16
Ahaz nynh Judah A Uk
(2Sh 28.1-27)
1 Remaliah ccapaw Pekah nynh Israel ram a uknaw kum haw lae sarinaw kum khe, Jotham ccapaw Ahaz tuh Judah siapharan lang a tang takaw.
2 Aning nynh kum kuin acih te, ram kha uk takaw zah Jerusalem khua kya kum haw lae taruh a uk. A minpaaw David hawte thua leite, Bawipaw a Pachia muihnaw kya hoynaw kha rae khyh zah,
3 Israel siapharan hae laanpi kha a zui. Bawipaw nynh Israel hae malang te a dee hae paw minphuin hae kya-e anungsikuhpaw cyisahnaw thyhte, a ccapaw khate heize maee-ute silawnaw a rae.Ref 16.3: Deu 12.31
4 Ahangpaw hmin hae vawlan, mua hae vawlan te hinlalyhpaw thingku kaw miakaw khe silawnaw rae zah mynkhuhpaw kha a u.
5 Tetuh Siria siapharan Rezin te Israel siapharan Remaliah ccapaw Pekah nynh Jerusalem kha tuk khylan a ccianua hae; Ahaz kha a koihlu hae zemah tae kho khyh hae.Ref 16.5: Isa 7.1
6 Tuh ccyh lyakhe Edom siapharan nynh Edom elang Elath khua kha bua lah zah, Judah hae kha a dee hae; te Edom hae tuh Elath khua lang oun thua hae zah tuin kya atunin cia a um hae.
7 Ahaz nynh Assiria siapharan Tiglath-pileser kalan locceihtu hae saw hae zah, “Kae tuh na ryalahtu te na ccapaw nynh ka thua. Yn cceihthung lah, kae yn tuk hae paw Siria siapharan te Israel siapharan kuih kyate beih yn luesah tua,” a cipya.
8 Bawipaw inn lungkhu te siapharan inn sisuakhaan hae lungkhu umpaw sui te ngun kha mah lah zah Assiria siapharan kha lasung lang a ky.
9 Assiria siapharan nynh a bya ngaepyate Damaskas kha ccianua zah a law; a ccungccaw hae kha kyngte Kir khua lang a cciakhae hae, te Siapharan Rezin kha a chia.
10 Ahaz Siapharan tuh Assiria siapharan Tiglath-pileser kha tungku khylan he a cceih tuh, Damaskas khua umpaw silawhang kha a muih. Ahaz Siapharan nynh ranpibawi Uriah kalan silawhang pungsan, adi-ale te raezia balyn kha akaw-aleih asasite a ky.
11 Ranpibawi Uriah nynh silawhang kha a rae; Siapharan Ahaz nynh Damaskas khua kyate a ky thyhte, Damaskas khua kyate Ahaz Siapharan yn thua mawkhe Uriah nynh a rae vae.
12 Siapharan tuh Damaskas khua kyate he yn thua te, siapharan nynh silawhang kha a do. Te siapharan nynh silawhang tuh naenuakuh zah a vawlan kae zah,
13 maee-ute silawnaw te ccathae silawnaw kha rae zah niapaw silawnaw kha a bu; ccawkunaw silawnawpaw achii khate silawhang kha a thei.
14 Bawipaw malang umpaw sohin silawhang kha beikinn malang te, amaw silawhang te Bawipaw inn laku kyate nue zah a silawhang thahlang sang khe a nung.Ref 16.14: Exo 27.1-2; 2Sh 4.1
15 Ahaz Siapharan ranpibawi Uriah kha kawpya zah, “Silawhang lepaw vawlan khe awkhua maee-ute silawnaw te zete ccathae silawnaw, siapharan kya-e maee-ute silawnaw te a ccathae silawnaw, ramccungccaw balyn kya-e maee-ute silawnaw, mih ccathae silawnaw te mih niapaw silawnaw kha na rae cih; te maee-ute silawnawpaw achii miakaw te silawnawpaw achii miakaw khate silawhang kha na thei cih; thuasalama sohin silawhang tuh kae nynh Pachia bya ka khianawpaw lang a um cih,” a cipya.
16 Ahaz Siapharan nynh kaw a pyapaw miakaw atyn-are kha ranpibawi Uriah nynh a cyi.
17 Ahaz Siapharan nynh beikinn lungkhu umpaw a thadynnawpaw tung hae kha moi hae zah, tuh-e hae vawlan umpaw pakekhupaw hae kha mah a nue hae; tui tungnawpaw kua kha sohin tangnuapaw hae vawlan khate nue zah, aphaekuhpaw lung vawlan khe a nung.Ref 16.17: 1Si 7.23-39; 2Sh 4.2-6
18 Sabbath nin looh-aesung nawlan siapharan inn kya a sak hae paw avawlan adawkuhpaw kha thuasah, siapharan nynh atolang te a teenaw kha thuasah Siria siapharan keiccuze Bawipaw inn kyate a nue.
19 Tuhlaepaw Ahaz nynh rya a lawpaw te a cyipaw balyn tuh Judah Siapharan hae Sherianaw Ccauh kya a zei hae.
20 Ahaz tuh a minpaaw hae ryte ih hae zah, a minpaaw hae ryte David khua khe a uukheih hae; a ccapaw Hezekiah nynh amaw ccelang siapharan lang a tang.Ref 16.20: Isa 14.28