4
Seithyaanaw Silawnaw hae
1 Bawipaw nynh Moses kha,
2 Israel hae kyakhe hynhte hopah hae a cipya: Lukhakheit nynh tuaku ty leite Bawipaw kawbya hae kyaze cyi lan accan leipaw ccangkhakheit kha phe cyihsei zah a cyipaw kya:
3 Chitui thuh a thuapaw ranpibawi nynh sei zah ccungccaw hae tungvaw seimenaw a thuakhae lanze, tuh-e seinaw hanlan douccahpaw vaetua phu kya-e anopaw tangnuapaw kha Bawipaw kalan seithyaanaw silawnaw lante a pya cih.
4 Anopaw tangnuapaw kha tungkunaw bu thuakaw kalan, Bawipaw malang a thuakhae cih zah a kuih kha tuh-e tangnuapaw a lu vawlan khe a khang cih; tuh-e anopaw tangnuapaw tuh Bawipaw malang chia athua cih.
5 Chitui thuh a thuapaw ranpibawi nynh anopaw tangnuapaw chii abang kha a lah cih zah tungkunaw bu lungkhu lang a thuakhae cih.
6 Ranpibawi nynh a kuihdung kha tuh-e chii lungkhu a dung cih zah chii abang khate beikinnthyaa kya zokhawpaw boei malang Bawipaw malang khe vae sari a hei cih.
7 Ranpibawi nynh a chii abang kha tungkunaw bu lungkhu Bawipaw malang umpaw amynkhuhpaw silawhang a ki hae kyakhe a thuh cih; anopaw tangnuapaw chii alaepaw kha tungkunaw bu thuakaw kya umpaw maee-ute silawnawpaw ccaboi aleihpaw kyakhe a bu cih.
8 Seishawnaw silawnawpaw tangnuapaw atho balyn: aring phang abongpaw atho te aring pepan umpaw atho balyn;
9 akia lungkhu lang te umpaw akin ccangning te khah-e hae vawlan abahkuhpaw atho; akin hae ryte a lawdepaw athin kya bahkuhpaw arui-arae hae,
10 ccawkunaw silawnawpaw tangnuapaw kya-e law a thuapaw hawkhate a lah cih. Ranpibawi nynh maee-ute silawnawpaw ccaboi vawlan khe maee te a u cih.
11 Thuasalama tangnuapaw aphua te asaw balyn ryte alu, accu, aring te a-ia hae, te
12 tuhlaepaw tangnuapaw a pyn balyn kha ryahmin atolang umpaw athyaanaw hmin, buhhaw laenaw langkhe a cciakhae cih zah maeething vawlan khe a u cih; buhhaw laenaw hmin kyakhe maee te u athua cih.
13 Israel zapi balyn nynh tuaku ty leite, zapi nynh nythya leite, Bawipaw kawbya hae kya-e cyi lan accan leipaw ccangkhakheit kha cyih hae zah a sei hae lanze;
14 tuh-e a la rae hae paw seinaw tuh he a langkuh te, zapi nynh seithyaanaw silawnaw hanlan vaetua phu kya-e tangnuapaw anopaw sa kheit khate si a law cih hae zah tungkunaw bu malang a thuakhae cih hae.
15 Ccungccaw zapi kya-e piccan hae nynh tangnuapaw lu kyakhe Bawipaw malang mih kuih a khang cih hae, te tangnuapaw tuh Bawipaw malang chia athua cih.
16 Chitui thuh a thuapaw ranpibawi nynh tangnuapaw chii abang kha tungkunaw bu lungkhu lang a teekhae cih,
17 te ranpibawi nynh a kuihdung kha chii lungkhu khe a dung cih zah zokhawpaw boei malang, Bawipaw malang khe vae sari a hei cih.
18 Chii abang khate tungkunaw bu kya, Bawipaw malang umpaw silawhang a ki hae kha a thuh cih; te alaepaw chii kha tungkunaw bu thuakaw kya umpaw maee-ute silawnawpaw silawhang aleihpaw kyakhe a bu cih.
