23
Josiah nynh Raethuinaw
(2Sh 34.3-7, 29-33)
1 Tetuh siapharan nynh Judah te Jerusalem piccan hae balyn kha amaw kalan a kosah hae.
2 Siapharan tuh Bawipaw inn lang cceihthung zah amaw ryte Judah ccungccaw hae balyn, Jerusalem khuaccaaw hae balyn, ranpibawi hae, profeh hae, ccungccaw adih ale hae balyn a cceihbua hae; Bawipaw inn kya a muih hae paw byakinnaw ccauh kya-e bya balyn kha a thaenaw hae khe a ria.
3 Siapharan tuh tungpi pe thadyn zah, Bawipaw kha zui khylan, a kawbya hae, a phunglang hae te a phungbya hae kha a thinlung balyn te, a hiinnaw balyn te zui khylan te e ccauh lungkhu azeikuhpaw hynh-e byakinnaw bya hae hynh cyi khylan Bawipaw malang khe byakinkunaw a rae. Ccungccaw hae balyn nynh mah tuh-e byakinnaw tuh a raebua hae.
4 Ranpibawi lupi Hilkiah, ccangningnaw ranpibawi hae, thuakaw ngawtu hae kha Baal pachia, Asherah te vaawlui umpaw uccaw hae balyn hanlan a raepya hae paw angphe balyn kha Bawipaw beikinn kyate poukhae lan siapharan nynh kaw a pya hae; tuh-e hae tuh Jerusalem khua atolang, Kidron loo kyakhe maee te u hae zah mih buhhaw kha Bethel lang a cciakhae hae.Ref 23.4-6: 2Si 21.3; 2Sh 33.3
5 Judah ram e khua hae te Jerusalem pepan umpaw ahangpaw hmin hae kya mynkhuhpaw a utu lang Judah siapharan hae nynh a la nung hae paw zohtuh ranpibawi hae kha mih ryalaw kyate a phua hae; Baal kalan, khuanin kalan, sawpaw kalan, aphuphute um hae paw awsi hae te vaawlui kya umpaw uccaw hae balyn kalan silawnaw a raetu kha mah mih ryalaw kyate a phua hae.
6 Asherah zohtuh kha Bawipaw inn kyate poukhae zah Jerusalem khua atolang, Kidron Vaw kalan a cciakhae; Kidron Vaw khe maee te u zah palae tui lan a bua koute akhui kha huatawpaw ccungccaw hae shawku vawlan khe a hei.
7 Bawipaw inn kya umpaw beiknaw lante a ohhuakuhpaw pise hae inn hae kha a ro, tuh-e inn hae kyakhe nopi hae nynh Asherah hanlan boei a kuapya hae.
8 Judah ram e khua hae kyate ranpibawi hae balyn kha poukhae hae zah, ranpibawi hae nynh si a lawnaw hae ahangpaw hmin hae kha, Geba khua kyate Beersheba khua kyacia a thusah hae; Jerusalem khua uktu bawi Joshua koikua teenaw, khua koikua voilang um hae paw koikua kya-e ahangpaw hmin hae kha a tingbung hae.
9 Ahangpaw hmin hae kya-e ranpibawi hae tuh Jerusalem umpaw Bawipaw silawhang kalan cceihthung bua khyh hae, thuasalama ransi phingkuh leipaw sanlou kha tuh mih uno hae kya a aebua hae.
10 Humhung nynh mah Molek pachia kalan a ccapaw khyhze a ccanung khate maee-ute silawnaw a rae khyh nawlan, Ben-hinnom accya kya umpaw Tofeth kha anungsikuhpaw lang a rae.Ref 23.10: Lev 18.21; Jer 7.31, 19.1-6, 32.35
11 Bawipaw inn teenaw, voidu thuakaw kin umpaw tinriapaw Nathan-melek a khaan pe a umpaw, Judah siapharan hae nynh khuanin hanlan a pya hae paw marang hae kha mah ccaring a nue; te khuanin a marangle hae kha maee te a soi.
