25
Jerusalem Ronaw
(2Sh 36.13-21; Jer 52.3b-11)
1 Zedekiah nynh ram a uknaw kum takuanaw, sawpaw sah hawnaw, nin haw nin khe Babilon Siapharan Nebukhadnezzar tuh a rhawkaw hae balyn ryte Jerusalem kha oun ccianua hae zah a koihlu hae; khuapi po voilu lan laekarung kha a thaenuaku hae.Ref 25.1: Jer 21.1-10, 34.1-5; Eze 24.2
2 Zedekiah Siapharan nynh ram a uknaw kum haw lae kheitnaw cia khuapi kha a koihlu hae.
3 Tuh-e kum, sawpaw sah palinaw, nin takua nin khe khuapi kya ccakan myarya ccih zah, ram kya-e ccungccaw hae hanlan looh um vae khyh.
4 Tetuh Babilon hae nynh khualungrua kha uasakuh hae zah khuapi po voilu lan a um hae zemah, Judah rhawkaw hae balyn tuh khuazi khe ccue hae zah, siapharan khokhu pe umpaw khualungrua ccangning laku e koikua kyate khuapi atolang poute Arabah langkhe a cceih hae.Ref 25.4: Eze 33.21
5 Thuasalama Babilon rhawkaw hae nynh siapharan Zedekiah kha deehui hae zah, Jeriko bialae khe a phya hae; a rhawkaw hae balyn nynh amaw kha ccuetaw hae zah pong phiakuh hae.
6 Tetuh siapharan kha kyng hae zah, Hamath ram Riblah khua umpaw Babilon siapharan kalan a thuakhae hae, te aning nynh Zedekiah kha bya a pia.
7 Zedekiah ccapaw hae kha mih paaw muihnaw khe a chia hae, te Zedekiah mit kha a khoi hae, sivawrui te khii hae zah Babilon lang a cciakhae hae.Ref 25.7: Eze 12.13
Beikinn Ronaw
(Jer 52.12-23)
8 Nebukhadnezzar nynh Babilon siapharan lang a tangnaw kum haw lae takuanaw kum, sawpaw sah pangawnaw, nin sari nin khe Babilon siapharan a ryalahtu, a pyn rhawviapahtu hae rhawbawipaw Nebuzaradan tuh Jerusalem lang a cceih.
9 Aning nynh Bawipaw inn, siapharan inn te Jerusalem e inn balyn kha maee te a soi; inn lepaw miakaw kha maee te khaleih a soi.
10 Rhawviatu rhawkaw hae bawipaw ryte a umkheih hae paw Babilon rhawkaw hae balyn nynh Jerusalem akoihlupaw khualungrua balyn kha pong a tingsah hae.
11 Rhawviatu hae bawipaw Nebuzaradan nynh khuapi kya a laehy hae paw, Babilon siapharan kalan a ccue hae paw te a laehy hae paw balyn kha kyng hae zah a cciakhae hae.
12 Thuasalama rhawviatu hae rhawbawipaw Nebuzaradan nynh ram lungkhu e mih ryachiccih huacce hae paw abang kha misu khokhu kya ryalahtu lang te loophotu lang a cciataw hae.
13 Bawipaw inn kya umpaw sohin tung hae, tui nungnawpaw rahung te a thadynnawpaw atung hae kha Babilon hae nynh zoihtatyh lan khya hae zah, sohin balyn kha Babilon lang a cciakhae hae.Ref 25.13: 1Si 7.15-26; 2Sh 3.15-17
14 Ang hae, buhhawlua hae, tetakia hae, mynkhuhpaw unawpaw pake hae, beikinn ryalawnaw kya mangpaw sohin te raekuhpaw angphe balyn kha a cciakhae hae,Ref 25.14: 1Si 7.45; 2Sh 4.16
15 maee-e nungnawpaw pake hae te pakepi hae kha mah a law hae. Rhawviatu hae rhawbawipaw nynh sui te raekuhpaw kya-e sui te ngun te raekuhpaw kya-e ngun kha a cciakhae.
16 Solomon Siapharan nynh Bawipaw inn elang a raepaw tung tungning, tuikua kua kheit te a thadynnawpaw hae, e sohin angphe hae balyn tuh aripaw tou kho um lei lan ciate alung.