19 Atho balyn kha a lah cih zah silawhang vawlan khe maee te a u cih.
20 Seishawnaw silawnawpaw tangnuapaw a cyi hawkhate tangnuapaw kha a cyih cih; phe lokuh lante a cyih cih. Ranpibawi nynh minmin hanlan seingaethyanaw kha a rae cih zah minmin tuh ngaethya athua vae cih hae.
21 Te tangnuapaw kha ryahmin atolang cciakhae zah masaty e tangnuapaw hawkhate a u; tuh-e tuh zapi elang seithyaanaw silawnaw nynh thua.
22 Uktu lukhakheit nynh Bawipaw a Pachia kawbya balyn kya-e cyi lan accan leipaw ccangkhakheit kha tuaku ty leite cyih zah a sei lanze,
23 tuh-e a raepaw seinaw kha he a nyhkuh te, douccahpaw miaatepaw sa kheit kha silaw nawlan a cciakhae cih.
24 Miaa lu vawlan khe a kuih a khang cih zah Bawipaw malang maee-ute silawnawpaw chianaw kyakhe chia athua cih; tuh-e tuh seithyaanaw silawnaw nynh thua.
25 Ranpibawi nynh seishawnaw silawnawpaw a chii abang kha a kuihdung te a lah cih zah maee-ute silawnawpaw silawhang a ki hae kha a thuh cih, chii alaepaw kha maee-ute silawnawpaw silawhang aleihpaw kyakhe a bu cih.
26 Ccawkunaw silawnawpaw atho hawkhate a tho balyn kha silawhang vawlan khe a u cih. Ou tuhte ranpibawi nynh a seinaw hanlan seingaethyanaw a raepah cih zah ngaethya athua cih.
27 Nanning laku e ccungccaw huataw lukhakheit nynh Bawipaw kawbya kya-e cyi lan accan leipaw ccangkhakheit kha tuaku ty leite cyite sei zah seimenaw a hoi lanze,Ref 4.27-31: Nam 15.27-28
28 seinaw a la raepaw kha he a nyhkuh te, a la cyiseipaw seinaw hanlan silaw nawlan douccahpaw miaapinung sa kheit kha a thuakhae cih.
29 Seishawnaw silawnawpaw alu vawlan khe a kuih kha a khang cih; te seithyaanaw silawnaw kha maee-ute silawnaw hmin khe chia athua cih.
30 Ranpibawi nynh a chii abang kha a kuihdung te a lah cih zah maee-ute silawnawpaw silawhang a ki hae kyakhe a thuh cih hae, te a chii alaepaw kha silawhang aleihpaw khe a bu cih.
31 Ccawkunaw silawnaw kya-e atho kha law athua hawte tuh-e atho balyn tuh law athua cih zah, Bawipaw kalan amynthuapaw lante silawhang vawlan khe a u cih. Ou tuhte ranpibawi nynh seingaethyanaw a raepah cih zah, tuh-e ccungccaw tuh ngaethya athua cih.
32 Seithyaanaw silawnaw hanlan a thuakhaepaw tuh tuu athua lanze, douccahpaw tuupinung athua cih.
33 A kuih kha seishawnaw silawnawpaw alu vawlan a khang cih; tuh-e tuh maee-ute silawnawpaw chianaw hmin kyakhe seithyaanaw silawnaw lante chia athua cih.
34 Ranpibawi nynh seishawnaw silawnawpaw a chii abang kha a kuihdung te a lah cih zah maee-ute silawnawpaw silawhang a ki hae kyakhe a thuh cih, te alaepaw chii abang kha silawhang aleihpaw kyakhe a bu cih.
35 Ccawkunaw silawnawpaw kya-e tuu atho kha law athua hawte atho balyn kha a lah cih, te ranpibawi nynh Bawipaw kalan maee te silawnaw ryte silawhang vawlan khe a u cih. Tukeiccuze tuh-e ccungccaw nynh a cyiseipaw seinaw hanlan ranpibawi nynh seingaethyanaw kha a raepah cih zah ngaethya athua cih.