SIAPHARAN
Kings
Samuel ccauh hae kya-e Israel siapharan hae phungpaw kha Siapharan Uk Kheitnaw kyahin piachih athua. E ccauh hynh phuin thum lang phia kho athua:
1. Solomon nynh Israel te Judah siapharan lang a tangnaw te a paaw David chinaw kong.
2. Solomon nynh a uknaw te a ryalawnaw. Abyapihua lante Jerusalem Beikinn a saknaw kong.
3. Thahlang peenaw te alia peenaw cite a phiakunaw kong te BC 850 cia tuh-e peenaw hae a uktu siapharan hae phungpaw.
Siapharan Ccauh uk ning hae kyahin uktu miakaw kha Pachia tungvaw a lungzi tou zi khyh tou cipaw syntawte byapia athua hae. Zohtuh beiknaw te kawngae leinaw nynh ronaw a thuakhae. Thahlang peenaw kya-e siapharan hae tuh tuh-e syntawnaw kya a shung hae. Alia peenaw kya-e Judah siapharan hae tuh abang shung hae zah abang a aw hae.
Siapharan Uk Kheitnaw kyaze alangkuh hua hae paw tuh Bawipaw profeh hae ryalawnaw thua zah, tuh-e hae nynh ccungccaw hae kha zohtuh beik lei lan te Pachia kaw-ei lei lan rawthungte raeringnaw pya hae zah a hopya hae. Tuh-e hae kyaze a minthaan huapaw tuh Elijah thua zah Baal profeh hae ryte a taekunaw hae kong kha byaria 18 kya a um.
1
David Siapharan A Taw Vae
1 Siapharan tuh taw vae zah a kum myarya tang vae; boei a thy hae zemah a khualung kho vae khyh.
2 Tukeiccuze a ryalahtu hae nynh amaw kha, “Siapharan ka bawipaw elang a kum nopaw liaccady kha kae ccungpah sah, aning nynh nang kha ae umkhae sah lah, ae do-oih sah; siapharan ka bawipaw tuh na khualung ccaw, na by vawlan ih sah,” a cipya hae.
3 Tukeiccuze Israel ram pynpi phe lekuh lan apuithyapaw liaccaw kha ccungpah hae zah, Shunam khuanung Abishag kha a muih hae, te siapharan kalan a cciakhae hae.
4 Liaccanung tuh myarya puithya; siapharan kha umkhae zah a do-oih, thuasalama siapharan nynh amaw kha ikhae khyh.
5 Te Haggith ccapaw Adonijah nynh amaw te amaw hangsakuh zah, “Siapharan lang ka tang cih,” ci zah, amaw hanlan marangle hae, marang rhawkaw hae te a malang a ccue lanpaw ccungccaw sung pangaw kha a paccyn.Ref 1.5: 2Sa 3.4
6 A paaw nynh, “Pawccemou hynhte khahte na cyi?” cite mah hohtutuh mah amaw kha a lunghoy lei lante hopah boi khyh. Aning tuh myarya puithya zah, Absalom he a zui lante a puipaw nynh thua.
7 Aning tuh Zeruiah ccapaw Joab, ranpibawi Abiathar ryte hobung hae zah, minmin nynh Adonijah kha a pankhae hae.
8 Thuasalama ranpibawi Zadok, Johoiada ccapaw Benaiah, profeh Nathan, Shimei, Rei te David rhawviatu rhawkaw hae tuh Adonijah kalan pan khyh hae.
9 Adonijah nynh Enrogel pe umpaw Zoheleth lungpi pe khe tuu hae, tangnuapaw hae te athopaw sahiin hae khate silawnaw rae zah, a uno hae balyn, siapharan ccapaw hae te Judah ram umpaw siapharan kuihkaw e bawi hae balyn kha a ko hae,
10 thuasalama profeh Nathan, Benaiah, rhawviatu rhawkaw hae te a neitaw Solomon kha tuh ko khyh hae.
11 Tetuh Nathan nynh Solomon nung Bathsheba kha, “Haggith ccapaw Adonijah tuh ah bawipaw David ny leite siapharan lang a tang vae cipaw na thae khyh tou?Ref 1.11: 2Sa 12.24
12 Tukeiccuze yn cceih lah, na hiinnaw te na ccapaw Solomon hiinnaw kha khum khylan tuanaw kae pyatua sah.
13 David siapharan kalan arangte la cceih lah, amaw kha, ‘Siapharan ka bawipaw, nang nynh na seenung kyaze: Na ccapaw Solomon tuh kamaw koute siapharan lang a tang cih zah, ka bawitungkhung kya a haung cih, cite bya nae kinpakuh khyh tou? Pawccemou Adonijah hynh siapharan lang a tang?’ cite la hopah.
