13
Tae lan ungpaw Ram hae
1 Joshua tuh taw vae zah a kum myarya tang vae; Bawipaw nynh, “Nang tuh na taw vae zah na kum myarya tang vae, thuasalama law lan zah ccou lanpaw ram patae um ung.
2 E hae hynh lawte ccou lanpaw ram hae nynh thua hae: Filistin hae ram abalynte Geshur hae ram abalyn
3 (Izip nithua lang umpaw Shihor vawkhu kyate thahlang umpaw Ekron ramri kyacia, Ekron tuh Kanaan hae lante riabia athua; te Filistin uktu hae lu pangaw tuh Gaza, Ashdod, Ashkelon, Gath te Ekron nynh thua hae),
4 alia lang tuh Kanaan hae ram abalyn, Sidon hae ram athuapaw Mearah, Amor hae ramri Afek kyacia,
5 Gebal hae ram te nithua lang e Lebanon ram abalyn, Hermon mua kaw umpaw Baal-gad kyate Lebo-hamath khua kyacia,
6 muaram kya um hae paw abalyn, Lebanon mua kyate Misrefoth-maim kyacia, Sidon hae abalyn. Kamaw ccaccei nynh Israel hae malang kyate ka dee cih hae; kaw kae pya vae hawte ram tuh Israel hae kha nee hae.Ref 13.6: Nam 33.54
7 Tukeiccuze atu tuh hynh-e ram hynh Israel hae phin takua te Manasseh phin angankuh hae kha rho lang nee hae,” a cipya.
Jordan Nithua lang Ram
8 Reuben phin, Gad phin te ccangpaw Manasseh phin angankuh hae nynh Moses nynh a pya hae paw mih rho, Jordan khuraw nithua lang kha a ccou hae, Bawipaw ryalahtu Moses nynh a pya hae thyhte:Ref 13.8: Nam 32.33; Deu 3.12
9 Arnon Vaw kin kya umpaw Aroer khua kyate tuh-e vahue ngaelung umpaw khua, Medeba bialae abalynte Dibon kyacia;
10 te Heshbon khua a uktupaw Amor hae siapharan Sihon kya-e khua hae abalyn, Ammon hae ramri kyacia;
11 Gilead ram, Geshur hae te Maakath hae ram, Hermon Mua abalyn, Bashan ram abalynte Salekah kyacia;
12 Ashtaroth khua te Edrei khua a uktupaw Bashan siapharan Og nynh a peenaw abalyn (Refaim minphuin hae kyaze amaw rou hynh nynh a hiinhy vae); e hae hynh Moses nynh tae hae zah a dee hae.
13 Tuhzemah Israel hae nynh Geshur hae te Maakath hae kha dee khyh hae; Geshur te Maakath tuh Israel hae kya atunin cia a um hae.
14 Moses nynh Levi phin kyalya kha nynh rho pyabua khyh; Bawipaw , Israel Pachia kalan maee-ute silawnawpaw hae tuh Bawipaw nynh a hopya hae thyhte mih rho nynh thua.Ref 13.14: Deu 18.1
Reuben Ram
15 Te Moses nynh Reuben phin hae kha mih puizia hae thyhte rho a pya hae.
16 Mih ram tuh Arnon Vaw kin umpaw Aroer khua, tuh-e vahue ngaelung umpaw khua te Medeba pe umpaw bialae abalyn;
17 Heshbon te bialae um hae paw a khua hae abalyn, Dibon khua, Bamoth-baal khua, Beth-baal-meon khua,
18 Jahaz khua, Kedemoth khua, Mefaath khua,
19 Kiriathaim khua, Sibmah khua, mua vaw bialae kya umpaw Zereth-shahar khua,
20 Beth-peor khua, Pisgah apandaw hae, Beth-jeshimoth khua,
21 tuh-e hae tuh abialaenaw umpaw khua hae abalynte Heshbon khua a uktupaw, Amor siapharan Sihon a peenaw abalyn nynh thua. Moses nynh Sihon te a ram kya um hae paw Midia hae a cciakhaetu hae Evi, Rekem, Zur, Hur te Reba kha a tae hae, hynh-e cciakhaetu hae tuh tuin ram e Sihon kuihkaw um hae paw bawi hae nynh thua.
22 Israel hae nynh a chia hae paw kyaze Beor ccapaw Balaam, naawthyapaw kha mah thaloi te a chiabua hae.
23 Reuben phin hae ramri tuh Jordan vaw te a vahue kha nynh thua. E hynh Reuben phin hae nynh mih puizia hae thyhte a ccou hae paw khuapi hae te khua taraw hae nynh thua.
Gad Ram
24 Te Moses nynh Gad phin hae kha mah mih puizia hae thyhte rho a pya hae.
25 Mih ram tuh Jazer khua te Gilead ram e khua hae abalynte, Ammon hae ram angankuh, Rabbah nithua lang umpaw Aroer khua kyacia,
26 Te Heshbon khua kyate Ramath-mizpeh khua te Betonim khua kyacia, te Mahanaim khua kyate Debir ram kyacia,
27 te Jodan vahue kya umpaw Beth-haram khua, Beth-nimrah khua, Sukkoth khua te Zafon khua, Heshbon siapharan Sihon a peenaw kya-e alaepaw ram; Jordan vaw te a vahue, Khinnereth Rili alia lang athangnaw kyacia, Jordan vaw khuraw nithua lang nynh thua.
28 E tuh Gad phin hae nynh mih puizia thyhte a ccou hae paw khuapi hae te khua taraw hae nynh thua.
Manasseh Phin Angankuh kya-e Ram
29 Te Moses nynh Manasseh phin angankuh kha rho a pya hae; Manasseh phin angankuh tuh mih puizia thyhte rho nee athua hae.
30 Mih ram tuh Mahanaim kyate Bashan ram abalyn, Bashan siapharan Og a peenaw abalyn, Bashan ram kya umpaw Jair khua hae abalyn khua sung taruh,
31 Gilead ram angankuh, Bashan ram kyaze Og a peenaw kya umpaw Ashtaroth khua te Edrei khua; e ram hae hynh Manasseh ccapaw Makhir ciihan hae—Makhir hae angankuh kha—mih puizia hae thyhte nee athua hae.
32 E rho hae tuh Moses nynh Jordan khuraw Jeriko khua nithua lang, Moab bialae kya a nee hae paw rho hae nynh thua.
33 Thuasalama Moses nynh Levi phin hae kha rho pya khyh hae; minmin kha Bawipaw nynh a hopya hae thyhte Bawipaw , Israel Pachia tuh mih rho nynh thua.Ref 13.33: Nam 18.20; Deu 18.2