5
Naaman Dannaw
1 Siria siapharan a rhawkaw hae a uktu rhawbawipaw Naaman tuh a bawipaw malang maehoynaw myarya a ccoupaw te a lesaepaw nynh thua, pawccecize aning liate Bawipaw nynh Siria ram kha taenaw a pya. Naaman tuh thung zah a rawhoypaw athua zemah vaethya ccinaw a hoi.Ref 5.1-14: Luk 4.27
2 Siria hae nynh rhaw thiing hae zah a ccia lya hae khe, vae kheit tuh Israel ram e nopinung taraw lu kheit kha kyng hae zah, aning nynh Naaman zu kha rya a lawpya.
3 Tuh-e nopinung nynh a bawinung kha, “Ka bawipaw hynh Samaria khua umpaw profeh kalan la cceih sah ci kou ka ry! A vaethya ccinaw hynh a dansah mamin cih,” a cipya.
4 Naaman nynh a bawipaw kalan cceih zah, Israel ram e nopinung taraw nynh a hopaw bya kha a hopya.
5 Siria siapharan nynh, “La cceih, Israel siapharan kha ccaw ka ky cih,” a cipya.
Naaman tuh cceih zah ngunphua talent ccanghaw, sui shekel thong taruh te boeining zung haw kha a phu.
6 Aning nynh Israel siapharan kalan ccaw a phupya, tuh-e ccaw kyakhe, “E ccaw hynh na kya he yn thua te, ka ryalahtu Naaman hynh a vaethya ccinaw na dansah nawlan, na kalan kae saw cipaw la nyh,” a cipya.
7 Israel siapharan nynh tuh-e ccaw he a ria te, a boeining kha seii zah, “Kae tuh chinaw te hiinnaw a pya khopaw Pachia ka thua zah tetou, e ccungccapaw nynh vaethyakaepaw ccungccaw kha dansah khylan ka kalan yn saw? Aning nynh pekunaw yn hyypaw hynh dotua oh,” a ci.
8 Israel siapharan nynh a boeining a seiiku cipaw kha Pachia ccungccapaw Elisha nynh he a thae tuh, siapharan kha byataw zah, “Pawccemou na boeining na seiiku? Tuh-e ccungccapaw tuh kamaw kalan yn cceih sah lah, Israel ram kya profeh a um cipaw a nyh cih,” a cipya.
9 Tukeiccuze Naaman tuh a marang hae te a marangle hae ryte yn cceih zah Elisha inn teenaw kya a thadyn.
10 Elisha nynh Namaan kalan locceihtupaw kha saw zah, “La cceih lah, Jordan vaw kya vae sari tui la singkuh, te na ngesaw tuh amaw mamin lang a tang cih zah na thyaa cih,” cite a hosah pya.
11 Namaan tuh thinriate cceih zah, “Profeh tuh ka kalan yn pou cih zah te khaw, a thadyn cih zah Bawipaw a Pachia min kha kote ka vaethya ccinaw luki khe a kuih te a zaw cih zah vaethya ccinaw hynh yn dansah cih cite ka tua.
12 Damaskas vaw hae Abana te Pharpar tuh Israel ram e vaw hae balyn laeze hoyhua khyh hae tou? Tuh-e vaw hae kya tui singkute ka thyaa kho lan khyh tou?” a ci. Te maeleihkuh zah thinriate a ki vae.
13 A ryalahtu hae nynh amaw kalan naekuh hae zah, “Apang, profeh nynh ryalaw rupaw law lan kaw ae pya ze, law leite tou na um cih? Aning nynh, ‘Tui la singkuh lah, la thyaa,’ ae cipyapaw hynh hohcihmou cyi lan houh accanhua?” a cipya hae.
14 Tukeiccuze aning nynh cceihbung zah Pachia ccungccapaw bya thyhte, Jordan vaw kya vae sari a phungku; a ngesaw tuh imua taraw ngesaw hawte thuathui zah, aning tuh athyaa.