12 Ahaz kya-e palung khaan innccuvaw kya umpaw silawhang hae, Judah siapharan hae nynh la rae hae paw kha thuasah, Bawipaw inn voidu ccangning kya Manasseh nynh a la raepaw silawhang hae kha thuasah siapharan nynh tingbung zah zoihtatyh lan a koi, te tuh-e athupaw tuh Kidron Vaw lungkhu langkhe a vua.Ref 23.12: 2Si 21.5; 2Sh 33.5
13 Jerusalem nithua lang, Ronaw Mua alia lang umpaw ahangpaw hmin hae kha siapharan nynh anungsikuhpaw lang a rae hae, tuh-e ahangpaw hmin hae tuh Israel hae siapharan Solomon nynh Sidon hae pachia anungsikuhpaw Ashtoreth, Moab hae pachia anungsikuhpaw Khemoh te Ammon hae pachia anungsikuhpaw Milkom hanlan a la raepaw nynh thua hae.Ref 23.13: 1Si 11.7
14 Zohtuh hae kha zoihtatyh lan koi hae zah Asherim kha thoh pae lan a bae hae, tuh-e hmin hae kyakhe ccungccaw ru kha phe a biasah.
15 Tuhpiaze Israel hae kha seinaw a raesah hae paw Jeroboam, Nebat ccapaw nynh Bethel khua kya a raepaw ahangpaw hmin te silawhang kha a tingbung; ahangpaw hmin kha tingbung zah palae tui lan maee te a soi; Asherah kha mah maee te a soi.Ref 23.15: 1Si 12.33
16 Josiah nynh maeleihkuh zah mua vawlan umpaw shawku hae kha a muih; te ccungccaw saw hae zah shaw lungkhu e ccungccaw ru kha lah hae zah silawhang vawlan khe maee te soi hae zah anungsikuhpaw lang a rae hae, tuh-e tuh poi tua lyaze Jeroboam nynh silawhang pe a thadyn lyakhe Pachia ccungccapaw nynh a la hopaw Bawipaw bya thyhte nynh athua; aning nynh maeleihkuh zah tuh-e konglang a la hodaepaw Pachia ccungccapaw shawku kha a muih.Ref 23.16: 1Si 13.2
17 Te Josiah nynh, “Khuh-e ka muihpaw liathuinaw lungpum khuh pawmou athua?” a ci.Ref 23.17: 1Si 13.30-32Khua kya-e ccungccaw hae nynh, “Bethel khua kya silawhang tungvaw na cyipaw miakaw kha a la hodaetupaw, Judah ram kyate yn thuapaw Pachia ccungccapaw shawku nynh thua,” cite a hopya hae.
18 Aning nynh, “Amaw tuh um sah; humhung nynh mah a ru kha nue nan sah,” a ci. Tukeiccuze a ru tuh Samaria kyate yn thuapaw profehpaw ru ryte tuhcihmawte a umsah hae.
19 Tuhpiaze, Israel siapharan hae nynh rae hae zah Samaria ram e khua hae kya a umpaw, Bawipaw thin a riasahpaw ahangpaw hmin hae kya-e hmin thyaapaw hae balyn kha Josiah nynh a nue hae; Bethel khua kya a la cyi hawte khah-e hae kha mah a cyi hae.
20 Ahangpaw hmin hae kya-e ranpibawi hae, tuin kya um hae paw balyn kha silawhang hae vawlan khe theih hae zah, mih ru kha tuh-e silawhang hae vawlan khe maee te a soi. Tukoute Jerusalem lang a ki.
Kawtaw Poi Tuanaw
(2Sh 35.1-19)
21 Siapharan nynh ccungccaw balyn kha, “E byakinnaw ccauh kya azeiku hawte Bawipaw nae Pachia kalan kawtaw poi kha tua oh,” cite kaw a pya hae.
22 Israel hae a uktu byapiatu hae she lyate thuasah, Israel siapharan hae te Judah siapharan hae she lya balyn te thuasah tuhcihawpaw kawtaw poi tuh la tua boi vae khyh hae;
23 thuasalama Siapharan Josiah nynh ram a uknaw kum haw lae taryanaw kum khe, e kawtaw poi hynh Bawipaw kalan Jerusalem kya a tua hae.
