22
Jesu Chia lan Pheenaw
(Mat 26.1-5, 14-16; Mar 14.1-2, 10-11; Joh 11.45-53)
1 Kawtaw Poi a ci hae paw, Ransi phing leipaw Sanlou Poi tuh anae vae.Ref 22.1: Exo 12.1-27
2 Ranpibawi lepaw hae te kawbya sazae hae nynh ccungccaw hae raw a ri hae keiccuze Jesu chiathyanaw laanpi kha a ccung hae.
3 Satan nynh locceihtu lu haw lae ning kyaze lu kheit athua buapaw Judas Iskariot lungkhu langkhe a tee.
4 Tuh-e paw nynh ranpibawi lepaw hae te beikinn ngawtu hae kalan cceih zah mih kuih kalan Jesu pya lanpaw kong kha a hokhae hae.
5 Minmin tuh myarya mih lungtua zah phua pya lante mih nawccah.
6 Judas nynh mah a nawccah zah ccungccaw zapi a um khyh lya hae khe Jesu kha mih kalan ap khylan ccyhhoypaw kha a ccungku vae.
Kawtaw Poi Zerya Paccynnaw
(Mat 26.17-25; Mar 14.12-21; Joh 13.21-30)
7 Ransi phing leipaw Sanlou Poi tua nin thua zah Kawtaw Poi elang tuutaw chia nin yn thua vae.
8 Jesu nynh Peter te Johan kha, “La cceih oh lah, aening ah ae lan oh paw Kawtaw Poi zerya kha la paccyn oh,” cite hopah hae zah a saw hae.
9 Minmin nynh amaw kha, “Pawkyamou la paccyn hae sah ci nae ry?” cite a khia hae.
10 Jesu nynh, “Ngaetua oh, khua lungkhu lang he na tee oh te, dawre te tui yn phupaw ccungccapaw lu kheit nynh ae la tungkuh cih oh, aning nynh a teenaw inn lungkhu lang la zuikuh bua oh lah,
11 inn hoitu kha, ‘Sazaepaw nynh nang kha, “Ka zuitu hae ryte Kawtaw Poi zerya kae mangnaw lanpaw mikhia khaan tuh teisangmou a um?” ae ci,’ cite la hopah oh.
12 Aning nynh a paccyn ty vae paw akopaw palung khaan kha ae la muihsah cih oh, tuin kyakhe aening hanlan la paccyn oh,” a cipya hae.
13 Tukeiccuze minmin nynh cceih hae zah Jesu nynh a hopya hae hawte a muih hae, te minmin nynh Kawtaw Poi zerya kha a paccyn hae.
(Mat 26.26-30; Mar 14.22-26; 1Kor 11.23-25)
14 Accyh azawte Jesu tuh locceihtu hae ryte ccaboi kya a haung hae.
15 Jesu nynh minmin kha, “Ka teing maw hin nanning ryte hynh-e Kawtaw Poi zerya hynh mangkheih lan myarya ka peki.
16 Pawccecize kae hopya oh, Pachia peenaw kya Kawtaw Poi eenaw accing makhia, e poi hynh ka ae boi vae lan khyh,” a cipya hae.
17 Banang kha lah zah lungtuabya a ho koute, “E banang hynh lawkuh oh lah neekuh oh.
18 Pawccecize kae hopya oh, Pachia peenaw yn thua mawlaezung misutui hynh ka neih boi vae lan khyh,” a ci.
19 Tukoute sanlou kha lah zah lungtuabya a ho koute eih zah minmin kha a pya hae; te, “E tuh nanning kae pya oh paw ka pyn nynh thua, kamaw liathui nawlan mang oh,” a ci.
20 Tuhawte zerya a ae kou hae te, banang kha mah lah zah, “E banang tuh nanning hanlan ka laepaw ka chiise kya ka tynsahpaw byakin thawpaw nynh thua.Ref 22.20: Jer 31.31-34
21 Thuasalama dotua oh, kae yn pheetupaw kuih tuh ccaboi kya kamaw te kae umkheih.Ref 22.21: Sam 41.9
22 Laerui-awde athua vae thyhawte Ccungccaw Ccapaw tuh a chih cih; thuasalama Ccungccaw Ccapaw a pheetupaw hanlan ngaethya lan kou um!” a ci.
23 Zuitu hae nynh tuh-e uccaw tuh hum nynh mou yn cyih cih cipaw kha mimaw te mimaw laku a khiaku hae.
Hummou Alehua?
