14
Jesu Chia lan Pheenaw
(Mat 26.1-5; Luk 22.1-6)
1 Kawtaw Poi te Ransi phing leipaw Sanlou Poi tua nawlan nin ning nynh a ry vae. Ranpibawi lepaw hae te kawbya sazae hae nynh Jesu kyngnaw lanpaw te chianaw lanpaw laanpi kha aruh lante a ccung hae.Ref 14.1: Exo 12.1-27
2 Thuasalama minmin nynh, “Poi lya tuh thua nan sah, tuhkhyhze tuh ccungccaw hae pong oun pokuh sei cih hae,” a ci hae.
Bethani kya Zimuin Thuh hae
(Mat 26.6-13; Joh 12.1-8)
3 Jesu tuh Bethani khua kya vaethya a kaepaw Simon inn kya haung zah a ae lyakhe, nopinung lu kheit nynh myarya amee rupaw zimuin alabasta lung rawpaw bu kheit kha yn ccyng zah abu kha koi zah Jesu lu kha a bu.Ref 14.3: Luk 7.37-38
4 Minmin laku e ccungccaw abang tuh mih thinria zah, “Pawccemou e zimuin hynh alakaw lan a tangsah han?
5 Pawccecize denari phua za thum lae lang zua lan zah ryachi hae pya lanze ahoypaw,” cite hokuh hae zah tuh-e nung kha a seisah hae.
6 Jesu nynh, “Khah-e nung kha amaw um lan um sah, pawccemou vawsaw na pya oh? Aning nynh ka tungvaw kya ahoypaw rya kha a law vae.
7 Pawccecize ryachi hae tuh nae kya zungzae a um hae, na ry takyh oh te mih tungvaw hoynaw na rae kho oh; thuasalama kae tuh nae kya zungzae ka um lan khyh.Ref 14.7: Deu 15.11
8 Aning nynh a cyi khopaw kha a cyi vae; aning tuh ka rhua ccynaw hanlan ka pyn hynh zimuin yn thuh ty vae.
9 Byaccaccing kae hopya oh, laephi pynpi kya thehoypaw honaw miakaw kya hynh-e nopinung nynh a cyipaw hynh mah amaw liathui nawlan a la hobia cih hae,” a cipya hae.
Judas nynh A Nawccaw
(Mat 26.14-16; Luk 22.3-6)
10 Lu haw lae ning lakuze lu kheit athuapaw Judas Iskariot tuh Jesu kha ap khylan ranpibawi lepaw hae kalan a cceih.
11 Tuh-e tuh he a thae hae te, myarya mih lungtua zah phua pya lante bya a kinpyaku hae. Tukeiccuze Judas nynh Jesu pheethyanaw ccyhhoy kha palei a ccung vae.
Kawtaw Poi Zerya Mangkheihnaw
(Mat 26.17-25; Luk 22.7-14, 21-23; Joh 13.21-30)
12 Ransi phing leipaw Sanlou Poi masaty nin, Kawtaw Poi elang tuutaw te si a law nin hae khe, a zuitu hae nynh Jesu kha, “Kawtaw Poi zerya na mang nawlan kae la cceih cih zah pawkyamou paccyn hae sah ci nae ry?” cite a khia hae.
13 Jesu nynh a zuitu hae lu ning kha saw hae zah, “Khua lungkhu lang la cceih oh lah dawre te tui yn thepaw ccungccapaw kha na la tungkuh cih oh; amaw kha la zui oh;
14 a teenaw e inn hoitupaw kha, ‘Sazaepaw nynh, “Ka zuitu hae ryte Kawtaw Poi zerya kae mangnaw lanpaw mikhia khaan tuh pawkyamou a um?” a ci,’ cite la hopah oh.
15 Te aning nynh a paccyn ty vae paw, akopaw palung khaan kha ae la muihsah cih oh; tuin kyakhe aening hanlan la paccyn oh,” cite a hopya hae.