24 Tuhpiaze ranpibawi Hilkiah nynh Bawipaw inn lungkhu a muihpaw ccauh kya azeikuhpaw kawbya hae kha a tynsah nawlan, Josiah nynh chihiinleihthya hae paw, mitleihthya hae paw, tera zohtuh hae, zohtuh hae kha thuasah, Judah ram te Jerusalem kya muih athuapaw anungsikuhpaw balyn kha thuasah marya a vua hae.
25 Josiah mawze Josiah hawte a thinlung balyn te, a hiinnaw balyn te, a thawzung balyn te, Moses kawbya balyn thyhte, Bawipaw kalan a maekuhpaw siapharan um boi khyh; amaw koute mah amaw alopaw siapharan langkuh vae khyh.
26 Thuasalama Manasseh nynh Bawipaw thinria nawlan a la cyipaw balyn keiccuze Judah tungvaw a thinrianaw tuh maee lang rua zah, myarya lepaw a thinrianaw kyate a lungdae loh khyh.
27 Bawipaw nynh, “Israel kha ka dee hawte, Judah kha mah ka muihnaw kyate ka dee cih; ka la popaw hynh-e khuapi Jerusalem thuasah, ‘E kya ka min a um cih,’ cite ka la cipaw inn thuasah ka vua cih hae,” a ci.
Rhawtuknaw kya Josiah A Chih
(2Sh 35.20—36.1)
28 Tuhlaepaw Josiah nynh rya a lawpaw te a cyipaw balyn kha Judah Siapharan hae Sherianaw Ccauh kya a zei hae.
29 Josiah ccyh lyakhe Izip siapharan Faro Neko nynh Assiria siapharan kalan Zufrates vaw lang a cceihthung. Siapharan Josiah tuh amaw te tungku khylan a cceih; Faro Neko tuh Josiah ryte Megiddo kya he a tungkuh hae tuh, Josiah kha a chia.
30 A ryalahtu hae nynh a rhua tuh Megiddo kyate marangle te phu hae zah Jerusalem lang cciakhae hae zah amaw shawku kya a uu hae. Ramccungccaw hae nynh Josiah ccapaw Jehoahaz kha kokute chitui thuh hae zah a paaw ccelang siapharan lang a khang hae.
Jehoahaz nynh Judah Ram Uknaw
(2Sh 36.2-4)
31 Jehoahaz tuh kum kuin lae thum acih te, ram kha uk takaw zah Jerusalem kyate sawpaw sah thum a uk. A nung min tuh Hamutal cikuh zah Libnah khuapaw Jeremiah ccanung nynh thua.
32 A minpaaw hae nynh a la rae hae hawte, aning nynh Bawipaw muihnaw kya hoyleinaw kha a rae.
33 Jerusalem khua kya a uk khyh nawlan, Faro Neko nynh Hamath ram Riblah khua khe thong sah zah, Judah ram kha ngunto lang ngun talent za kheit te sui talent ccangkheit kha a ngia.
34 Faro Neko nynh Josiah ccapaw Eliakim kha a paaw ccelang siapharan lang khang zah a min kha Jehoiakim cite a paleih. Thuasalama aning nynh Jehoahaz kha Izip ram lang cciakhae zah tuin ram kya a chih.Ref 23.34: Jer 22.11-12
35 Jehoiakim nynh Faro kha sui te ngun a pya, thuasalama Faro nynh a ngiapaw phua kha ccingsah khylan a ram kha ngunto a khoi. Faro Neko pya lanpaw sui te ngun tuh a ramccungccaw hae kha khyapyapaw thyhte ccarou a ngiade hae.
Jehoiakim nynh Judah Ram A Uk
(2Sh 36.5-8)
36 Jehoiakim tuh kum kuin lae pangaw acih te, ram kha uk takaw zah, Jerusalem khua kya kum haw lae kheit a uk. A nung min tuh Zebidah cikuh zah Rumah khuapaw Pedaiah ccanung nynh thua.Ref 23.36: Jer 22.18-19, 26.1-6, 35.1-19
37 A minpaaw hae balyn nynh a la rae hae hawte, Bawipaw muihnaw kya hoyleinaw kha a rae.