24
Joshua Hopaw Nyathya Bya
1 Te Joshua nynh Israel minphuin hae balyn kha Shekhem kya pum hae zah, Israel piccan hae, lupi hae, byapiatu hae te bawi hae kha a ko hae, te Pachia malang khe oun thua hae.
2 Te Joshua nynh ccungccaw hae balyn kha, “Israel Pachia nynh hynhte a ci: Langmawlya nae minpaaw hae tuh Zufrates vaw khuraw langkhe nynh a la um hae, Abraham te Nahor mih paaw Terah nynh ccangpaw pachia hae kha a la beik hae.Ref 24.2: Gen 11.27
3 Te nae paaw Abraham tuh Vaw khuraw lang ka ko zah, Kanaan ram lungkhu khe phe lekuh lan ka cciakhae, a ciihan kha patae ka pungzaesah. Isak kha ka pya zah,Ref 24.3: Gen 12.1-9, 21.1-3
4 Isak tuh Esau te Jakob kha ka pya. Te Seir muaram kha Esau ka pya, thuasalama Jakob te a ciihan hae kha tuh Izip lang a cceihbung hae.Ref 24.4: Gen 25.24-26, 36.8, 46.1-7; Deu 2.5
5 Te Moses te Aaron kha ka saw hae zah Izip tuh a lungkhu kya ka raepaw vawsawnaw khate de ka tah; te nyalangte nanning kha kae poukhae oh.Ref 24.5: Exo 3.1—12.42
6 Te nae paaw hae kha Izip kyate ka poukhae hae zah Rili Se kya a thua hae, te Izip ccungccaw hae nynh nae paaw hae kha marangle te marang rhawkaw ryte Rili Se kyacia a deehui hae.Ref 24.6-7: Exo 14.1-31
7 Te Bawipaw kha he a ko hae te, Izip ccungccaw hae te nae laku kya mohnaw a nung, te rili kha mih tungvaw lang ka luasah thin hae zah, tui pong ka vusah hae; nae mit nynh Izip tungvaw ka cyipaw kha a muih; te ramkaw kya khaw cia na la um oh.
8 Te Jordan khuraw lang kya um hae paw Amor hae ram lang kae cciakhae oh; nanning kha ae dou oh zah, minmin tuh nae kuih kalan kae pya oh, mih ram tuh na lah oh zah minmin kha nae malang khe ka ro hae.Ref 24.8: Nam 21.21-35
9 Zippor ccapaw Balak, Moab siapharan tuh thokuh zah Israel kha a dou. Te nanning kha thyalaw khylan ccungccaw saw hae zah Beor ccapaw Balaam kha a hyy.Ref 24.9-10: Nam 22.1—24.25
10 Thuasalama Balaam bya kha ka ngaepah khyh, tukeiccu aning nynh hythuanaw ae pya oh; hynhcite nynh nanning kha a kuih kyate kae thuaa oh.
11 Te Jordan vaw kha na zua oh zah, Jeriko kya na thua oh, Jeriko khua e ccungccaw hae te Amor ccungccaw hae, Periz ccungccaw hae, Hit ccungccaw hae, Girgash ccungccaw hae, Hiv hae te Jebus hae nynh zemah nanning kha ae dou oh; minmin tuh nae kuih kya kae pya oh.Ref 24.11: Jos 3.14-17, 6.1-21
12 Te Amor hae siapharan lu ning kha nae malang kyate a deetu lang khoingae kha nae malang ka saw; nae thaloi te thua khyh, nae li nae the te thua khyh.Ref 24.12: Exo 23.28; Deu 7.20
13 Loo lang na pho boi leinaw oh ram te khua na la sah boi leinaw oh khua hae kha kae pya oh zah, tuin kya na um oh, na lin lei oh paw misu khokhu te oliv khokhu kya-e athae hae kha na ae oh.Ref 24.13: Deu 6.10-11
14 “Tukeiccuze atu tuh Bawipaw kha rih oh lah, amaw rya kha lungthyaanaw te lungzinaw khate lawtua oh; Vaw khuraw lang te Izip ram kya nae minpaaw hae nynh a la beik hae paw pachia hae kha vua oh lah, Bawipaw kha beik oh.
15 Te Bawipaw kha na beik ry khyh oh ze, atunin kya na beik lan oh paw kha pokuh oh; Vaw khuraw lang e ram kya nae minpaaw hae nynh a la beik hae paw pachia hae tou, tuhkhyhze na umnaw oh Amor hae pachia hae kha tou na pokuh cih oh; thuasalama kae te ka innbyn hae tuh Bawipaw kha kae beik cih,” a ci.