16 A zuitu hae tuh cceih hae zah khuapi lungkhu a thua hae; Jesu nynh a hopya hae hawte a muih hae; te minmin nynh Kawtaw Poi zerya kha a paccyn hae.
17 Zetesang khe Jesu tuh zuitu lu haw lae ning ryte oun thua hae.
18 Minmin tuh haung hae zah a ae lya hae khe Jesu nynh, “Byaccaccing kae hopya oh, kamaw te kae aekheihpaw nanning laku e lu kheit nynh kae hynh yn phee cih,” a ci.Ref 14.18: Sam 41.9
19 Zuitu hae tuh mih ngaethah zah, “Kae ka thua khyh khaw?” cite lu kheit koute lu kheit nynh a khia hae.
20 Jesu nynh khung hae zah, “Tuh-e paw tuh lu haw lae ning lakuze lu kheit, kamaw te pake kae pukheihpaw nynh thua.
21 Ccathyaa kya amaw kong azeiku thyhte Ccungccaw Ccapaw tuh a chih cih; thuasalama Ccungccaw Ccapaw a pheetupaw hanlan ngaethya lan kou um! A la pui khyh ze amaw hanlan ahoyhua cih paw,” a cipya hae.
(Mat 26.26-30; Luk 22.14-20; 1Kor 11.23-25)
22 Zerya a mang lya hae khe Jesu nynh sanlou kha lah zah lungtuabya a ho koute eih zah minmin kha a pya hae; te, “Lawkuh oh; e tuh ka pyn nynh thua,” a cipya hae.
23 Tukoute banang kha lah zah lungtuabya a ho koute minmin kha pya hae zah mih balynte a neih hae.
24 Jesu nynh, “E tuh ccungccaw patae hanlan ka laepaw ka chiise, Pachia byakinnaw a tynsahpaw nynh thua.Ref 14.24: Exo 24.8; Jer 31.31-34
25 Byaccaccing kae hopya oh, Pachia peenaw kya misutui thawpaw ka nia mawlaezung hynh-e misutui hynh ka neih boi vae lan khyh,” a cipya hae.
Peter nynh A Vua lanpaw A Hoty
(Mat 26.31-35; Luk 22.31-34; Joh 13.36-38)
26 Hlaw hlakheit a sah kou hae te Oliv Mua lang a cceih hae.
27 Jesu nynh minmin kha, “Nae balynte nae ccuetaw cih oh; pawccecize Ccathyaa kya,
‘Tuurinpaw kha ka bua cih zah
tuu hae tuh oun phiakuh cih hae,’
cite azeikuh.Ref 14.27: Zek 13.7
28 Thuasalama ka thoothui koute, nae malang Galilee lang ka la cceih ty cih,” a cipya hae.Ref 14.28: Mat 28.16
29 Peter nynh, “Ming hae balyn nynh ae ccuetaw hae zemah kae tuh kae ccuetaw lan khyh,” a cipya.
30 Jesu nynh Peter kha, “Byaccaccing kae hopya, atunin, atu khuazi kya aw vae ning a khua mawze vae thum nae vua cih,” a cipya.
31 Thuasalama Peter nynh houh ccih lante, “Namaw ryte chikheih lan accan zemah kae vua lan khyh,” a ci. Zuitu hae balyn nynh tuhcite a ho kalang hae.
Gethsemane kya Jesu Sawsang
(Mat 26.36-46; Luk 22.39-46)
32 Gethsemane a cinaw hae hmin kya thua hae zah, Jesu nynh a zuitu hae kha, “Saw ka sang loukaw hein kya la um oh,” a cipya hae.
