5
Gilgal kya Vingdungawnaw
1 Israel hae nynh Jordan vaw a zua kou makhia hae, Bawipaw nynh Jordan vaw e tui tuh a rousahpya hae cipaw kha Jordan khuraw niccaw lang umpaw Amor hae siapharan hae balyn te rili pe umpaw Kanaan hae siapharan hae balyn nynh he a thae hae tuh, Israel hae keiccu rih hae zah mih rawthungnaw phe zo vae.
2 Tuh ccyh lyakhe Bawipaw nynh Joshua kha, “Rihlung ccezung hae kha rae lah, Israel hae tuh vae ningnaw vingdungaw hae,” a cipya.
3 Tukeiccuze Joshua nynh rihlung ccezung hae tuh rae zah, Gibeath-haaralothnote5.3 “Vingdung Mua” cipaw nynh thua. kyakhe Israel hae kha vingdung a aw hae.
4 Pawkeiccumou Joshua nynh Israel hae tuh vingdung a aw hae ci ze: Izip ram te a pou hae paw pise hae balyn, rhawkaw hae balyn tuh Izip kyate a pou kou hae te, ramkaw laanryng kya phe chih vae hae.
5 Izip ram kyate oun pou hae paw balyn tuh vingdungaw vae paw a la thua hae zemah, Izip ram kyate a pou kou hae te, ramkaw laanryng kya a pui hae paw balyn tuh vingdungaw thua loh khyh hae.
6 Pawccecize Izip ram kyate a pou hae paw minphuin pynpi, rhawkaw hae tuh Bawipaw bya kha ngae khyh hae zah a chi mawlaezung hae, Israel hae tuh ramkaw kya kum sung pali a cceih hae. Bawipaw nynh minpaaw hae kyaze kae pya cih oh cite bya a kinpyaku hae paw ram, mateitui te khoilutui aluanaw ram kha minmin nynh muih lei lante Bawipaw nynh thya a law hae.Ref 5.6: Nam 14.28-35
7 Tukeiccuze tuh-e ccungccaw hae ccelang a puisah hae paw mih ccaaw hae kha Joshua nynh vingdung a aw hae; pawccecize minmin tuh laanryng kya vingdungaw thua loh khyh hae.
8 Mih minphuin pynpi te vingdung a awkuh kou hae te, phe a dan hae cia ryahmin lungkhu mih umnaw kya a um hae.
9 Bawipaw nynh Joshua kyakhe, “Izip ram e saryanaw kha nae kyate atunin ka vua vae,” a ci. Tukeiccuze tuh-e hmin tuh Gilgalnote5.9 gilgal: cipaw tuh Hebru bya te “vua” cite hopaw roi te alokuh. cite atunin cia ko athua.
Gilgal kya Kawtaw Poi
10 Israel hae nynh Gilgal kya a rya lya hae, tuh-e sawpaw nin haw lae pali nin zete khe Jeriko bialae kya kawtaw poi a tua hae.Ref 5.10: Exo 12.1-13
11 Kawtaw poi koute awkhualan, tuin nin ccaccei khe ram kyate apoupaw, ransi phing leipaw sanlou te thoupaw ccathae kha a ae hae.
12 Ram kyate apoupaw looh a ae nin hae khe manna tuh phe thang zah Israel hae nynh manna kha hoi vae khyh hae; tuin kum kyakhe Kanaan ram kyate apoupaw looh kha a ae hae.Ref 5.12: Exo 16.35
Joshua Vizin
13 Joshua tuh Jeriko khua pe a um lyakhe, ngawdo zah ccungccapaw lu kheit thaloi thuaakute a malang phang a thadynpaw kha a muih. Joshua nynh a kalan ccianua zah, “Nang hynh kaening kalan na panpaw tou? Tuhkhyhze kae rhaw hae kalan na panpaw tou?” cite a khia.
14 Tuh-e paw nynh, “Thua khyh, Bawipaw rhawkaw hae kya-e rhawbawi lante atu kae thua vae,” a cipya. Te Joshua nynh laekhu kya bakhungte beik zah, “Ka Bawipaw, na ryalahtu kae hynh pawmou nae naw ry?” a ci.
15 Bawipaw rhawkaw hae kya-e rhawbawipaw nynh Joshua kha, “Na phanah kha khahkuh; pawccecize na thadynnaw hmin tuh athyaapaw nynh thua,” a cipya. Te Joshua nynh a hopya thyhte a cyi.