17 Tung tungkheit ze dong haw lae tarya hang zah tung adung khe sohin te raekuhpaw tunglukhung a um; tuh-e tunglukhung tuh dong thum hang zah, adung tuh po voilu lan sohin te raekuhpaw sivaw te ccalee thae a um hae. Te tung tungningnaw tuh mah sohin te raekuhpaw sivaw ryte tuhcih maminte a um.
18 Rhawviatu rhawkaw hae bawipaw Nebuzaradan nynh ranpibawi lepaw Seraiah, lu ningnaw ranpibawi Zefaniah te beikinn thuakaw ngawtu lu thum kha a cciakhae hae;
19 khuapi kyate rhawkaw hae a uktu rhawbawi lu kheit, khuapi kya muih athua hae paw siapharan kungsi kya-e lu pangaw, ramccungccaw hae a sueluatu rhawbawi athuapaw ryaccinkhan lu kheit, khuapi kya muih athua hae paw ramccungccaw sung taruh kha a cciakhae hae.
20 Te rhawviatu hae rhawbawipaw Nebuzaradan nynh minmin kha Riblah khua umpaw Babilon siapharan kalan a thuakhae hae.
21 Te Babilon siapharan nynh Hamath ram Riblah khua khe minmin kha bua hae zah a chia hae. Tuhcite Judah hae tuh kyng hae zah mih ram kyate ramccang lang a cciakhae hae.
Judah hae A Uktu Gedaliah
(Jer 40.7-9; 41.1-3)
22 Babilon siapharan Nebukhadnezzar nynh nungsya hae zah Judah ram kya a laehy hae paw kha a uktu lang Shafan ccapaw Ahikam a ccapaw Gedaliah kha a khang.
23 Babilon siapharan nynh Gedaliah kha uktu lang a khang cipaw kong kha rhawkaw hae kya-e rhawbawi hae te mih ccungccaw hae nynh he a thae hae tuh, Mizpah khua umpaw Gedaliah kalan a cceih hae, tuh-e hae tuh Nethaniah ccapaw Ishmael, Kareah ccapaw Hohanan, Netofah ccungccaw Tanhumeth ccapaw Seraiah te Maakah ccungccapaw ccapaw Jaazaniah nynh thua hae.
24 Gedaliah nynh minmin te mih ccungccaw hae kha byakinpakuh hae zah, “Babilon ccungccaw bawi hae keiccu rih nan oh; ram lungkhu um oh lah, Babilon siapharan rya kha lawpah oh, naemaw elang ahoy cih,” a cipya hae.
25 Thuasalama sawpaw sah sarinaw khe Elishama ccapaw Nethaniah a ccapaw Ishmael, siapharan ciihan athuapaw nynh ccungccaw lu haw ryte oun cceih hae zah, Gedaliah te Mizpah khua kya amaw kya a umbua hae paw Judah hae te Babilon hae kha phe chih lan a bua hae.
26 Tetuh ccungccaw balyn tuh adih ale, rhawkaw hae kya-e rhawbawi hae tuh Babilon hae raw a ri hae keiccuze thokuh hae zah Izip ram lang a cceih hae.Ref 25.26: Jer 43.5-7
Jehoiakhin tungvaw Thawccinaw
(Jer 52.31-34)
27 Judah siapharan Jehoiakhin kha a kyngnaw hae te sung thum kum sarinaw, sawpaw sah haw lae ningnaw, nin kuin lae sari nin, Babilon siapharan Evil-merodak nynh ram a uk takaw kum khe, Judah siapharan Jehoiakhin kha thonginn kyate a luesah;
28 aning kha hoyte byabeih zah, Babilon khua amaw kya a um hae paw ccangpaw siapharan hae mih haungnaw laeze ahang huapaw haungnaw kha a pya.
29 Tukeiccuze Jehoiakhin nynh thonginn lungkhu a lawkupaw boeining kha khahkuh zah, a hiin lungkhu balyn siapharan ccaboi kya nin takyhte looh a ae.
30 A hiin lungkhu balyn, nin takyhte a ae lanpaw looh kha Babilon siapharan nynh a pya.