20
Ahab te Siria hae Doukunaw
1 Siria siapharan Benhadad nynh a rhawkaw hae balyn kha a pum hae; siapharan hae sung thum lu ning, marang hae, marangle hae ryte Samaria kha ccianua hae zah koihlute a tuk hae.
2 Locceihtu hae kha Israel siapharan Ahab kalan, khua lungkhu lang saw hae zah, “Benhadad nynh hynhte a ho:
3 Na sui te na ngun hae tuh ka kya-e nynh thua; apuithya huaccepaw na zu hae te na ccaaw hae mah ka kya-e nynh thua hae,” a cipya.
4 Israel siapharan nynh, “Pou siapharan, ka bawipaw, na ho hawte kamaw te ka hoipaw balyn tuh namaw kya-e nynh thua,” a cipya.
5 Locceihtu hae tuh bua oun thua hae zah, “Benhadad nynh hynhte a ho: Na kalan ccungccaw hae kae saw zah, ‘Na sui te na ngun, na zu na ccaaw hae kha ka kalan yn pya,’ cite bya kae taw;
6 awkhualan atu ccyh kya ka ryalahtu hae kae saw cih hae, minmin nynh na inn te na ryalahtu hae inn lungkhu kya a ccung cih hae, a ry hae paw miakaw kha a lah cih hae zah a cciakhae cih hae,” cite bya a taw.
7 Tetuh Israel siapharan nynh ram lungkhu e piccan hae balyn kha ko hae zah, “E ccungccapaw nynh pawtemou vawsawnaw a ccung cipaw hynh dotua oh! Aning nynh ccungccaw yn sawnua zah ka zu ka ccaaw hae, ka sui te ka ngun kha yn ngia zah ka ei khyh,” a cipya hae.
8 Te piccan hae balyn te ccungccaw hae balyn nynh, “A bya ngaepah nan, na nawccah nan sah,” a cipya hae.
9 Tukeiccuze Benhadad a locceihtu hae kha, “Siapharan ka bawipaw kha la hopah oh: Masaty nae ngiapaw miakaw kha tuh na ryalahtupaw nynh ka cyih cih; thuasalama e hynh tuh ka cyih kho khyh,” a cipya. Locceihtu hae nynh cceih hae zah bya kha a phu hae.
10 Benhadad nynh ccungccaw saw zah, “Kamaw yn zui hae paw lu kheit cci nynh Samaria khua e laenoi kha kuihphe kheit te a peih hae ze, pachia hae nynh ka tungvaw kya tuh-e laeze mah cyih vae sah,” cite bya a taw.
11 Israel siapharan nynh, “Aning kha la hopah oh: Rhawtuk-uccaw a lawkuhpaw nynh rhawtuk-uccaw a khahkuhpaw hawte pookuh nan sah,” cite bya a khung hae.
12 Benhadad tuh siapharan hae ryte bu lungkhu kya a nia lya hae khe, tuh-e bya he a thae tuh, a ccungccaw hae kha, “Rhawtuk lan paccynkuh oh!” a cipya hae. Te minmin nynh khua kha tuk khylan a paccynkuh hae.
13 Te profeh lu kheit tuh Israel siapharan Ahab kalan yn thua zah, “Bawipaw nynh hynhte a ho, hynh-e myarya lungpaw zapi hae hynh na muih vae hae tou? Dotua, atunin minmin kha na kuih kya kae pya cih; te nang nynh kae tuh Bawipaw ka thuapaw kha na nyh cih,” a cipya.
14 Ahab nynh, “Hum liate mou pya athua cih hae?” cite a khia. Aning nynh, “Bawipaw nynh hynhte a ho, pee a uktu bawi hae kya-e ryalahtu ccangvae hae liate pya athua cih,” a cipya. Te Ahab nynh, “Rhawtuk tuh hum nynh mou a thoty cih?” cite a khia. Profeh nynh, “Namaw,” a cipya.
15 Te Ahab nynh pee uktu bawi hae kya-e ryalahtu ccangvae hae kha pum hae zah za ning sung thum lu ning acih hae; tuh-e hae koute Israel hae balyn kha pum hae zah thong sari acih hae.
