16
1 Baasha konglang te Bawipaw bya tuh Hanani ccapaw Jehu kalan yn thua zah,
2 “Nang kha laenoi kyate kae hangthung zah ka ccungccaw Israel hae cciakhaetu lang kae rae salamah, Jeroboam laanpi kha na zui zah ka ccungccaw Israel hae kha seinaw na raesah hae zah mih seinaw khate ka thin nae riasah,
3 tukeiccuze nang Baasha te na ciihan hae kha kae maemih cih oh zah, na innbyn tuh Nebat ccapaw Jeroboam ciihan hawte ka thuasah cih.
4 Baasha te asekuhpaw ccungccaw miakaw khualae lungkhu a chihpaw kha ui nynh a ae cih; ramkaw kya a chihpaw miakaw kha azouthyapaw pavaw nynh a ae cih,” a ci.
5 Tuhlaepaw Baasha nynh rya a lawpaw, a cyipaw te a huhan kha Israel Siapharan hae Phungpaw Ccauh kya a zei hae.
6 Baasha tuh a minpaaw hae ryte ih hae zah, Tirzah khua kya a uu hae; te a ccapaw Elah nynh amaw ccelang siapharan lang a tang.
7 Tuhpiaze Baasha tuh a kuih ryalawnaw khate Bawipaw kha a thinriasah zah, a muihnaw kya a cyipaw hoyleinaw balyn keiccu thuasah, Jeroboam ciihan te lokuh hae zah, tuh-e ciihan a ropaw seinaw keiccu thuasah, Baasha te a ciihan konglang kha Bawipaw bya tuh Hanani ccapaw profeh Jehu kyate yn thua.
Israel Siapharan Elah
8 Judah siapharan Asa nynh ram a uknaw kum kuin lae taruhnaw kum khe Baasha ccapaw Elah nynh Tirzah khua kyate Israel ram kha kum ning a uk.
9 Thuasalama a marangle angankuh a uktupaw a ryalahtu Zimri nynh aruh lante a phee. Tirzah khua a um lya, a innbyn a do-oihtu Arza inn kya phe rui lan a nia lyakhe,
10 Zimri tuh yn tee zah, Elah kha bua zah phe a theih koute amaw ccelang siapharan lang a tang. E tuh Judah siapharan Asa nynh ram a uknaw kum kuin lae sarinaw kum kya nynh thua.
11 Ram he uk takaw zah a bawitungkhung kya he a haung takaw te, Baasha ciihan hae kha marya a chia hae; a puizia te a ruiban hae kha pise lu kheit sanmah haang khyh hae.
12 Tuhcite Bawipaw nynh Baasha konglang profeh Jehu kyate a hopaw bya thyhte, Zimri nynh Baasha ciihan balyn kha marya a ro,
13 pawccecize Baasha te a ccapaw Elah nynh a rae hae paw mimaw seinaw te Israel hae a raesah hae paw seinaw, te mih zohtuh hae khate Bawipaw , Israel Pachia kha a thinriasah hae keiccu nynh thua.
14 Tuhlaepaw Elah nynh rya a lawpaw te a cyipaw balyn tuh Israel Siapharan hae Phungpaw Ccauh kya a zei hae.
Israel Siapharan Zimri
15 Judah siapharan Asa nynh ram a uknaw kum kuin lae pangaw kum khe, Zimri nynh Tirzah khua kya nin sari a uk. Te Israel rhawkaw hae nynh Filistin hae kya-e Gibbethon khua kha ryahmin a tahnuaku hae,
16 te tuh-e ryahmin tahnuakuh hae paw rhawkaw hae nynh, “Zimri nynh aruh lante paccynkuh zah siapharan kha a chia vae,” cipaw a thae hae; tukeiccuze tuin nin khe Israel balyn nynh rhawbawipaw Omri kha Israel siapharan lang ryahmin kya a khang hae.
