3
Israel hae Jordan Zuanaw
1 Joshua tuh awkhua takaw te tho zah Israel hae balyn ryte Shittim kyate cceih hae zah Jordan vaw a thua hae. Khuraw lang a zua maw hae, tuin kya ryahmin a tahku hae.
2 Nin thum koute bawi hae tuh ryahmin kya khiakuh hae zah,
3 ccungccaw hae kha, “Levi phin ranpibawi hae nynh a puih hae paw Bawipaw nae Pachia kya-e byakin thingkua kha he na muih oh te, nae umnaw kyate na thokuh cih oh zah na zui cih oh,
4 tuhteze nynh na zui lan oh paw laanpi kha na nyh cih oh, pawccecize e laanpi hynh langmawlya tuh na zui boi khyh oh. Tuhzemah nanning te byakin thingkua tuh dong thong ning loukaw asawkuh cih; a pe lang na naekuh lan khyh oh,” cite kaw a pya hae.
5 Joshua nynh ccungccaw hae kha, “Thyaasahku tua oh; pawccecize Bawipaw nynh awkhualan nae kyakhe ngaeangnaw a rae cih,” a cipya hae.
6 Joshua nynh ranpibawi hae kha, “Byakin thingkua kha puih oh lah, ccungccaw hae malang khe cceih oh,” a cipya hae. Tukeiccuze byakin thingkua kha puih hae zah ccungccaw hae malang a cceih hae.
7 Te Bawipaw nynh Joshua kyakhe, “Israel hae balyn muihnaw kya nang kha atunin te kae hangthung vae cih, tuhteze nynh Moses kya ka la um hawte na kya ka um cipaw kha minmin nynh a nyh cih hae.
8 Te byakin thingkua a puihtu ranpibawi hae kha, ‘Jordan vaw tui kin he na thua oh te, Jordan vawkhu kya na thadyn cih oh,’ cite kaw na pya cih hae,” a cipya.
9 Te Joshua nynh Israel hae kha, “Hynhlang oun naekuh oh lah, Bawipaw nae Pachia bya kha thaetua oh,” a cipya hae.
10 Te Joshua nynh, “Ahiinpaw Pachia tuh nae kya um zah, Kanaan hae, Hit hae, Hiv hae, Periz hae, Girgash hae, Amor hae te Jebus hae kha nae malang kyate solei a dee cih hae cipaw tuh hynh-e liate na nyh cih oh:
11 laephi pynpi Bawipaw kya-e byakin thingkua tuh nae malang Jordan vaw kha a zua cih.
12 Tukeiccuze Israel minphuin hae kyate phuin kheit kya-e lu kheit ccite lu haw lae ning kha po oh.
13 Te laephi pynpi Bawipaw athuapaw Bawipaw kya-e byakin thingkua a puihtu ranpibawi hae ccuphe nynh Jordan tui kha he a sy te, palung langte yn luapaw Jordan tui tuh thoh pae cih zah, san kheit kya tingkute a thadyn cih,” a ci.
14 Ccungccaw hae tuh Jordan vaw zua khylan mih bu kyate he a pou hae te, byakin thingkua a puihtu ranpibawi hae tuh ccungccaw hae malang a cceih hae.
15 Loohrue ccyh balyn kya Jordan vaw tuh varang lang cia pong aleikuh. Tukeiccuze byakin thingkua a puihtu hae tuh Jordan vaw thua hae zah, tuh-e a puihtu ranpibawi hae ccuphe nynh tui kha he a sy te,
16 palung langte aluapaw tui tuh phang thadyn zah, asawnaw umpaw Zerethan khua pe e Adam khua kyacia tui tuh san kheit kya atingkuh thung; Arabah rili cikuhpaw Rili Chih kalan alua hae paw tuh marya a kan hae; te ccungccaw hae tuh Jeriko khua langkhe hawite a zua hae.
17 Israel hae balyn tuh laerou kyate vaw khuraw a zua cciamang lya hae te minphuin pynpi nynh laerou kyate khuraw a zua kou hae makhia, Bawipaw byakin thingkua a puihtu ranpibawi hae tuh Jordan vaw angaelung laerou kyakhe phang a thadyn hae.