24 Zuitu hae laku kya hummou ale huapaw lang nung lan cipaw eikunaw a um.Ref 22.24: Mat 18.1; Mar 9.34; Luk 9.46
25 Jesu nynh minmin kha, “Zenta siapharan hae nynh uknaw kaw te a uk hae, minmin a uktu hae paw kha hoynaw oun raepahtu cite a ko hae.Ref 22.25-26: Mat 20.25-27; Mar 10.42-44
26 Thuasalama nanning tuh tuhte na cyih lan khyh oh; nanning laku ale huapaw tuh adih huapaw hawte athua cih; cciakhaetu athuapaw nynh ryalawpatu hawte athua cih.Ref 22.26: Mat 23.11; Mar 9.35
27 Pawccecize aepaw a koihtupaw tou alehua? Tuhkhyhze a thohaepaw tou alehua? Aepaw a koihtupaw kha lehua khyh tou? Thuasalama kae tuh nanning laku kya a thohaepaw hawte nynh ka thua.Ref 22.27: Joh 13.12-15
28 “Nanning tuh tuhounaw ka tung lyaze ka kya po na umbua oh paw nynh na thua oh.
29 Ka Paaw nynh peenaw kha yn pya hawte, kae nynh mah nanning kha peenaw kae pya oh.
30 Ka peenaw lungkhu ka ccaboi kya na ae na neih cih oh zah, Israel phin haw lae ning kha byapiate bawitungkhung kya na haung cih oh,” a cipya hae.Ref 22.30: Mat 19.28
Peter nynh A Vua lanpaw A Hoty
(Mat 26.31-35; Mar 14.27-31; Joh 13.36-38)
31 Bawipaw nynh, “Simon, Simon, ngaetua! Chanvuih kha pasaryh te ryh hawte nanning kha Satan nynh ryh lan ae peki oh.
32 Thuasalama na zynnaw azo khyh nawlan saw kae sangpya; te ka kalan nae paleihku vae ze na uno hae kha thawzung na pya cih hae,” a cipya.
33 Peter nynh, “Bawipaw, nang ryte tuh thonginn lang thuasah, chinaw kalan thuasah ccia lan paccynkute ka um!” a cipya.
34 Bawipaw nynh, “Peter, nang kae hopya, nang nynh kae hynh ka nyh khyh cite vae thum nae vua maw, atunin aw khua lan khyh,” a cipya.
Phuabu, Sohrae te Thaloi
35 Jesu nynh zuitu hae kha, “Phuabu, sohrae, phanah phuku leite kae saw lya oh kha, hankhakheit na ho na bou oh paw um tou?” cite a khia hae. Minmin nynh, “Um khyh, ccangkheit san um khyh,” a ci hae.Ref 22.35: Mat 10.9-10; Mar 6.8-9; Luk 9.3, 10.4
36 Jesu nynh minmin kha, “Thuasalama atu tuh phuabu a hoipaw nynh phukuh sah lah sohrae a hoipaw mah vawkuh sah, te thaloi a hoi leipaw nynh a angkile kha zua sah lah thaloi kha rekuh sah.
37 Pawccecize, kae hopya oh, ‘Aning tuh misei hae ryte riakheih athua,’ cite azeikuhpaw tuh ka tungvaw yn ccing cih, pawccecize ka konglang a zei hae paw kha accing lalia vae,” a cipya hae.Ref 22.37: Isa 53.12
38 Minmin nynh, “Bawipaw, dotua, hein kya thaloi zung ning a um,” a cipya hae. Jesu nynh minmin kha, “Azaw vae,” a cipya hae.
Oliv Mua vawlan Jesu Sawsang
(Mat 26.36-46; Mar 14.32-42)
39 Jesu tuh yn pou zah leih a cyimae hawte, Oliv Mua lang cceih zah a zuitu hae nynh a zui hae.
40 Tuin kya he a thua te minmin kha, “Tuhounaw lungkhu lang na ccaw khyh nawlan oh sawsang oh,” a cipya hae.
41 Minmin kyate lung deih khin loukaw asawnaw langkhe cceih zah ccukharutungte saw a sangpaw tuh:
42 “Apang, na rynaw athua ze, hynh-e banang hynh ka kyate yn lawpah; thuasalama kae ka rynaw hawte thua leite, na rynaw hawte thua sah,” a ci.
43 Vaawlang te vaawpaw nynh a kalan yn langkuh zah thawzung a pya.
44 Myarya a lungriathae pawte thawmawte saw houh a sang; a vaesaw tuh laekhu lang accawpaw chiise hawte nynh athua.
45 Saw a sangnaw kyate thokuh zah a zuitu hae kalan he a thua tuh ngaethyate a ih hae paw kha a muih.
46 Minmin kha, “Pawccemou na i oh? Tuhounaw lungkhu lang na ccaw khyh nawlan oh, tho oh lah sawsang oh,” a cipya hae.
Jesu Kyngnaw
(Mat 26.47-56; Mar 14.43-50; Joh 18.3-11)
47 Tuhte a ho cciamang lyakhe zuitu lu haw lae ning kyaze lu kheit athuapaw Judas nynh oun cciakhae hae paw ccungccaw zapi tuh oun thua vae hae, Judas nynh Jesu kha myng lan a naenuaku.