17 Tukeiccuze Omri nynh Israel hae balyn ryte Gibbethon khua kyate cceihthung hae zah Tirzah khua kha a koihlu hae.
18 Khua kha a law vae hae cipaw Zimri nynh he a nyh tuh, siapharan inn kya-e rhawlungrua koihkuhpaw lungkhu lang tee zah, siapharan inn kha maee te soi zah amaw mah a chih,
19 pawccecize Jeroboam laanpi kha zui zah Bawipaw muihnaw kya hoyleinaw kha rae zah amaw nynh a raepaw seinaw te amaw nynh Israel hae kha seinaw a raesah hae keiccu nynh thua.
20 Tuhlaepaw Zimri nynh rya a lawpaw te aruh lante a paccynpaw tuh Israel Siapharan hae Phungpaw Ccauh kya a zei hae.
Israel Siapharan Omri
21 Israel hae tuh phu ning lang a phiakuh hae; ccungccaw angankuh nynh Ginath ccapaw Tibni kha siapharan lang khangku lan zui hae zah, angankuh nynh Omri kha a zui hae.
22 Omri a zui hae paw nynh Ginath ccapaw Tibni a zui hae paw kha a tae hae; tukeiccuze Tibni tuh chih zah Omri tuh siapharan lang a tang.
23 Judah siapharan Asa nynh ram a uknaw sung thum kum kheitnaw kum khe Omri nynh Israel kha a uk takaw; kum haw lae ning uk zah kum taruh tuh Tirzah khua kya a uk.
Khuapi Thawpaw Samaria
24 Omri nynh Shemer kya-e Samaria mua kha ngun talent ccangning te a re; te rhawlungrua te koihkuhpaw khua kha a rae koute mua a la hoitupaw Shemer min kha lee zah khua tuh Samaria cite min a phu.
25 Omri nynh Bawipaw muihnaw kya hoyleinaw kha a rae; aning mawze a la um hae paw balyn laeze hoyleinaw kha a raehua.
26 Pawccecize Nebat ccapaw Jeroboam laanpi miakaw kha zui zah, mih zohtuh hae khate Bawipaw , Israel Pachia kha a thinriasahte, Israel hae a raesah hae paw seinaw laanpi kha a zui.
27 Tuhlaepaw Omri nynh a cyipaw, huhan a langsahkupaw kha Israel Siapharan hae Phungpaw Ccauh kya a zei hae.
28 Omri tuh a minpaaw hae ryte ih hae zah, Samaria khua kya a uu hae; a ccapaw Ahab nynh amaw ccelang siapharan lang a tang.
Israel Siapharan Ahab
29 Judah siapharan Asa nynh ram a uknaw sung thum kum taryanaw kum khe, Omri ccapaw Ahab nynh Israel ram kha a uk takaw; Omri ccapaw Ahab nynh Samaria khua kyate Israel ram kha kum kuin lae ning a uk.
30 Omri ccapaw Ahab nynh Bawipaw muihnaw kya aning mawze a la um hae paw balyn laeze hoyleinaw kha a raehua.
31 Nebat ccapaw Jeroboam nynh a raepaw seinaw laanpi kya zui tuh amaw hanlan zawbahaepaw uccaw lang ria zah, aning nynh Sidon hae siapharan Ethbaal ccanung Jezebel kha zu lang a hoiku, te cceih zah Baal pachia kha ryalawpah zah a beik.
32 Samaria khua kya a sakpaw Baal pachia inn lungkhu khe Baal pachia elang silawhang kha a raepya.
33 Ahab nynh Asherah kha mah a rae. Ahab nynh aning mawze a la um hae paw Israel siapharan balyn laeze Bawipaw , Israel Pachia kha a thin a riasah hua.
34 Ahab she lyakhe Bethel khuapaw Hiel nynh Jeriko khua kha a rae; Bawipaw nynh Nun ccapaw Joshua kyate a la hopaw bya thyhte, khua aleihpaw bing lyakhe a ccatawccaw Abiram hiinnaw kha zosah zah, khua koikua a rae lyakhe a ccasoi Segub hiinnaw kha a zosah.Ref 16.34: Jos 6.26