17
Ccangpaw Manasseh Phin Angankuh
1 Te Manasseh tuh Josef a ccatawccaw athua keiccuze ccungthydungte Manasseh phin kha ram a pya hae. Manasseh a ccatawccaw Makhir, Gilead a paaw tuh rhawkaw athua keiccuze Gilead ram te Bashan ram kha a pya hae.
2 Te tuhlaepaw Manasseh phin hae tuh mih puizia thyhte, Abiezer, Helek, Asriel, Shekhem, Hefer te Shemida kha ccungthydungte a nee hae; e hae tuh mih puizia thyhte Josef ccapaw Manasseh ciihan pise hae nynh thua hae.
3 Manasseh ccapaw Makhir, Makhir ccapaw Gilead, Gilead ccapaw Hefer, Hefer ccapaw Zelofehad tuh ccapaw saah khyh, ccanung hae kyalya nynh a saah; a ccanung hae min tuh: Mahlah, Noah, Hoglah, Milkah te Tirzah nynh thua hae.
4 Minmin nynh ranpibawi Eleazar, Nun ccapaw Joshua te cciakhaetu hae kalan oun cceih hae zah, “Kaening hynh kae puizia pise hae ryte rho pyabua lan Bawipaw nynh Moses kha kaw a pya,” a cipya hae. Tukeiccuze Bawipaw kawbya thyhte mih paaw uno hae ryte rho kha a pyabua hae.Ref 17.4: Nam 27.1-7
5 Tuhcite Jordan khuraw lang umpaw Gilead ram te Bashan ram kha hobia leite, Manasseh nynh pum haw kha a ccou;
6 pawccecize Manasseh a ccanung hae nynh a ccapaw hae ryte rho kha a ccoubua vae hae. Gilead ram tuh ccangpaw Manasseh phin hae nynh a ccou hae.
7 Manasseh ram tuh Asher kyate Shekhem nithua lang umpaw Mikmethath kyacia a thua, te ramri tuh alia lang En-Tappuah hae umnaw cia a thua.
8 Tappuah ram tuh Manasseh kya-e nynh thua, thuasalama Manasseh ramri kya umpaw Tappuah khua tuh Efraim ciihan hae kya-e nynh thua.
9 Te ramri tuh Kanah Vaw langkhe a cceihbung. E vaw kyate alia lang e Manasseh khua hae kya umpaw khua hae tuh Efraim kya-e nynh thua. Te Manasseh ramri tuh tuh-e vaw thahlang khe po cceih zah rili kyakhe athang.
10 Alia lang e ram tuh Efraim ram thua zah thahlang e ram tuh Manasseh ram nynh thua, ramri tuh rili nynh thua, thahlang tuh Asher ram cia thua zah, nithua lang tuh Issakhar ram kyacia a thua.
11 Te Issakhar ram te Asher ram lungkhu hin, Beth-shean khua te a khua taraw hae, Ibleam khua te a khua taraw hae, Dor khua te a khua taraw hae kya um hae paw, Endor khua te a khua taraw hae kya um hae paw, Taanak khua te a khua taraw hae kya um hae paw, Megiddo khua te a khua taraw hae kya um hae paw tuh Manasseh kya-e nynh thua hae; (ccangthumnaw tuh Nafath nynh thua).
12 Tuhzemah Manasseh ciihan hae nynh tuh-e khua hae tuh ccou kho khyh hae; Kanaan hae tuh tuh-e ram kya po um hae.
13 Thuasalama Israel hae nynh mih thawzung he yn um tuh, Kanaan hae kha riasepaw rya a lawsah hae, thuasalama marya te tuh dee kou khyh hae.
Josef Phin nynh Byalungnaw
14 Te Josef phin hae nynh Joshua kha, “Kaening tuh Bawipaw nynh hythua oun pya zah milu myarya kae lung vae, pawccemou pum kheit, ram kheit kyalya hynh rho lang nae pya?” a cipya hae.
15 Te Joshua nynh minmin kha, “Nanning tuh milu myarya na lung oh zah, Efraim kya-e muaram tuh nae hanlan eih aby lanze, Periz hae te Refaim hae ram umpaw tuhpi kalan khuin la cceihthung oh lah, la vawkuh oh,” a cipya hae.
16 Josef phin hae nynh, “Muaram tuh kae hanlan zaw khyh; Beth-shean khua te a khua taraw hae kya um hae paw te Jezreel Accya te a khua taraw hae kya um hae paw Kanaan hae balyn tuh sivaw marangle a hoi hae,” a cipya hae.
17 Te Joshua nynh Josef ciihan athua hae paw Efraim phin te Manasseh phin hae kyakhe, “Nanning tuh milu na lung ccaccing oh zah thawzung myarya na hoi oh; nae hanpaw ccangkheit kyalya tetuh na ccou lan khyh oh,
18 muaram tuh nae kya-e athua cih, tuhpi athua zemah na vawkuh cih oh zah ramri adianaw kyacia na ccou cih oh; Kanaan hae tuh sivaw marangle hoi hae zah athung hae zemah na dee cih oh,” a cipya hae.