16 Ccungccaw balyn nynh, “Bawipaw kha pachia ccangpaw beik taw lan zah, vua lan kae ci boi lan khyh!
17 Pawccecize Bawipaw kae Pachia tuh kaening te kae minpaaw hae kha seetangnaw inn, Izip ram kyate oun poukhaetu te kae mit nynh a muihnaw kya syntawnaw alepi a raetu te kae ccianaw takyhte kae thuanaw minphuin hae balyn kyate oun hiinsahtu nynh thua.
18 Te Bawipaw nynh kae malang e ccungccaw hae balyn, ram lungkhu um hae paw Amor ccungccaw hae kha a dee hae; tukeiccuze kaening mah kae Pachia athua keiccuze kae beik cih,” a cipya hae.
19 Thuasalama Joshua nynh ccungccaw hae balyn kha, “Bawipaw rya tuh na lawpah kho khyh oh, pawccecize amaw tuh athyaapaw Pachia nynh thua; eiung mangpaw Pachia nynh thua; nae cyiseinaw thuasah, nae seinaw thuasah ae ngaethya lan khyh oh.
20 Nanning nynh Bawipaw kha na vua oh zah, ramccang pachia hae kha na beik oh ze, nae kya hoynaw a rae kou khate nynh yn paleihkuh cih zah, vawsawnaw ae pya cih oh, te marya ae roh cih oh,” a ci.
21 Te ccungccaw hae balyn nynh Joshua kha, “Tuhte thua khyh, thuasalama Bawipaw kha nynh kae beik cih,” a ci hae.
22 Te Joshua nynh ccungccaw hae kha, “Bawipaw kha beik lan na poku vae oh cipaw ccaekia tuh naemaw hynh nynh na thua oh,” a cipya hae. Te minmin nynh, “Ccaekia tuh kaemaw hynh nynh kae thua,” a ci hae.
23 Aning nynh, “Hynhte athua lanze nae kya umpaw ramccang pachia hae kha vua oh lah, nae thinlung te Bawipaw , Israel Pachia kya beeku tua oh,” a cipya hae.
24 Te ccungccaw hae balyn nynh Joshua kha, “Bawipaw kae Pachia tuh kae beik cih zah, amaw bya kha kae ngae cih,” a ci hae.
25 Tukeiccuze Joshua nynh tuin nin khe ccungccaw hae balyn ryte byakinnaw kha rae hae zah, minmin elang Shekhem kya phungbya te phungzae kha a raepya hae.
26 Te alepaw lung ccangkheit kha lah zah, Bawipaw beikinnthyaa kya umpaw phaesi ku kaw khe a bing.
27 Te Joshua nynh ccungccaw hae kha, “Dotua oh, e lung hynh aening kya ccaekia athua cih, pawccecize Bawipaw nynh aening kya a hopaw balyn kha hynh-e lung nynh a thae; tukeiccuze Pachia kha na hynpya oh ze, e lung tuh nanning kha rawsete ccaekia lang a tang cih,” a cipya hae.
28 Te Joshua nynh ccungccaw hae kha a ccou hae paw mih ram langkhe a cciasah hae.
Joshua te Eleazar Chinaw
29 Hynh-e koute Bawipaw seepaw Nun ccapaw Joshua tuh za kheit kum haw acih te a chih,
30 te minmin nynh Gaash Mua palung lang, Efraim muaram kya umpaw, amaw nynh rho a ccoupaw Timnath-serah kyakhe a uu hae.Ref 24.30: Jos 19.49-50
31 Joshua a hiin lungkhu balyn thuasah, Bawipaw nynh Israel hae elang rya a lawpaw balyn a nyhtu hae Joshua nukhu e piccan hae she lungkhu balyn thuasah Israel hae nynh Bawipaw kha a beik hae.
32 Israel hae nynh Izip ram kyate oun cciakhae hae paw Josef ru kha Jakob nynh Shekhem a paaw Amor a ccapaw kya-e phua za kheit te a repaw Shekhem khua e laephi kyakhe a uu hae; tuh-e hmin tuh Josef ciihan hae rho lang a tang.Ref 24.32: Gen 33.19, 50.24-25; Exo 13.19; Joh 4.5; Loc 7.16
33 Te Aaron ccapaw Eleazar kha mah chih zah, amaw ccapaw Finehas nynh Efraim muaram kya a ccoupaw Gibeah khua khe a uu hae.