22.25-26
26 Tuhzemah nanning kya tuh tuhte thua lan khyh, thuasalama nanning laku a lesaepaw lang a tang rypaw tuh nae ryalahtu lang a tang hahe cih.Ref 20.26-27: Mat 23.11; Mar 9.35; Luk 22.26
27 Humhung zemah nanning lakuze lupihua lang a tang rypaw tuh nae see lang a tang hahe cih.
28 Tuhawte Ccungccaw Ccapaw tuh rya lawpyaku khylan yn thua khyh; ming hae rya kha lawpya khylan te ccungccaw patae shawkhaw nawlan a hiinnaw kha pyaku khylan nynh yn thua,” cite a hopya hae.
Mitmoh hae Lu Ning A Dansah
(Mar 10.46-52; Luk 18.35-43)
29 Jesu te a zuitu hae nynh Jeriko khua te he a pou hae tuh ccungccaw zapi nynh amaw kha a zui hae.
30 Laanpi pe a haung hae paw mitmoh hae lu ning nynh Jesu po a cceih cipaw he a thae hae tuh, “Bawipaw, David Ccapaw, kaening hynh ngaethya beih oun umsah!” cite a sia hae.
31 Te ccungccaw zapi nynh minmin kha zya a dae ccaw hae cite a sianua hae; thuasalama minmin nynh, “Bawipaw, David Ccapaw, kaening hynh ngaethya beih oun umsah!” cite houh a sia hae.
32 Jesu nynh a thadyn lante minmin kha ko hae zah, “Nae hanlan pawmou nae cyisah ry oh?” cite a khia hae.
33 Minmin nynh, “Bawipaw, kae mit hynh ngaw oun muih sah,” a ci hae.
34 Tukeiccuze Jesu nynh ngaethyaumsah hae zah mih mit kha a hae, te vaekheihmawte mih mit tuh ngawmuih zah amaw kha a zui hae.