12
Thahlang e Minphuin hae Phiakunaw
(2Sh 10.1-19)
1 Israel hae balyn nynh Rehoboam kha siapharan lang khang khylan Shekhem khua lang a ccia hae keiccuze amaw mah Shekhem khua lang a cceih.
2 Tuh-e tuh Nebat ccapaw Jeroboam nynh he a thae tuh (pawccecize aning tuh Solomon Siapharan kyate a ccuenaw Izip ram kya nynh a um ung), Jeroboam tuh Izip ram kyate yn ki.
3 Israel hae nynh amaw kha a kosah hae; te Jeroboam te Israel zapi balyn nynh oun cceih hae zah Rehoboam kha,
4 “Na paaw nynh phupaw ripaw kha oun phusah vae. Tukeiccuze na paaw nynh kae tungvaw rya rupaw te phupaw ripaw oun phusahpaw hynh nang nynh oun zawsahpah lah, na rya kae lawpah cih,” a cipya hae.
5 Aning nynh minmin kha, “La cceih oh lah, nin thum koute ka kalan bua nae cceih cih oh,” a cipya hae. Tukeiccuze ccungccaw hae tuh a cceih hae.
6 Tetuh Rehoboam Siapharan nynh a paaw Solomon a hiin lyaze a do-oih hae paw piccan hae kha tuanaw ngia hae zah, “E ccungccaw hae kalan khungru lanpaw bya hynh pawtemou tuanaw nae pya cih oh?” a cipya hae.
7 Minmin nynh amaw kha, “Atunin hynh-e ccungccaw hae hanlan ryalahtu na thua zah minmin hanlan rya na lah zah bya he na khungru hae te, bya hoypaw te na khung hae zetuh, minmin tuh na ryalahtu lang zungzae a tang cih hae,” a cipya hae.
8 Thuasalama piccan hae nynh tuanaw a pya hae paw kha pawlangria khyh, amaw te ruibankheih thua hae zah amaw a do-oih hae paw ccangvae hae kha tuanaw a ngia hae.
9 Aning nynh minmin kha, “ ‘Na paaw nynh phupaw ripaw oun phusahpaw hynh oun zawsahpya tua,’ cite oun hopah hae paw e ccungccaw hae khungru lanpaw hynh pawtemou tuanaw nae pya cih oh?” a cipya hae.
10 Ruibankheih athua hae paw ccangvae hae nynh amaw kha, “ ‘Na paaw nynh phupaw ripaw oun phusahpaw hynh nang nynh oun zawsahpya tua,’ cite ae hopah hae paw e ccungccaw hae hynh hynhte na khung cih hae; minmin kha, ‘Ka kuihdung taraw hynh ka paaw tae laeze athaawhua.
11 Ka paaw nynh phupaw ripaw ae phusah oh, kae nynh nae phupaw kha houh ka buchih cih. Ka paaw nynh ccungngue te ae thuihei oh, kae nynh tuh zekang te kae thuihei cih oh,’ cite na cipah cih hae,” a cipya hae.
12 Tukeiccuze siapharan nynh, “Nin thumnaw nin kya ka kalan bua nae cceih cih oh,” cite a ho thyhte, Jeroboam te ccungccaw balyn tuh nin thumnaw nin khe Rehoboam kalan oun thua hae.
13 Siapharan nynh ccungccaw hae kha bya repaw te a khung hae. Piccan hae nynh tuanaw a pya hae paw kha pawlangria leite
14 ccangvae hae nynh a pya hae paw tuanaw thyhte minmin kha, “Ka paaw nynh phupaw ripaw ae phusah oh, kae nynh nae phupaw kha houh ka buchih cih; ka paaw nynh ccungngue te ae thuihei oh, kae nynh tuh zekang te kae thuihei cih oh,” a cipya hae.
15 Siapharan nynh ccungccaw hae bya kha ngae khyh; pawccecize Bawipaw nynh Shilon khuapaw Ahijah kha mangte Nebat ccapaw Jeroboam kya a hopaw bya kha ccingsah khylan Bawipaw nynh a ry keiccu nynh thua.
16 Siapharan nynh kae bya hynh ngae khyh cipaw kha Israel hae balyn nynh he a muih hae tuh, ccungccaw hae nynh siapharan kha,
“Kaening nynh David kya
ccoupaw pawmou kae hoi?
Jesse ccapaw kya rho kae hoi khyh.
Pou Israel, nae bu kalan cceih oh!