33 Peter, James te Johan kha a hoeibua hae; a lungvawsaw zah myarya a lungriathae vae.
34 Minmin kha, “Chikhaeku lan ciate myaryamaw ka lungriathae; hein kya la um oh lah la ngaw oh,” a cipya hae.
35 Takyh asawnaw lang a cceih koute laekhu kya bakhung zah, athua kho ze tuh-e accyh tuh amaw kyate alia nawlan saw a sang.
36 “Apang, ka Paaw, nang na hanlan tuh pawpaw balyn marya athua kho; e banang hynh ka kyate beih yn lawpah; tuhzemah kae ka ry hawte thua nan sah, na ry hawte thua sah,” a ci.
37 Te yn thua zah minmin a ih hae paw kha a muih; Peter kha, “Simon, na ih tou? Suimilan ccangkheit san na ngaw kho khyh tou?
38 Tounaw lungkhu lang na ccawsei khyh nawlan oh sawsang oh lah ngaw oh. Thinlung nynh tuh ry salamah pynsaw tuh a thawzya,” a cipya.
39 Jesu tuh bua cceih zah a homae hawte saw bua a sang.
40 Bua yn ki zah minmin a ih hae paw kha a muih; mih mit tuh daekuh vae khyh; pawtemou khung lan cipaw san nyh vae khyh hae.
41 Vae thumnaw bua thua zah minmin kha, “Palei na ih ung oh tou? Na haeung ung oh ii? Azaw vae! Accyh yn thua vae. Dotua oh, Ccungccaw Ccapaw tuh misei hae kuih kalan pya athua vae.
42 Tho oh, cceih ccavae oh sih. Dotua oh, kae yn pheetupaw tuh yn thua vae,” a cipya hae.
Jesu Kyngnaw
(Mat 26.47-56; Luk 47-53; Joh 18.3-12)
43 Tuhte a ho cciamang lyakhe lu haw lae ning kyaze lu kheit athuapaw Judas tuh ranpibawi lepaw hae, kawbya sazae hae te piccan hae nynh oun saw hae paw ccungccaw zapi ryte, thaloi hae te tungbang hae ccyngkute vaekheihmawte oun thua vae hae.
44 A pheetupaw nynh minmin kha syntawnaw la pyaty hae zah, “Kae nynh kae myngpaw tuh na kyng ry oh paw ccungccapaw nynh thua; amaw kha kyng oh lah khyndadyh lan cciakhae oh,” a cipya hae.
45 Judas nynh he yn thua takaw te Jesu kalan palou cceih zah, “Sazae!” ci zah a myng.
46 Te minmin nynh Jesu kha kyng hae zah a khii hae.
47 A pe a thadynpaw lu kheit nynh thaloi kha thuaakuh zah ranpibawi lupi a seepaw kha a nakua thoh pae lan a bae.
48 Jesu nynh, “Kae hynh miruh hawte kyng khylan thaloi te tungbang te nae ccianua oh tou?
49 Nin takyhte beikinn kya nanning ryte ka um zah kae ccangpya lya oh ze nae kyng khyh oh; thuasalama Ccathyaa tuh ccing sah,” a cipya hae.Ref 14.49: Luk 19.47, 21.37
50 Zuitu hae balyn nynh amaw kha cciataw hae zah a ccuetaw vae hae.
51 Boei zung kheit kyalya a zingkuhpaw ccangvaepaw nynh Jesu kha a zui; minmin nynh tuh-e paw tuh a kyng hae;
52 aning nynh boei kha ccuetaw zah a sasete po a ccue.
Ranpibawi Lupi malang Jesu
(Mat 26.57-68; Luk 22.54-55, 63-71; Joh 18.13-14, 19-24)
53 Tetuh minmin nynh Jesu kha ranpibawi lupi kalan a cciakhae hae; tuin kyakhe ranpibawi lepaw hae balyn, piccan hae te kawbya sazae hae tuh a la pumkuh hae.
54 Peter nynh Jesu kha ranpibawi lupi maepaw kyacia asawnaw te a zui; te aning tuh rhawvia hae kyakhe haungbua zah maee a ekuh bua.