14 Tuhcite siapharan kya bya na hopya lyakhe, kae nynh kae teethin cih zah na bya kha kae tynsah cih,” a cipya.
15 Tukeiccuze Bathsheba nynh siapharan kalan a khaan lungkhu lang a tee. Siapharan tuh myarya taw vae; Shunam khuanung Abishag nynh siapharan kha a do-oih.
16 Bathsheba nynh bakhung zah siapharan kha sawtuanaw a pya, te siapharan nynh, “Pawmou na ry?” a cipya.
17 Aning nynh siapharan kha, “Ka bawipaw, Bawipaw na Pachia min phyate na seenung hynh bya nae kinpakuh zah: Na ccapaw Solomon tuh kamaw koute siapharan lang a tang cih zah, ka bawitungkhung kya a haung cih, na ci.
18 Thuasalama siapharan ka bawipaw, atu tuh namaw mah ny leite, Adonijah tuh siapharan lang a tang vae.
19 Aning nynh tangnuapaw hae, athopaw sahiin hae te tuu hae patae khate silawnaw rae zah, siapharan ccapaw hae balyn, ranpibawi Abiathar te rhawkaw hae bawipaw Joab kha a ko hae; thuasalama na seepaw Solomon tuh ko khyh.
20 Siapharan ka bawipaw, namaw koute siapharan ka bawipaw kya-e bawitungkhung kya hummou a haung cih cipaw kha oun hopah sah cite, Israel hae balyn nynh nang kha ae do hae.
21 Tuhkhyhze tuh siapharan ka bawipaw tuh na minpaaw hae kya he na ihbua te, kae te ka ccapaw Solomon tuh seinaw a raetu hae lang oun ria vae cih hae,” a cipya.
22 Tuhcite siapharan te bya a hoku cciamang lya hae khe, profeh Nathan tuh yn teebua.
23 Siapharan kha, “E kya profeh Nathan a um,” cite a hopya hae. Aning nynh siapharan malang he a tee te, laekhu kya bakhung zah siapharan kha sawtuanaw a pya.
24 Nathan nynh, “Siapharan ka bawipaw, ‘Kamaw koute Adonijah nynh siapharan lang a tang cih zah ka bawitungkhung kya a haung cih,’ cite na ho tou?
25 Pawccecize atunin kya aning nynh cceih zah tangnuapaw hae, athopaw sahiin hae te tuu hae patae khate silawnaw rae zah, siapharan ccapaw hae balyn, rhawkaw hae bawipaw Joab te ranpibawi Abiathar kha a ko hae, minmin tuh amaw malang khe ae hae neih hae zah, ‘Siapharan Adonijah tuh a hiinshe sae vae sah!’ a ci hae.
26 Thuasalama na ryalahtupaw kae, ranpibawi Zadok, Jehoiada ccapaw Benaiah te na ryalahtupaw Solomon tuh oun ko khyh.
27 Namaw koute siapharan ka bawipaw kya-e bawitungkhung kya hummou a haung cih cipaw kha na ryalahtupaw kae hynh nysah leite, siapharan ka bawipaw nynh e ryalaw hynh phe na law vae tou?” a cipya.
Solomon Siapharan lang Tangnaw
28 David Siapharan nynh, “Bathsheba kha ka kalan yn kotua,” a cipya. Tukeiccuze Bathsheba tuh siapharan umnaw lang yn tee zah siapharan malang khe a thadyn.
29 Siapharan nynh, “Vawsawnaw miakaw kyate ka hiinnaw yn khumpaw Bawipaw tuh a hiin thyhte,
30 Bawipaw , Israel Pachia min phyate bya kae kinpakuh zah, ‘Na ccapaw Solomon tuh kamaw koute siapharan lang a tang cih zah, kamaw ccelang ka bawitungkhung kya a haung cih,’ kae cipya hawte, atunin ka cyih cih,” a cipya.
31 Tetuh Bathsheba nynh laekhu kya bakhungte siapharan kha sawtuanaw pya zah, “Ka bawipaw David Siapharan tuh zungzae hiin vae sah!” a ci.
32 David Siapharan nynh, “Ranpibawi Zadok, profeh Nathan te Jehoiada ccapaw Benaiah kha ka kalan oun ko oh,” a ci. Minmin tuh siapharan malang he a thua hae te,
33 Siapharan nynh minmin kha, “Nae bawipaw kya-e ryalahtu hae kha ko oh lah, ka ccapaw Solomon kha ka lann kya ccisakuh oh lah, Gihon lang cciakhae bung oh.
34 Ranpibawi Zadok te profeh Nathan nynh tuin kyakhe Israel hae balyn a uktu siapharan lang chitui thuh hae sah; te mungkae tu oh lah, ‘Solomon Siapharan tuh a hiinshe sae vae sah!’ cite sia oh.
