8
Thyaasahnaw Phungzae
(Exo 29.1-37)
1 Bawipaw nynh Moses kha,
2 “Aaron te a ccapaw hae kha cciakhae hae lah boeining, thuhkupaw chitui, seishawnaw silawnawpaw tangnuapaw, tuutepaw sa ning te ransi phing leipaw sanlou bawng kha mah cciakhae bia;
3 te ccungccaw zapi balyn kha tungkunaw thuakaw kyakhe pum hae,” a cipya.
4 Te Bawipaw nynh kaw a pya thyhte Moses nynh a cyi. Zapi kha tungkunaw bu thuakaw kya he a pumsakuh hae te,
5 Moses nynh zapi kha, “E hynh Bawipaw nynh cyi lan kaw oun pyapaw nynh thua,” a cipya hae.
6 Oute Moses nynh Aaron te a ccapaw hae kha cciakhae hae zah mih ccu kha tui te a singpya hae.
7 Te Aaron kha angkile kisahku zah taeccia a cciasaku, angkiccua kha kisahku zah ranpibawi angki kha a kisaku. Te accaankuhpaw ranpibawi angki arui khate a cce kyakhe a khiideku.
8 Bybe kha besahku zah tuh-e bybe kyakhe Urim te Thummim kha a nung hae.
9 Te a lu kyakhe pungde kha a khungsahku, pungde vawlan a malang kyakhe ccaankunawpaw sui, athyaapaw bawilukhung kha a beedepya, Bawipaw nynh kaw a pya thyhte Moses nynh a cyi.
10 Oute Moses nynh thuhkupaw chitui kha lah zah beikbu te a lungkhu umpaw balyn kha thuh zah a thyaasah.
11 Chitui abang khate silawhang vawlan khe vae sari a hei, te silawhang te a uccaw balyn kha thuasah, pakekhupaw te a ccusy hae kha thuasah thyaasah khylan chitui a thuh.
12 Aaron kha thyaasah khylan thuhkupaw chitui abang kha a lu kya bu zah a thuh.
13 Te Moses nynh Aaron ccapaw hae kha cciakhae hae zah angki a kisahku hae, taeccia cciasaku hae zah lukhung kha a khungsahku hae, Bawipaw nynh kaw a pya thyhte Moses nynh a cyi.
14 Seishawnaw silawnawpaw tangnuapaw kha cciakhae zah Aaron te a ccapaw hae nynh mih kuih kha tuh-e seishawnaw silawnawpaw tangnuapaw a lu vawlan khe a khang hae,
15 te tangnuapaw kha a chia. Moses nynh a chii kha lah zah a kuihdung te silawhang a ki hae kyakhe thuh zah silawhang kha a thyaasah; oute silawhang a ccusy kyakhe a chii kha a bu. Tuhcite silawhang vawlan seingaethyanaw rae khylan silawhang kha a thyaasah.
16 Moses nynh aring kya bahkuhpaw atho balyn, athin kya abahkuhpaw arui-arae hae, te atho ryte akin ccangning kha silawhang vawlan maee te a u.
17 Thuasalama tangnuapaw kha aphua, asaw te a-ia ryte ryahmin atolang khe maee te a u, Bawipaw nynh kaw a pya thyhte Moses nynh a cyi.
18 Oute maee-ute silawnawpaw tuutepaw kha a cciakhae. Aaron te a ccapaw hae nynh mih kuih kha tuutepaw a lu vawlan a khang hae,
19 te tuutepaw kha a chia. Moses nynh a chii kha silawhang po voilu lan a hei.
20 Moses nynh tuutepaw kha pong tya zah alu, asaw te atho kha maee te a u.
21 Te alungkhu e hae te accu hae kha tui te a sing koute Moses nynh tuutepaw apyn balyn kha silawhang vawlan maee te a u; tuh-e tuh Bawipaw kalan maee te silawnaw, amynthuapaw thua zah, maee-ute silawnaw nynh thua, tuh-e tuh Bawipaw nynh Moses kha kaw a pya thyhte nynh thua.
