MIKAH
Micah
Mikah tuh Isaiah ccyh lyaze alia peenaw Judah ram e khua khuakheit kyate yn langkuhpaw nynh thua. Amos nynh thahlang peenaw kya a thua cih cite a hodaepaw vawsawnaw tahawpaw kha alia peenaw kya mah a thuabua cih cipaw Mikah nynh a ny. Ccungccaw hae tuh a ding khyh hae keiccuze Pachia nynh de a tah cih hae. Thuasalama Mikah nynh a hopaw bya kyakhe malang ccyh hanlan ngaehoinaw a um cipaw accaehua lante a um.
Ccykeku lanpaw byatue hae tuh Pachia liate laephi vawlan daenaw a um cih (4.1-4), David ciihan kyate alesaepaw siapharan yn langkuh cih zah minphuin elang daenaw yn thuakhae cih cipaw hodaenaw (5.2-5a); Israel profeh hae nynh a ho hae paw patae kha adynnawte byatue ccangkheit kyalya te 6.8 kya langsakuh zah, “Bawipaw nynh aening oun ngiapaw tuh: dingrarih lante cyi lanpaw, thawccinaw hoi lanpaw te zakawsangsakute Pachia malang hiin lanpaw kha nynh thua,” a ci.
1
1 Judah siapharan Jotham, Ahaz te Hezekiah ccyh lyaze Samaria te Jerusalem konglang, Moresheth khuapaw Mikah kalan yn thuapaw Bawipaw bya.Ref 1.1: 2Si 15.32—16.20, 18.1—20.21; 2Sh 27.1-7, 28.1—32.33
Samaria tungvaw Byapianaw
2 Ccungccaw hae,
nae balynte thaetua oh;
Pou laephi te a lungkhu kya
um hae paw balyn, ngaetua oh;
Bawipaw PACHIA nynh
a beikinn thyaapaw kyate
nanning kha rawsete
ccaekia lang tang vae sah.
3 Bawipaw tuh a umnaw hmin kyate
poute yn rungbung cih zah,
laephi ahangnaw hmin hae kyakhe a sy cih.
4 Tetuh maee pe umpaw
khoilung hawte, mua hae tuh
amaw zakaw khe atui cih hae zah,
apannaw hmin kya tui alua hawte
accya hae tuh a pawkhaekuh cih hae.
5 E hae balyn tuh Jakob a seimenaw te
Israel hae seinaw keiccu nynh thua.
Jakob a seimenaw tuh pawmou athua?
Samaria khua kha thua khyh tou?
Judah kya-e ahangpaw hmin tuh
pawmou athua?
Jerusalem kha thua khyh tou?
6 Tukeiccuze Samaria khua tuh
ramkaw umpaw arohpaw
apumkuhpaw lang ka rae cih zah
misu linnawpaw khokhu lang ka rae cih.
Samaria a lung hae kha
accya kya ka lae cih hae zah,
khua aleihpaw hae kha
raerae ka langsah cih.
7 A zohtuh hae balyn kha
zoihtatyh lan koi athua cih zah,
a ryalaw mee balyn kha
maee te u athua cih,
a zohtuh hae balyn kha ka roh cih;
a ohhuakunaw mee
a sueluakupaw uccaw hae kha
ohhuakunaw mee lang
bua pya athua cih.
Judah Khuapi hae Ronaw
8 Hynh-e keiccuze ka rah ka khui cih;
phanah nawku leite
ka ccakaete ka cceih cih;
suizaw hawte ka sia cih zah,
kalauh pavaw hawte ka rah cih.
9 Samaria vaemaw tuh dan kho vae khyh.
Tuh-e vaemaw tuh
Judah kyacia a thua vae;
ka ccungccaw hae a umnaw hae
Jerusalem koikua cia a thua vae.
10 Gath khua kya ho nan oh,
raw mah papin rah nan oh;
Beth-leafrah khua khe
vuiping kya toukuh oh.
11 Shafir khuaccaaw hae,
nae ccakaete maethyate
cciatua oh.
Zaanan khuaccaaw hae tuh
pou khyh hae;
Beth-ezel khua tuh rawkhuite um zah,
aning nynh bawmnaw
ae pya kho vae lan khyh.
12 Maroth khuaccaaw hae tuh
hoynaw kha thinphangte
a ngaw hae,
tuhzemah Bawipaw kyate
ronaw tuh Jerusalem
koikua kyacia a thua vae.
13 Lakhish khuaccaaw hae,
marang hae kha
marangle hae kya khii oh;
nang tuh Zion ccanung kha
seinaw kalan a cciakhae typaw
na thua zah,
Israel a seimenaw hae kha
namaw liate nynh muih athua.
14 Tukeiccuze nanning Judah hae nynh
Moresheth-gath khua kha
phiakunawpaw lasung na pya cih oh;
Akhzib khuaccaaw hae nynh
Israel siapharan hae kha a ling cih hae.
15 Mareshah khuaccaaw hae,
nanning ae taetu oh paw kha
nae kalan kae thuakhae cih.
Israel a phu-enaw tuh
Adullam khua lang a thua cih.
16 Na sungsah oh paw
nae ccaaw hae keiccuze
nae sang kha ngokuh oh lah
nae lu-okuh oh,
minmin kha kyng hae zah
nae kyate a ccikhae vae hae keiccuze
mosipi hawte nae lu kha okuh oh.