35 Nanning nynh amaw kha na zui cih oh. Aning tuh yn tee cih zah ka bawitungkhung kya a haung cih; kamaw ccelang siapharan lang a tang cih; pawccecize aning kha Israel te Judah a uktu lang ka khang vae,” a cipya hae.
36 Jehoiada ccapaw Benaiah nynh siapharan kha, “Amen! Bawipaw , siapharan ka bawipaw Pachia nynh mah tuhcite ho vae sah.
37 Bawipaw tuh siapharan ka bawipaw kya a um hawte, Solomon kya mah um vae sah, te a bawitungkhung tuh ka bawipaw David Siapharan kya-e bawitungkhung laeze mah lesaehua vae sah,” a cipya.
38 Te ranpibawi Zadok, profeh Nathan, Jehoiada ccapaw Benaiah, Khereth hae te Peleth hae nynh cceih hae zah Solomon kha David Siapharan lann tungvaw ccisakuh hae zah Gihon lang a cciakhae hae.
39 Ranpibawi Zadok nynh bu kya-e chitui ruinkuhpaw saki kha lah zah Solomon kha a thuh. Te mungkae kha tu hae zah ccungccaw balyn nynh, “Solomon Siapharan tuh a hiinshe sae vae sah!” cite a sia hae.
40 Ccungccaw balyn nynh amaw kha zui hae zah phyly tu biate, myaryamaw mih lungpaw zah laephi phe hy lan cia mih roi a saw hae.
41 Adonijah te a kya umpaw mikhia hae balyn nynh loohdangnaw poi a thangsah lya hae khe, tuh-e roi tuh a thae hae. Joab nynh mungkae roi he a thae tuh, “Khuapi lungkhu kya siarisiaraepaw roi tuh pawkeiccumou athua?” a ci.
42 Bya a ho cciamang lyakhe, Ranpibawi Abiathar ccapaw Jonathan tuh yn thua. Adonijah nynh, “Yn tee, nang tuh mihoypaw na thua zah, thehoypaw kha nae thuakhae mamin cih,” a cipya.
43 Jonathan nynh Adonijah kha, “Thua khyh, ah bawipaw David Siapharan nynh Solomon kha siapharan lang a khang vae;
44 siapharan nynh ranpibawi Zadok, profeh Nathan, Jehoiada ccapaw Benaiah, Khereth hae te Peleth hae kha Solomon ryte saw hae zah, minmin nynh siapharan lann kha a ccisaku vae hae;
45 ranpibawi Zadok te profeh Nathan nynh amaw kha Gihon kya siapharan lang chitui a thuh vae hae; tuin kyate lungtua lungpawte a cceihthung vae hae, tukeiccuze khuapi tuh siarisiarae um zah, tuh-e roi tuh nynh na thae.
46 Solomon tuh siapharan bawitungkhung kya a haung.
47 Tuhpiaze siapharan a ryalahtu hae nynh ah bawipaw David Siapharan kha sawtuanaw pya lan cceih hae zah, ‘Pachia nynh Solomon min kha na min laeze athaanhua lante rae sah lah, a bawitungkhung kha na bawitungkhung laeze alesaehua lante rae vae sah,’ a ci hae. Siapharan tuh ikhung vawlan a lu bakhungte beik zah,
48 ‘Ka ciihan lu kheit kha ka bawitungkhung kya haungsah zah, tuh-e tuh yn muihsahtupaw Bawipaw , Israel Pachia tuh thehoyte um sah,’ cite saw a sang,” a cipya.
49 Tetuh Adonijah a mikhia hae balyn tuh thyngkute thokuh hae zah mih laanpi raveih lang a cceih vae hae.
50 Adonijah tuh Solomon raw a ri keiccuze thokuh zah silawhang a ki hae kalan khe cceih zah a kyng.
51 “Adonijah nynh Solomon raw a ri keiccuze silawhang a ki hae kha kyng zah, ‘Solomon Siapharan nynh a ryalahtupaw kae hynh thaloi te kae theih lan khyh cite masaty bya yn kinpakuh sah,’ a ci,” cite Solomon kha a hopya hae.
52 Tukeiccuze Solomon nynh, “Mihoypaw a thuanaw kha a langsah zetuh, a sangrua ccangkheit sanmah laekhu lang ccah lan khyh; thuasalama a tungvaw kya hoyleinaw muih athua zetuh a chih cih,” a ci.
53 Te Solomon Siapharan nynh ccungccaw saw hae zah aning kha silawhang kyate a kosah hae. Aning tuh yn thua zah Solomon Siapharan kha sawtuanaw a pya; te Solomon nynh amaw kha, “Na inn lang la cceih,” a cipya.