55 Ranpibawi lepaw hae te kungsi hae balyn nynh Jesu kha chia khylan ccaekia kha a ccungnua hae; thuasalama muih khyh hae.
56 Pawccecize ccungccaw patae nynh ahme leipaw ccaekia kha a khan hae, thuasalama mih ccaekia hae tuh lokuh khyh hae.
57 Ccungccaw abang nynh thadyn hae zah ahme leipaw ccaekia kha hynhte a khan hae:
58 “E paw nynh, ‘Kuih te sakpaw e beikinn hynh ka roh cih zah kuih te sak leipaw ccangpaw beikinn kha nin thum lungkhu ka sak cih,’ cite a hopaw kae thae,” a ci hae.Ref 14.58: Joh 2.19
59 Thuasalama mih ccaekia tuh lokuh khyh.
60 Te ranpibawi lupi nynh mih malang khe thadyn zah Jesu kha, “Kaw kheit san na khung khyh hae rei? Ccaekia ae khannua hae paw hynh pawtemou athua?” cite a khia.
61 Thuasalama aning nynh yccae khyh, kaw kheit san khung khyh. Tuinte ranpibawi lupi nynh, “Alesaepaw Pachia Ccapaw, Messiah na thua tou?” cite bua a khia.
62 Jesu nynh, “Ka thua; te
nanning nynh Ccungccaw Ccapaw tuh
Alesaepaw ranglang kya
a haungpaw te
vaawlang e maeking kyate
yn rungpaw kha nae muih cih oh,” a ci.Ref 14.62: Dan 7.13
63 Tetuh ranpibawi lupi nynh a boeining kha seii zah, “Ccangpaw paw ccaekia mou aho ung?
64 Pachia saryanaw bya a hopaw kha phe na thae vae oh! Pawte na tua oh?” cite a khia hae. Minmin balyn nynh aning tuh chi lan accan cite sei a be hae.Ref 14.64: Lev 24.16
65 Ccungccaw abang nynh Jesu kha mih tuing te a thoi hae, a mae kha phang bong hae zah a thung hae, te “Profehbya hotua!” a ci hae. Rhawviatu hae nynh mah cciakhae hae zah a bia hae.
Peter nynh Jesu A Vua
(Mat 26.69-75; Luk 22.56-62; Joh 18.15-18, 25-27)
66 Peter tuh inn voidu akawlan sang a um lyakhe ranpibawi lupi rya a lawpatunung lu kheit nynh yn thua zah,
67 maee a ekuhpaw Peter kha he a muih tuh, amaw kha riri do zah, “Nang hynh mah Nazareth paw Jesu ryte na umkheih oh paw nynh na thua,” a cipya.
68 Thuasalama Peter nynh pheikuh zah, “Na hopaw tuh ka nyh khyh, thae mah ka thaethya khyh,” a cipya. Peter tuh sakoih pe lang po a cceih; te aw yn khua.
69 Ryalawpatu nopinung nynh Peter kha bua muih zah, tuin pe a thadyn hae paw kyakhe, “E paw hynh minmin kyaze lu kheit nynh athuabua,” a cipya hae.
70 Thuasalama Peter nynh bua a pheiku. Khuekheit cih koute tuin a thadyn hae paw nynh Peter kha, “Thanccingte nang tuh minmin kyaze lu kheit nynh na thua; pawccecize nang tuh Galilee paw nynh na thua,” a ci hae.
71 Thuasalama Peter nynh, “Na ho oh paw ccungccapaw tuh ka nyh khyh,” cite thyalawkuh zah bya a kinku.
72 Tuh ccyh lyakhe vae ningnaw aw ccahe yn khua. Tetuh, “Awkhungpaw vae ning a khua mawze, vae thum nae vua cih,” cite Jesu nynh a hopyapaw bya kha Peter nynh liathui zah thawte a rah.