Pou David, namaw maw nynh
na innbyn kha do-oihku tua,”
cite a khung hae.Ref 12.16: 2Sa 20.1 Tukeiccuze Israel hae tuh mih bu raveih lang a ki hae.
17 Thuasalama Rehoboam nynh Judah khua hae kya umpaw Israel hae kha a uk hae.
18 Nangsete ryalawsahnaw kyaze uktu bawi athuapaw Adoram kha Rehoboam Siapharan nynh saw zah, Israel hae balyn nynh lung te phe chih lan a deih hae. Rehoboam Siapharan tuh Jerusalem lang ccue khylan a marangle kya arangte a ccikuh.
19 Tuhcite Israel hae nynh David ciihan kha atunin cia a dou hae.
Jeroboam nynh Israel A Uk
20 Jeroboam yn ki vae cipaw kha Israel hae balyn nynh he a thae hae tuh, ccungccaw sawte zapi pumkunaw kalan kosah hae zah Israel balyn a uktu siapharan lang a khang hae. Judah phin laelan, David ciihan a zuipaw hum sanmah um khyh.
21 Rehoboam nynh Jerusalem khua he a thua te, Israel hae kha rhawtuk lan zah peenaw kha Solomon ccapaw Rehoboam kalan bua pyathui khylan, Judah phin balyn te Benjamin phin kya-e popaw rhawkaw cciing kheit thong sung tarya kha a pum hae.
22 Thuasalama Pachia bya tuh Pachia ccungccapaw Shemaiah kalan yn thua zah:
23 Solomon ccapaw, Judah siapharan Rehoboam te Judah phin te Benjamin phin balyn te tuhlaepaw ccungccaw hae kyakhe,
24 “Bawipaw nynh hynhte a ho: Nae uno Israel hae kha tuk khylan ccianua thung nan oh. Nae balynte nae inn lang ki oh, pawccecize e hynh kamaw kyate yn thuapaw nynh thua, a ci cite hopah hae,” a cipya. Tukeiccuze minmin nynh Bawipaw bya kha ngae hae zah Bawipaw bya thyhte mih inn lang bua a ki hae.
Jeroboam kya-e Sui Vaetuataw
25 Te Jeroboam nynh Efraim muaram khe Shekhem khua kha rae zah tuin kya a um; te tuin kyate pou zah Penuel khua kha mah a rae.
26 Te Jeroboam nynh a thinlung kyakhe, “Atu tuh peenaw hynh David ciihan kalan a kithui mamin cih.
27 E ccungccaw hae nynh Jerusalem khua umpaw Bawipaw inn kyakhe silawnaw rae lan a ccia hae zetuh, e ccungccaw hae thinlung hynh mih bawipaw, Judah siapharan Rehoboam kalan bua a paleihkuh cih; kae hynh yn theih cih hae zah Judah siapharan Rehoboam kalan a ki cih hae,” cite a tua.
28 Tukeiccuze siapharan nynh tuanaw ngia hae zah sui vaetuataw ccangning kha a rae. Aning nynh ccungccaw hae kha, “Jerusalem lang palei na cciathung oh paw hynh azaw vae. Pou Israel hae, Izip ram kyate ae poukhae oh paw nae pachia hae hynh dotua oh,” a cipya hae.Ref 12.28: Exo 32.4
29 Ccangkheit kha Bethel khua kya nung zah ccangpaw ccangkheit kha Dan khua kya a nung.
30 E uccaw hynh seinaw lang a tang, pawccecize ccungccaw hae nynh Bethel kya umpaw sui vaetuataw ccangkheit kalan te Dan kya umpaw ccangpaw ccangkheit kalan cia beik lan a ccianua hae.
31 Jeroboam nynh ahangnaw hmin khe inn hae kha sak zah ccungccaw balyn kya-e Levi phin athua leipaw kha ranpibawi lang a khang hae.
32 Jeroboam nynh Judah ram kya tuapaw poi hawte, sawpaw sah taryanaw nin haw lae pangaw nin khe poi tua zah silawhang kyakhe si a law; tuhcite Bethel kya cyih zah, a raepaw sui vaetuataw hae kha si a law. A raepaw hmin hangpaw hae elang a khang hae paw ranpibawi hae kha Bethel kya a nung hae.Ref 12.32-33: Lev 23.33-34
33 Amaw makhaete a khyakupaw sawpaw sah taryanaw nin haw lae pangaw nin khe Bethel khua umpaw, amaw nynh a raepaw silawhang kalan khe a cceihthung; Israel hae elang poi ccangkheit tua zah mynkhuhpaw u khylan silawhang kalan a cceihthung.