15 Tetuh amaw te a ccungccaw hae balyn tuh Pachia ccungccapaw kalan kite a malang khe thadyn hae zah, “Israel ram kya laelan, laephi pynpi kya Pachia um khyh cipaw ka ny; na ryalahtupaw kya-e lasung hynh beih yn lawpakuh,” a cipya.
16 Thuasalama Elisha nynh, “Rya ka lawpyapaw Bawipaw tuh a hiin thyhte, pawpaw mah ka lawkuh lan khyh!” a cipya. Lawku lan a soihbia zemah aning nynh phe a mya.
17 Te Namaan nynh, “Na mya lan athua ze, na ryalahtupaw hynh lann sa ning phu khinpaw laephi beih yn pya; pawccecize na ryalahtupaw nynh Bawipaw kalan laelan, ccangpaw pawpaw pachia kalan mah maee-ute silawnaw te silawnaw hae kha ka rae vae lan khyh.
18 Thuasalama Bawipaw nynh na ryalahtupaw hynh ccangkheit tuh beih yn ngaethya sah: ka bawipaw nynh ka kuihbaw kya ngeikute Rimmon inn lungkhu lang tee zah beik khylan a bakhung lyakhe, kae mah Rimmon inn kya ka bakhung bua ze, Bawipaw nynh na ryalahtupaw kae hynh yn ngaethya vae sah,” a cipya.
19 Elisha nynh amaw kha, “Ngaengante la cceih,” a cipya.
Thuasalama Naaman tuh syntaraw he a cceih te,
20 Pachia ccungccapaw Elisha a ryalahtupaw Gehazi nynh, “Siria ccungccaw Naaman nynh a pyapaw lasung kha ka bawipaw nynh lawku leite hung a kisah. Bawipaw tuh a hiin thyhte, a nulang te ka deehui cih zah a kya-e hankhakheit kha ka lawkuh cih,” a ci.
21 Tukeiccuze Gehazi nynh Naaman kha a deehui. Ka nulang te lukhakheit nynh yn deehui cipaw kha Naaman nynh he a muih tuh, tungku khylan marangle kyate sahkuh zah, “Atyn-are ahoy tou?” cite a khia.
22 Gehazi nynh, “Ahoy, ka bawipaw nynh, ‘Efraim muaram kyate profeh hae phu kya-e lu ning tuh atasy khe ka kalan oun thua hae; ngunphua talent ccangkheit te boeining zung ning kha minmin beih pya hae,’ cite hopya khylan kae hynh yn saw,” a cipya.
23 Naaman nynh, “Talent ccangning beih lawkuh,” a cipya. Te ngunphua talent ccangning kha boeining zung ning ryte sungkua ccangning khate tungbia hae zah, a ryalahtu hae lu ning kha a pya hae, te minmin nynh Gehazi malang khe phu hae zah a cceih hae.
24 Khualungrua kya he a thua hae te, mih tungvaw kya-e sungkua hae kha lah zah inn lungkhu kya a nung; te minmin kha cciasah hae zah a cceih hae.
25 Gehazi tuh tee zah a bawipaw malang a thadyn; te Elisha nynh, “Gehazi, teimou na um?” cite a khia. Aning nynh, “Na ryalahtupaw kae tuh teitei lang mah ka cceih khyh,” cite a khung.
26 Thuasalama Elisha nynh, “Nang te tungku khylan ccungccapaw nynh a marangle kyate a sawku lya kha ka muisaw te na kya ka cceihbua khyh tou? Phua te boeining, oliv khokhu hae te misu khokhu hae, tuu hae te tangnuapaw hae, seenung hae te seepaw hae kha lawku ccyh athua zawtou?
27 Tukeiccuze Naaman kya-e vaethya ccinaw tuh nang te na ciihan hae kalan zungzae a kaekuh cih,” a cipya. Tukeiccuze Gehazi tuh vaethyakae zah vuiraw hawte raw zah, a bawipaw kyate a pou.