48 Thuasalama Jesu nynh, “Judas, Ccungccaw Ccapaw hynh nang nynh myngte tou na phee?” a cipya.
49 Jesu ryte a umkheih hae paw nynh yn cyihkuh lanpaw kha he a muih hae tuh, Jesu kha, “Bawipaw, thaloi te kae bae cih hae tou?” cite a khia hae.
50 Lukheitpaw nynh ranpibawi a seepaw kha a ranglang nakua thoh pae lan a bae.
51 Jesu nynh, “Azaw vae!” a ci. Jesu nynh tuh-e paw nakua kha hae zah a dansah.
52 Jesu nynh amaw oun ccianua hae paw ranpibawi lepaw hae, beikinn ngawtu hae te piccan hae kha, “Kae hynh miruh hawte thaloi te tungbang te nae ccianua oh tou?
53 Beikinn kya nanning ryte nin takyh ka um lyaze nae kuih nae hangnua khyh oh; thuasalama atu tuh nae ccyh te mohnaw huhan athung ccyh nynh thua,” a cipya hae.Ref 22.53: Luk 19.47, 21.37
Peter nynh Jesu A Vua
(Mat 26.57-58, 69-75; Mar 14.53-54, 66-72; Joh 18.12-18, 25-27)
54 Minmin nynh Jesu kha kyng hae zah ranpibawi lupi inn lang a cciakhae hae. Peter nynh asawnaw te a zui.
55 Maepaw angaelung kya maeetua hae zah a haung lya hae khe Peter mah a haungbua.
56 Peter nynh maee pe a haungpaw kha ryalawpatu liaccanung nynh he a muih tuh riri do zah, “E paw mah Jesu ryte a mungkuh hae paw nynh thua,” a ci.
57 Peter nynh, “Nopinung, tuh-e paw tuh ka nyh khyh,” cite Jesu kha a vua.
58 Khuekheih aro koute mingccangpaw nynh Peter kha muih zah, “Nang mah minmin kya a um buapaw nynh na thua,” a cipya. Peter nynh, “Ccungccapaw, ka thua khyh!” a ci.
59 Suimilan ccangkheit loukaw aro koute mingccangpaw lu kheit nynh, “Thanccingte e paw mah Jesu ryte a mungkuh hae paw nynh thua, pawccecize aning tuh Galilee paw nynh thua,” cite tynkaring lan a ho.
60 Peter nynh, “Ccungccapaw, paw nynh na ho cipaw ka nyh khyh!” a ci. Tuhte a ho cciamang lyakhe aw ccahe yn khua.
61 Bawipaw nynh maeleihkuh zah Peter kha a do. Tetuh, ‘Atunin aw a khua mawze, vae thum nae vua cih,’ cite Bawipaw nynh a hopyapaw bya kha Peter nynh a liathui vae.
62 Peter tuh atolang pou zah thawmawte a rah.
Ranpibawi Lupi malang Jesu
(Mat 26.67-68; Mar 14.65)
63 Jesu kha a kyngtu hae nynh sarya hae zah a bua hae.
64 Minmin nynh a mae kha phang bong hae zah a mae kha a bia hae, te “Hummou ae bua? Hotua!” cite a khia hae.
65 Minmin nynh saryanaw bya patae a honua hae.
Kungsi malang Jesu
(Mat 26.59-66; Mar 14.55-64; Joh 18.19-24)
66 Khua he adae tuh, piccan hae, ranpibawi lepaw hae te kawbya sazae hae nynh tungkuh hae zah Jesu kha kungsi malang poukhae hae zah,
67 “Khri na thua ze kaening hynh oun hopya tua,” a ci hae. Jesu nynh, “Kae hopya oh zemah na zyn lan khyh oh;
68 nanning kha bya kae khia oh zemah bya nae khunglae lan khyh oh.
69 Thuasalama atu tetuh Ccungccaw Ccapaw tuh Pachia thungnaw ranglang khe a haung vae cih,” a cipya hae.
70 Minmin balyn nynh, “Tuhteze, nang tuh Pachia Ccapaw tou?” a ci hae. Jesu nynh, “Na ho oh hawte ka thua,” a ci.
71 Minmin nynh, “Ccangpaw ccaekia aho vae zawtou? Pawccecize a munglae kya-e bya kha ahmaw ccaccei nynh phe ah thae vae oh,” a ci hae.