16 Benhadad te a pan hae paw siapharan sung thum lu ning hae tuh bu kya phe rui lan a nia lya hae ninthu ccyh khe minmin tuh a cceih hae.
17 Pee uktu bawi hae kya-e ryalahtu ccangvae hae tuh masaty a cceih hae. Benhadad nynh rhawviatu hae kha saw hae zah tuh-e hae nynh, “Samaria khua kyate ccungccaw hae oun cceih hae,” cite a hopya hae.
18 Aning nynh, “Daenaw rae khylan oun ccia hae ze, ahiinte na kyng cih oh; rhawtuk khylan oun ccia hae zemah, ahiinte na kyng cih oh,” a cipya hae.
19 Pee uktu bawi hae kya-e ryalahtu ccangvae hae te minmin a zuitu rhawkaw hae tuh khua kyate oun cceih vae hae.
20 Te Israel hae lu kheit cci nynh rhaw hae lu kheit cci kha a chia hae; Siria hae tuh ccue hae zah Israel hae nynh a deehui hae, Siria siapharan Benhadad tuh marang ccikuh zah marang rhawkaw hae ryte phe a lue hae.
21 Israel siapharan tuh pou zah marang hae te marangle hae kha a tuk hae, Siria ccungccaw patae kha a chia hae.
22 Te profeh nynh Israel siapharan kalan yn cceih zah, “Na thawsaesakuh lah, na cyi lanpaw kha hoyte tuakuh; pawccecize hawnin ccyh yn thua te Siria siapharan nynh tuk lan ae ccianua cih,” a cipya.
Siria hae Shungnaw
23 Siria siapharan a ryalahtu hae nynh, “Israel hae mih pachia hae tuh mua pachia hae nynh thua, tukeiccuze minmin tuh aening laeze a thunghua hae; thuasalama minmin kha bialae kya tuk oh sih lah, aening tuh minmin laeze solei ah thunghua cih oh.
24 E hynh mah cyitua: siapharan hae hynh phoh hae lah, rhawbawi hae kha khangru hae;
25 na la shungpaw rhawkaw hae tahawpaw rhawkaw hae, marang hae tahawpaw marang hae te marangle hae tahawpaw marangle hae kha pum hae; te bialae kya tuk lan hae zah, aening tuh minmin laeze solei thunghua lan,” a cipya hae. Mih bya kha ngae zah tuhcite a cyi.
26 Hawnin ccyh khe Benhadad nynh Siria hae kha pum hae zah Israel hae kha tuk khylan Afek khua lang a cceihthung hae.
27 Israel hae kha pum hae zah looh mah dang hae zah rhawtuk lan a cceih hae; Israel hae tuh miaa phu phuning taraw hawte Siria hae te arawsekunaw khe a rya hae, Siria hae tuh ram kya phe abeih hae.
28 Pachia ccungccapaw tuh Israel siapharan kalan yn cceih zah, “Bawipaw nynh hynhte a ho: Siria hae nynh, ‘Bawipaw tuh mua pachia thua zah, accya pachia thua khyh,’ a ci hae, tukeiccuze e myarya lung hae paw zapi hae balyn hynh na kuih kalan kae pya cih zah, kae tuh Bawipaw ka thuapaw kha na nyh cih oh,” a cipya.
29 Minmin tuh nin sari lungkhu phu kheit te phu kheit hawiliakute ryahmin a tahku hae. Nin sarinaw nin khe rhawtuk a thotakaw hae; Israel hae nynh Siria ccu rhawkaw hae cciing kheit kha nin kheit lungkhu a chia hae.
30 Tuhlaepaw hae tuh Afek khua lang a ccue hae; tuhlaepaw thong kuin lae sari kha khualungrua nynh a tingthin hae.
Benhadad mah ccuebua zah khua lungkhu kya a rekuh.