22 Tukoute thyaasahnawpaw tuutepaw sa ningnaw kha a cciakhae. Aaron te a ccapaw hae nynh mih kuih kha tuutepaw alu vawlan a khang hae,
23 te tuutepaw kha a chia. Moses nynh a chii abang kha lah zah Aaron a ranglang nakua alia lang, a ranglang kuihpi te a ranglang ccupi kyakhe a thuh.
24 Aaron ccapaw hae kha a cciakhae kou hae te, Moses nynh chii abang kha mih ranglang nakua alia lang, mih ranglang kuihpi te mih ranglang ccupi kyakhe a thuh hae; te Moses nynh alaepaw chii khate silawhang po voilu lan a hei.
25 Te atho hae, aleihmae abalyn, aring hae abongpaw atho balyn, athin kya abahkuhpaw, akin ccangning te atho, te a ranglang phae kha a law.
26 Bawipaw malang umpaw ransi phing leipaw sanlou bawng a lungkhu kya-e ransi phing leipaw sanlou phe kheit, chitui te thoupaw sanlou phe kheit, apahpaw sanlou phe kheit kha lah zah atho vawlan te a ranglang phae vawlan khe a nung.
27 Tuh-e hae balyn kha Aaron kuih kya te a ccapaw hae kuih kyakhe a nung, te Bawipaw malang hangthung-hebiate silawnaw lante a hangthung.
28 Oute Moses nynh tuh-e sanlou hae kha mih kuih kyate lah zah, silawhang vawlan khe maee-ute silawnawpaw ryte maee te a u. Tuh-e tuh Bawipaw kalan amynthuapaw lante maee te pya athuapaw thyaasahnaw silawnaw nynh thua.
29 Moses nynh aby kha lah zah hangthung-hebiate silawnaw lante Bawipaw malang khe a hangthung; tuh-e aby tuh thyaasahnawpaw tuutepaw kya-e Moses nynh a ccoupaw nynh thua, tuh-e tuh Bawipaw nynh Moses kha kaw a pya thyhte nynh thua.
30 Oute silawhang vawlan umpaw thuhkupaw chitui abang te chii abang kha Moses nynh lah zah Aaron te a boeining hae kya te a ccapaw hae te mih boeining hae kyakhe a hei hae. Tuhcite Aaron te a boeining hae kha thuasah, a ccapaw hae te mih boeining hae kha mah thuasah Moses nynh a thyaasahpya hae.
31 Te Moses nynh Aaron te a ccapaw hae kha hynhte a hopya hae: “ ‘Aaron te a ccapaw hae nynh tuh-e saw kha a ae cih hae,’ cite Bawipaw nynh kamaw kha kaw yn pya thyhte, tungkunaw bu thuakaw kyakhe saw kha thung oh lah, thyaasahnaw silawnaw bawng kya umpaw sanlou ryte tuin kyakhe ae oh;
32 alaepaw saw te sanlou kha maee te na u cih oh.
33 Nanning thyaasahnaw nin accing mawlaezung, nin sari lungkhu tungkunaw bu atolang na cceih lan khyh oh. Pawccecize nanning thyaasahnaw tuh nin sari aro cih;
34 atunin rae athua thyhte, nae hanlan seingaethyanaw raepya lan Bawipaw nynh kaw a tho vae.
35 Nanning na chi khyh nawlan oh, Bawipaw nynh rya ae naw oh paw kha lawte, tungkunaw bu thuakaw kyakhe khuazi khuadae nin sari lungkhu na um cih oh; pawccecize tuhcite kamaw kha kawpya ka thua,” a ci.
36 Bawipaw nynh Moses kyate kaw a pya thyhte Aaron te a ccapaw hae nynh pawpaw balyn kha pong a cyi hae.