LEVITIKAS
Leviticus
Leviticus ccauh kyahin langmawlya Israel hae nynh Pachia a beik ccyh hae te beiknaw poi a tua ccyh hae kya a zui lan hae paw phung thuasah, ccangpyakunaw thyhte rya a lah hae paw ranpibawi hae nynh a zui lan hae paw phung thuasah a um.
E ccauh kya abyapi huaccepaw tuh Pachia a thyaanaw kong te a ccungccaw hae nynh amaw te kyngku nawlan pawtemou a beik cih hae zah a hiin cih hae cipaw kong nynh thua.
E ccauh lungkhu kya a nyhua hae paw bya tuh 19.18 kya-e Jesu nynh ccangningnaw ale huapaw kawbya a cipaw, “Na innpaw kha namaw na sungsaku hawte sungsah,” cikuhpaw kha nynh thua.
1
Maee-ute Silawnaw
1 Bawipaw nynh Moses kha ko zah tungkunaw bu kyate hynhte a hopya:
2 Israel ccungccaw hae kha hynhte hopah hae: Nanning lukhakheit nynh sahiin-awvaw pyapaw kha Bawipaw kalan a cciakhae ze, a pyapaw tuh vaetua phu kya-e khyhze tuuphu, miaa phu kya-e kha a cciakhae cih.
3 Pyapaw tuh vaetua phu kya-e maee-ute silawnaw athua lanze, douccahpaw tangnuapaw kha a pya cih; Bawipaw malang khe tuh-e tangnuapaw kha amaw ccelang a ccoupya ccaw cite, tungkunaw bu thuakaw kalan a cciakhae cih.
4 Maee-ute silawnawpaw a lu vawlan khe a kuih kha a khang cih, te tuh-e tangnuapaw tuh amaw ccelang ccoupya athua cih zah, amaw hanlan sei ngaethyanawpaw athua vae cih.
5 Tangnuapaw kha Bawipaw malang khe chia athua cih; te ranpibawi athuapaw Aaron ccapaw hae nynh a chii kha a pya cih hae, tungkunaw bu thuakaw kya umpaw silawhang kha po voilu lan chii kha a hei cih hae.
6 Maee-ute silawnawpaw kha a phua lae athua cih zah a saw kha be athua cih.
7 Ranpibawi Aaron ccapaw hae nynh silawhang vawlan khe maee a tua cih hae zah maee vawlan khe maeething kha a paccyn cih hae.
8 Aaron ccapaw hae, ranpibawi hae nynh saw abekuhpaw kha alu, atho ryte silawhang vawlan umpaw maee vawlan e maeething kyakhe a nung cih hae;
9 thuasalama aring hae te accu hae kha tuh tui te a sing cih hae. Oute ranpibawi hae nynh abalynte silawhang vawlan khe maee-ute silawnaw lante a u cih hae, Bawipaw hanlan maee te silawnaw, amynthuapaw athua cih.
10 Maee-ute silawnaw hanlan pyapaw tuh tuuphu khyhze miaa phu kya-e athua lanze, a pyapaw tuh douccahpaw pise athua cih.
11 Tuh-e tuh silawhang palung lang, Bawipaw malang khe chia athua cih, te Aaron ccapaw hae, ranpibawi hae nynh a chii kha silawhang po voilu lan a hei cih hae.
12 Tuh-e tuh alu, atho ryte be athua cih, te ranpibawi nynh silawhang vawlan umpaw maee vawlan e maeething kyakhe a nung cih;
13 thuasalama aring hae te accu hae kha tuh tui te sing athua cih hae. Oute ranpibawi nynh abalynte silawhang vawlan khe maee te a u cih; tuh-e tuh maee-ute silawnaw nynh thua, Bawipaw kalan maee te silawnaw amynthuapaw athua cih.
14 Bawipaw kalan pyapaw tuh maee-ute silawnawpaw pavaw athua lanze, valaele hae khyhze vahu hae kya-e kha a po cih.
15 Ranpibawi nynh tuh-e tuh silawhang kalan a cciakhae cih zah a lu kha thoh pae lan a mae cih, te silawhang vawlan khe maee te a u cih; silawhang pe khe a chii kha ccawsah athua cih.
16 A lohsapua te a lungkhu umpaw kha a lah cih zah silawhang nithua lang, buhhaw nungnaw kyakhe a vua cih.
17 A sake kha thoh pae leite a pyn kha thoh a bua cih. Oute ranpibawi nynh silawhang vawlan umpaw maee vawlan e maeething kyakhe a khang cih; tuh-e tuh maee-ute silawnaw nynh thua, Bawipaw kalan maee te silawnaw amynthuapaw nynh thua.