31 A ryalahtu hae nynh, “Dotua, Israel ciihan siapharan hae tuh ngaethyaumsah thyapaw siapharan hae nynh athua hae cite kae thae; ah tae kya buriboei voikuh oh sih lah, ah lu vawlan liarui khangkute Israel siapharan kalan cceih oh sih; na hiinnaw hynh poh ae haang kho,” a cipya hae.
32 Tukeiccuze buriboei kha mih tae kya voikuh hae zah liarui kha mih lu vawlan khangkute Israel siapharan kalan cceih hae zah, “Na ryalahtu Benhadad nynh, ‘Kae hynh beih yn hiin sah,’ ae ci,” cite a hopya hae. Te Ahab nynh, “A hiin ung tou? Aning tuh ka unopaw nynh thua,” a cipya hae.
33 Tuh-e hae nynh bya a cciazia kha hoyte ngae hae zah, tuh-e bya tuh palou lawkuh hae zah, “Athua, Benhadad tuh na unopaw nynh thua,” a cipya hae. Te Ahab nynh, “Cceih oh lah, amaw kha yn cciakhae oh,” a cipya hae. Tukeiccuze Benhadad tuh amaw kalan yn cceih; te Ahab nynh marangle tungvaw a ccisaku.
34 Benhadad nynh, “Ka paaw nynh na paaw kya-e a lawpaw khua hae kha kae pyathui cih; ka paaw nynh Samaria khua kya kungku a la raeku hawte nang nynh mah Damaskas khua kya kungku na raekuh cih,” a cipya. Israel siapharan nynh, “E byakinnaw liate kae cciasah cih,” a cipya. Tukeiccuze nawccawthungkunaw kha rae hae zah a cciasah.
Profeh nynh Ahab A Pe
35 Bawipaw kawpyanaw thyhte profeh phu kya-e lu kheit nynh a banpaw lu kheit kha, “Kae hynh yn bua!” a cipya. Thuasalama tuh-e paw nynh bua lan a mya.
36 Te aning nynh, “Bawipaw bya kha na ngae khyh keiccuze ka kyate he na cceih takaw te, chindeih nynh ae tei cih,” a cipya. Te a kyate he a cceih takaw te, chindeih te tungkuh hae zah phe a tei.Ref 20.36: 1Si 13.24
37 Te ccangpaw lu kheit kha muih zah, “Kae hynh yn bua!” a cipya. Tukeiccuze tuh-e paw nynh thawte bua zah vaemaw a muesah.
38 Tuh-e profeh tuh cceih zah a mae kha boei taraw bongkute a muinsan rulaekuh zah laante langkhe siapharan kha a ngaw.
39 Siapharan yn ccia lyakhe siapharan kha ko zah, “Na ryalahtupaw kae tuh rhawtuknaw lang ka cceih; rhawkaw lu kheit tuh yn ki zah ka kalan ccungccapaw lu kheit kha yn cciakhae zah, ‘E paw hynh la do-oih; aning hynh he a zosei ze, a hiinnaw hanlan na hiinnaw kha chia athua cih, tuhkhyhze ngunphua talent ccangkheit na rung cih,’ yn cipya.
40 Na ryalahtupaw kae tuh voikheit voikheit lang ka ryasuh cciamang lyakhe aning tuh phe la cceih vae,” a cipya. Israel siapharan nynh, “Na byathan tuh tuhcihmawte byapia lanpaw nynh thua; namaw toulou nynh tuh-e byathan tuh bya phe na pae vae,” a cipya.
41 Tuh-e profeh nynh a mae a bongkupaw boei taraw kha lyngkuh kangmaw zah, Israel siapharan nynh profeh hae laku e lu kheit nynh thua cipaw a syntaw.
42 Te profeh nynh amaw kha, “Bawipaw nynh hynhte a ho, ‘Chia lan ka cipaw ccungccapaw kha na cciasah keiccuze na hiinnaw tuh a hiinnaw hanlan, na ccungccaw hae hiinnaw tuh a ccungccaw hae hiinnaw hanlan athua cih,’ a ci,” cite a hopya.
43 Israel siapharan tuh thinriate maesuerote a inn lang cceih zah Samaria khua a thua.