JOSHUA
Joshua
Joshua ccauh tuh Moses he a zuipaw Joshua cciakhaenaw te Israel hae nynh Kanaan ram a lawnaw hae kong phungpaw nynh thua. E ccauh lungkhu hin Jordan vaw a zuanaw hae, Jeriko khua a lawnaw hae, Ai khua a dounaw hae, Pachia te a ccungccaw hae laku kya athaw lante byakinnaw a raenaw hae kong a um. E ccauh kya a nyhua hae paw byatue tuh, “Atunin kya na beik lan oh paw kha pokuh oh … kae te ka innbyn hae nynh tuh Bawipaw kha nynh kae beik cih,” (24.25) acikuhpaw hynh nynh thua.
1
Pachia nynh Joshua Rya A Pya
1 Bawipaw ryalahtu Moses a chih koute, Moses a bawmtu, Nun ccapaw Joshua kha Bawipaw nynh,
2 “Ka ryalahtu Moses tuh a chih vae; nang te hynh-e ccungccaw hae balyn nynh Jordan vaw kha zua oh; minmin, Israel hae ka pya cih hae paw ram lungkhu lang tee oh.
3 Moses kya bya ka kinpyaku vae hawte, nae ccuphe nynh a sy cihnaw hmin miakaw tuh nanning kae pya vae oh.Ref 1.3-5: Deu 11.24-25
4 Ramkaw te hynh-e Lebanon kyate vaw lepaw Zufrates vawpi kyacia, Hit hae ram balyn, niccaw lang Rili Lepaw kyacia nae ram lang a tang cih.
5 Na she lungkhu balyn humhung nynh mah na malang te ae thadynnua ngan lan khyh; Moses kya ka um hawte na kya mah ka um cih; kae vua lan khyh, kae cciataw lan khyh.Ref 1.5: Deu 31.6, 8; Heb 13.5
6 Na thawsaesakuh lah, na rawthungsakuh; pawccecize mih minpaaw hae kya pya lan bya ka kinpyaku hae paw ram tuh e ccungccaw hae hynh na ccousah cih hae.Ref 1.6: Deu 31.6, 7, 23
7 Ka ryalahtu Moses nynh kaw ae pyapaw phungbya thyhte raeringkute cyi lan na thawsaesakuh lah, myarya na rawthungsakuh; na ccianaw miakaw kya na laan na sui a ua nawlan, na voi na rang lang maekuh nan.
8 E kawbya ccauh hynh na khalang kyate phiakuh nan sah; a lungkhu zeikuhpaw balyn thyhte cyi lan na raeringku thya nawlan khuazi khuadae tuh-e tuh na tua cih; tetuh na tuakunaw hawte accing cih zah na laan na sui a ua cih.
9 Kae nynh kaw phe kae pya vae khaw: Na thawsaesakuh lah, na rawthungsakuh; rih nan, na bungzou nan sah; pawccecize Bawipaw na Pachia tuh na ccianaw miakaw kya na kya a um,” a cipya.
10 Te Joshua nynh ccungccaw hae laku e bawi hae kha,
11 “Ryahmin kya po lekuh lan cceih oh lah, ccungccaw hae kyakhe: ‘Nae vaelooh kha paccynkuh oh; pawccecize Bawipaw nae Pachia nynh ccou lan ae pya oh paw ram lungkhu lang teete ccou khylan nin thum lungkhu, e Jordan hynh na zua cih oh,’ cite hopah oh,” cite kaw a pya hae.
12 Reuben phin hae, Gad phin hae te Manasseh phin angankuh kyakhe Joshua nynh,Ref 1.12-15: Nam 32.28-32; Deu 3.18-20; Jos 22.1-6
13 “Bawipaw ryalahtu Moses nynh, ‘Bawipaw nae Pachia nynh haeungnaw hmin kha ae pya cih oh zah, e ram hynh ae pya cih oh,’ cite kaw ae pya oh paw bya kha liathui oh.
14 Nae zu nae ccaaw hae te nae sahiin-awvaw hae tuh Jordan vaw khuraw lang, Moses nynh ae pya oh paw ram kya na cciatawsya cih oh. Thuasalama nanning lakuze a rawhoypaw balyn nynh rhawtuknawpaw zunghe ccyngkute nae uno hae malang khe na cceih cih oh zah na bawm cih oh.
15 Nae uno hae nynh mah Bawipaw nae Pachia nynh a pya hae paw ram kha ccou hae zah, naemaw hawte Bawipaw nynh haeungnaw a pya mawlaezung hae na bawm cih oh. Tukoute Bawipaw ryalahtu Moses nynh ae pya oh paw Jordan khuraw, nithua lang umpaw naemaw ram lang na kithui cih oh zah na ccou cih oh,” a cipya hae.
16 Minmin nynh Joshua kha khungru hae zah: “Kaw nae pyapaw balyn kha kae cyih cih zah nae sawnaw miakaw lang kae cceih cih.
17 Atyn-are kya Moses bya kae ngae hawte, na bya mah kae ngae cih; Bawipaw na Pachia tuh Moses kya a la um hawte nang na kya mah um vae sah!
18 Humhung zemah na bya kha ei zah, kaw nae pyapaw miakaw kha a zui leipaw tuh chia athua cih. Na thawsaesakuh lah, na rawthungsakuh,” a cipya hae.